ހެލްތު އިމަރޖެންސީ އޮޕަރޭޝަން ސެންޓަރު، އެޗް.އީ.އޯ.ސީގައި ދަރުމަވެރިއެއްގެ ގޮތުގައި މަސައްކަތްކުރި މީހަކަށް ޖީންސީ ގޯނާކުރި މައްސަލައެއް ފުލުހުން ތަޙްޤީޤުކުރަން ފަށައިފިއެވެ.

ފުލުހުން ބުނީ، މި މައްސަލަ ހުށަހަޅާފައިވަނީ ޖޫން 11 ވަނަ ދުވަހުގެ ރޭ 20:39 ގައިކަމަށާއި، މިކަމާގުޅިގެން ބަލަންޖެހޭ ކަންކަން ބަލަމުންދާކަމަށެވެ. ނަމަވެސް މި މައްސަލައާއި ގުޅޭ އިތުރު އެއްވެސް ތަފްޞީލެއް ފުލުހުން ހާމަކޮށްފައެއް ނުވެއެވެ.

އެޗް.އީ.އޯ.ސީގެ ދަަރުމަވެރިއަކަށް ޖިންސީ ގޯނާކުރި މައްސަލަ ފުލުހުން ތަޙްޤީޤުކުރަން ފަށާފައިވާއިރު، ހެލްތު މިނިސްޓްރީގެ އިސް މަޤާމެއްގައި ހުންނެވި ބޭފުޅަކު އެޗް.އީ.އޯ.ސީގައި ދަރުމަވެރިއެއްގެގޮތުގައި މަސައްކަތްކުރަމުންދިޔަ އެމް.އޭ.ސީ.އެލްގެ އަންހެން މުވައްޒަފެއްގެ ގައިގައި އަތްލާ، ޖިންސީ ގޯނާކުރި މައްސަލައެއް ސޯޝަލް މީޑިއާގައި ވަނީ ދައުރުވާން ފަށާފައެވެ. މިކަމާގުޅޭގޮތުން ހެލްތު މިނިސްޓްރީން ބުނީ، މިފަދަ މައްސަލައެއް ފެންމަތިވުމާގުޅިގެން މިނިސްޓްރީގެ ކޮމެޓީއަކުން މި މައްސަލަ ބަލަމުންދާކަމަށެވެ. އަދި މިކަމުގެ ތުޙުމަތުކުރެވޭ ފަރާތަށް ފިޔަވަޅުއެޅުމާމެދު ގޮތެއް ނިންމާނީ މައްސަލަ ނިމުމުންކަމަށްވެސް އެ މިނިސްޓްރީން ބުނެއެވެ.