"އުންމީދީ" ޓީމުގެ އެންމެ ކުރިއަށް ތިލްމީޒާއާއި އދ. ގެ އިންޑިއާ މިޝަންގެ ބޭފުޅެއް

ޖޫން 7 ވީ ހޯމަ ދުވަހު ބޭއްވި އދ. ގެ އާންމު މަޖިލީހުގެ 76 ވަނަ ސެޝަންގެ ރައީސް ހޮވުމަށް ބޭއްވި އިންތިޚާބު ރާއްޖޭގެ ފޮރިން މިނިސްޓަރ އަބްދުﷲ ޝާހިދު ކާމިޔާބުކުރެއްވީ 143 ވޯޓުގެ ބޮޑު އަޣުލަބިއްޔަތަކުންނެވެ. މިއީ އދ. ގެ 75 އަހަރުގެ ތާރީޚުގައި ރާއްޖެއަށް ރިޔާސަތު ލިބުނު ފުރަތަމަ ފަހަރެވެ. 193 މެމްބަރު ޤައުމު ހިމެނޭ މި މަޖިލީހުގެ ރައީސްކަމަށް އެމަނިކުފާނާ ވާދަކުރެއްވީ އަފްޣާނިސްތާނުގެ ކުރީގެ ޚާރިޖީ ވަޒީރު ޒަލްމާއި ރަސޫލެވެ. މިނިސްޓަރ ޝާހިދު އދ. ގެ އާންމު މަޖިލީހުގެ 76 ވަނަ ސެޝަންގެ އިންތިޚާބީ ރައީސަކަށް ހުންނަވައިގެން އދ. ގައި އެރޭ ތަޤުރީރުކުރައްވައި ވަނީ އެމަނިކުފާނު އަންނަ ސެޕްޓެމްބަރު މަހު މަޤާމާ ހަވާލުވެވަޑައިގަތުމުގެ ކުރިންނާއި އަދި އެއަށްފަހު ކުރައްވާނެ މަސައްކަތްތައް ތަފުސީލުކޮށްދެއްވާފައެވެ.

މިނިސްޓަރ ޝާހިދު ވިދާޅުވީ އެމަނިކުފާނުގެ ދައުރުގައި 5 ކަމަކަށް އިސްކަންދެއްވައިގެން މަސައްކަތްކުރައްވާނެކަމަށެވެ. އެގޮތުން ކޮވިޑުން ދުނިޔެ އަރައިގަނެ، ހަމަހަމައަށް ޤައުމުތަކަށް ވެކްސިން ފޯރުކޮށްދިނުމާއި، މޫސުމަށް އަންނަ ބަދަލު ކުޑަކުރަން ކުރާ މަސައްކަތް އިތުރުކުރުމާއި، އިންސާނީ ހައްޤުތައް ރައްކާތެރިކުރުމަށް ކުރާ މަސައްކަތް އައު އުސްމިންތަކަކަށް ގެންދިއުން ހިމެނެއެވެ. މީގެ އިތުރުން މިންތީގެ ހަމަހަމަކަން ޤާއިމުކުރުމާއި ނަސްލީ ތަފާތުކުރުން ނައްތާލުމަށް ޚާއްސަ އިސްކަމެއް ދެއްވާނެކަމަށް ވިދާޅުވިއެވެ. އެގޮތުން މިންތީގެ ގޮތުން ހަމަހަމަކަން ގެއްލި އަޑުއުފުލުމުގެ ބާރު ނެތް ބައްދަލުވުމެއްގައި އެމަނިކުފާނު ބައިވެރިވެވަޑައި ނުގަންނަވާނެކަމަށް ވިދާޅުވެފައިވާއިރު، އދ. ގެ އާންމު މަޖިލީހުގައި ޒުވާނުންނަށް އަޑު އުފުލުމަށް ފުރުސަތު ފަހިކޮށްދެއްވާނެކަމުގެ ޔަޤީންކަން ވެސް އެރުވިއެވެ.

މި އަމާޒުގެ ދަށުން މަސައްކަތް ބައްޓަން ކުރައްވާއިރު، އެމަނިކުފާނު މީގެ 3 މަސްފަހުން ހަވާލުވާ އައު މަޤާމާ ހަވާލުވެވަޑައިގަންނަވާއިރު، މި އަމާޒުތަކަށް ވާސިލުވުމަށް އެކުލަވާލާ ޓީމަކީ ވެސް ތަފާތު ޓީމަކަށް ވާނެކަމަށް ވިދާޅުވިއެވެ. އެގޮތުން މި ޓީމަކީ ވެސް މިންތީގެ ގޮތުން ހަމަހަމަ، އެކި ނަސްލުތަކާއި އެކި ޤައުމުތަކުގެ މެމްބަރުން ހިމެނޭ ޓީމަކަށް ވާނެކަމަށް ވިދާޅުވިއެވެ. އދ. ގައި މިހާރު ވެސް ހަރަކާތްތެރިވާ ރާއްޖޭގެ މިޝަންއަށް "ޓީމް ޚާރިޖިއްޔާ" ގެ ނަމުން މިޓީމަށް ވެސް މުޚާތަބުކުރައްވާ މިނިސްޓަރ ޝާހިދު ވަނީ އެމަނިކުފާނުގެ ދައުރަކީ އުންމީދު ނުވަތަ "ހޯޕް" ގެނުވާނެ ދައުރަކަށް ހައްދަވާނެކަމަށެވެ. އެގޮތުން އދ. ގެ ތެރޭގައި ހުރި މައްސަލަތައް ހައްލުކުރުމަށް މަސައްކަތް ކުރައްވާއިރު، އެމަނިކުފާނުގެ ދައުރުގައި ބައިނަލްއަޤްވާމީ މީޑިއާތަކާއި ޖަމުޢިއްޔާތަކަށް ފަސޭހައިން މަޢުލޫމާތު ސާފުކޮށް އދ. ގެ އާންމު މަޖިލީހާ ގުޅިގެން މަސައްކަތްކުރެވޭނެ މަގު ފަހިކޮށްދެއްވާނެކަމަށެވެ.

މިނިސްޓަރ ޝާހިދުގެ މި އުންމީދީ ވާހަކަތަކަށްފަހު، އަޅުގަނޑުމެންނަށް މިހާރު މިފެންނަނީ މިނިސްޓަރ ޝާހިދު އެމަނިކުފާނުގެ އައު މަޤާމުގައި އެހީވެދޭނެ ޓީމު އުކުލަވާލަން ފެއްޓެވި މަންޒަރެވެ. ޖޫން 10 ވީ ބުރާސްފަތި ދުވަހު މިނިސްޓަރ ޝާހިދު ކުރެއްވި ޓުވީޓެއްގައި އެ މަނކުފާނު މިވަނީ މި ޓީމުގެ މުހިންމު ދެ މެމްބަރުން ހާމަކުރައްވާފައެވެ. އެގޮތުން މި ޓީމުގެ އަދި އދ. ގެ އާންމު މަޖިލީހުގެ 76 ވަނަ ސެޝަންގެ ރައީސްގެ ސްޕެޝަލް އެންވޯއީއަކަށް ތިލްމީޒާ ހުސައިން ވަނީ އައްޔަނުކުރައްވާފައެވެ. ތިލްމީޒާއަކީ ދިވެހިރާއްޖެއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބުގެ އިތުރުން ދިވެހިރާއްޖެއިން އެމެރިކާއަށް ކަނޑައަޅުއްވާފައި ހުންނަވާ ސަފީރު ވެސް މެއެވެ.

މިނިސްޓަރ ޝާހިދުގެ ވަޢުދުފުޅާ އެއްގޮތަށް އެމަނިކުފާނުގެ އައު ޓިމުގައި މިންތީގެ ގޮތުން ހަމަހަމަ، އެކި ނަސްލުތަކާ އެކި ޤައުމުތަކުގެ މެމްބަރުން ހިމެނޭ ޓީމެއްކަން މިވަނީ ސާބިތުކޮށްދީފައެވެ. އެގޮތުން މިޓީމުގެ އަދި އދ. ގެ އާންމު މަޖިލީހުގެ 76 ވަނަ ސެޝަންގެ ރައީސްގެ ޗީފް ޑު ކެބިނެޓްގެ މަޤާމަށް ހޮއްވަވާފައި ވަނީ އިންޑިއާއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބުގެ ނައިބު ނަގަރާޖް ނައުޓޫ ކުމާރެވެ. މި ޓީމުގެ އިތުރު މެމްބަރުން ކުރިއަށް އޮތްތަނުގައި އިއުލާންކުރައްވާނެކަމަށް ވިދާޅުވެފައިވާއިރު، މިނިސްޓަރ ޝާހިދު ވަނީ ތިލްމީޒާއާއި، އެމްބެސެޑަރ ނަގަރާޖްއަކީ އެމަނިކުފާނުގެ 5 އަމާޒަށް ވާސިލުވުމަށް ކުރާ މަސައްކަތުގައި މުހިންމު ރޯލެއް އަދާކުރާނެ ދެ ބޭފުޅުންކަމަށް ވިދާޅުވެފައެވެ. މިނިސްޓަރ ޝާހިދު ވަނީ ކުރިއަށް އޮތް 3 މަސްވަހުގެ ތެރޭގައި މަޤާމާ ހަވާލުވުމަށްފަހު މަސައްކަތްތައް ވަގުތުން ފެށޭވަރަށް ތައްޔާރުވެވަޑައިގަންނަވާނެކަމަށް ވިދާޅުވެފައެވެ.