ސިއްރުކޮށްގެން ކުރިޔަށްގެންދިޔަ އިމްތިޔާޒު ކޮމިޓީގެ ބައްދަލުވުން ލީކުވި މައްސަލަ ބަލަނީ
ސިއްރު ކޮމިޓީގެ ބައްދަލުވުން ލީކުވި މައްސަލަ ބެލުމަށް ކޮމިޓީ ތެރެއިން ސަބްކޮމިޓީއެއް ނެގުމަށް ވަނީ ފާސްކޮށްފައި
އިމްތިޔާޒު ކޮމިޓީގެ ބައްދަލުވުމެއްގެ ތެރެއިން
ޑިފެންސް މިނިސްޓްރީގެ ޑެޕިއުޓީ މިނިސްޓަރު ހަސަން ޒަމީލް، ރައްޔިތުންގެ މަޖިލީހުގެ އިމްތިޔާޒަށް އަރައިގަތް ކަމަށް ވިދާޅުވެ އެ މައްސަލަ ބަލައިދިނުމަށް އެދިވަޑައިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިމްތިޔާޒު ކޮމިޓީއަށް ފޮނުއްވި މައްސަލަ ބެލި އިމްތިޔާޒު ކޮމިޓީގެ ބައްދަލުވުން ސިއްރުކޮށްފައިވަނިކޮށް އެބައްދަލުވުމުގެ ތަފްސީލުތައް ލީކުކޮށްލާފައިވާތީ އެކަން ބެލުމަށް އެކޮމިޓީން ފާސްކޮށްފިއެވެ.
ޒަމީލް، މަޖިލީހުގެ އިމްތިޔާޒަށް އަރައިގަތް ކަމަށް މަޖިލީހުގެ ރައީސް މުހައްމަދު ނަޝީދު ނިންމެވީ، އެ މަނިކުފާނު އަވަހާރަކޮށްލަން ބަޔަކު ދިން ޓެރަރިސްޓު ހަމަލައާ ގުޅިގެން މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އިން ކުރިއަށް ގެންދާ އިންކުއަރީއަށް ވަކިވަކި ސިފައިން ހާޒިރު ނުކުރެވޭނެ ކަމަށް އަންގައި، ޑިފެންސް މިނިސްޓްރީގެ ފަރާތުން ޒަމީލް ސޮއިކުރައްވައި ސިޓީއެއް ފޮނުއްވުމާ ގުޅިގެންނެވެ.
ރައީސް ނަޝީދު އިމްތިޔާޒު ކޮމިޓީއަށް މައްސަލަ ފޮނުއްވުމާ ގުޅިގެން ކޮމިޓީގެ ބައްދަލުވުމެއް އާދިއްތަ ދުވަހުގެ ރޭ 9:30 ގައި ބޭއްވުމަށް ތާވަލްކުރިއެވެ. އޮންލައިންކޮށް ކުރިޔަށް ގެންދިޔަ ކޮމިޓީ ބައްދަލުވުން ކުރިޔަށްގެންދިޔައީ ސިއްރުކޮށްގެންނެވެ.
މިބައްދަލުވުމުގައި މި މައްސަލަ ކޮމިޓީން ބަލާނެ ތަނެއްނެތް ކަމަށް ހުށަހެޅުއްވީ ކުރީގެ ޑިފެންސް މިނިސްޓަރުކަން ވެސް ކުރެއްވި ދަނގެތި ދާއިރާގެ ޖުމްހޫރީ ޕާޓީގެ މެމްބަރ މުހައްމަދު ނާޒިމެވެ. ނާޒިމްގެ މި ހުށަހެޅުއްވުން ފާސްވެފައިވަނީ އެމްޑީޕީގެ މެމްބަރުންގެ ވޯޓާ ވެސް އެކުއެވެ. މި މައްސަލަ ކޮމިޓީން ބޭރުކޮށްލުމަށް ވޯޓު ދެއްވާފައިވާ އެމްޑީޕީގެ މެމްބަރުންނަކީ ގަމު ދާއިރާގެ އެމްޑީޕީ މެމްމަަބަރ މުހައްމަދު ވިސާމް، ކޮމަންޑޫ ދާއިރާގެ އެމްޑީޕީ މެމްބަރ ހުސައިން ވަހީދު، ތިނަދޫ ދެކުނު ދާއިރާގެ އެމްޑީޕީ މެމްބަރ އަބްދުﷲ ސަނީފް، މިލަންދޫ ދާއިރާގެ އެމްޑީޕީ މެމްބަރ އަލީ ރިޒާއެވެ.
ރައީސް ނަޝީދު ހުށަހެޅުއްވި މައްސަލަ ބޭރުކޮށްލުމަށް މިމެމްބަރުން ވޯޓު ދެއްވިކަން ސޯޝަލް މީޑިޔާއަށް ލީކުވުމާއި ގުޅިގެން އެމްޑީޕީގެ އެތެރޭގައި ވަރަށް ބޮޑަށް މައްސަލަ ހޫނުވެ މިމެމްބަރުންނަށް އަމާޒުކޮށް ބަހުގެ ހަމަލާތައް އަމާޒުވެގެންދިޔަ ތަން ފެނިގެންދިޔައެވެ.
ބުދަ ދުވަހު އިމްތިޔާޒު ކޮމިޓީގެ ބައްދަލުވުން ފެށިއިރު އެޖެންޑާގައި ވަނީ ތުޅާދޫ ދާއިރާގެ މެމްބަރ ހިސާން ހުސައިން އަށް މީދޫ ދާއިރާގެ މެމްބަރ މުހައްމަދު ސިޔާމް މުހައްމަދު އިންޒާރުދިން މައްސަލައެވެ. ނަމަވެސް ކޮމިޓީ ބައްދަލުވުން ފެށުމާއެކު ތިނަދޫ ދެކުނު ދާއިރާގެ މެމްބަރ އަބްދުﷲ ސަނީފް ވަނީ ހިސާން މައްސަލައިގެ ކުރިން ކޮމިޓީގެ ސިއްރުތައް ލީކުވި މައްސަލަ ބެލުމަށް ހުށަހަޅާފައެވެ. ސަނީފް ވިދާޅުވީ ސިއްރުކޮށްގެން ކުރިޔަށް ގެންދިޔަ ބައްދަލުވުމެއްގެ ޗެޓް ލޮގް ސޯޝަލް މީޑިޔާއަށް ލީކުކޮށްލުމުގެ ސަބަބުން ބައެއް މެމްބަރުންގެ ފުރާނައަށް ނުރައްކާވާ ހިސާބުގައި ކަންތައްތައް ހުރިކަމަށެވެ. އެފަދަ އިންޒާރުގެ މެސެޖްތައް މެމްބަރުންނަށް ލިބިވަޑައިގަންނަވާފައިވާ ކަމަށް ސަނީފް ވިދާޅުވިއެވެ. އެހެންކަމުން ކޮމިޓީން އެންމެ ފުރަތަމަ ކުރަންޖެހޭނެ ކަމަކީ މިކަން ބެލުން ކަމަށް ސަނީފް ވިދާޅުވިއެވެ.
ކޮމިޓީގެ ޗެޓް ލޮގް ލީކުކޮށްލީ ކޮމިޓީގައި ހިމެނިވަޑައިގަންނަވާ މެމްބަރަކަށްވާއިރު މިފަދަ ކަންކަން ކުރިޔަށް އޮތްތަނުގައިވެސް ތަކުރާރުވިޔަ ނުވާނެ ގޮތަކަށް ކަންކަން ބައްޓަންކުރުމަށް ސަނީފް އެދިވަޑައިގެންނެވިއެވެ. މިކަމާއި ގުޅިގެން ކޮމިޓީގައި މެމްބަރުން ބަހުސްކުރެއްވުމަށްފަހު ދެ ހުށަހެޅުމެއް ހުށަހެޅިގެންދިޔައެވެ.
ފުރަތަމަ ހުށަހެޅުމަކީ ސިއްރު ކޮމިޓީ ބައްދަލުވުމުގައި ކަންކަން ހިނގާދިޔަ ގޮތް މީޑިޔާއަށް ކޮމިޓީން ސާފުކޮށްދިނުމެވެ. އެގޮތަކީ ނެގުނު ވޯޓާއި ކޮމިޓީގައި ކުރިޔަށްދިޔަ ކަންތައްތަކަކީ 241 ކޮމިޓީން ކުރިޔަށް ގެންދާ އިންކުއަރީއަށް ހުރަސް އެޅުމަށް ކުރި ކަމެއް ނޫންކަން ސާފުކޮށްދިނުމަށެވެ. އެކަން ސާފުކޮށްދިނުމުގެ ގޮތުން ކޮމިޓީގެ މުގައްރިރު ކުޅުދުއްފުށީ އުތުރު ދާއިރާގެ މެމްބަރ ޔާސިރު އަބްދުއްލަތީފް ނޫސްވެރިންނާ ބައްދަލުކުރުމަށް ވަނީ ހުށަހަޅާފައެވެ.
އެއަށްފަހު ދެން ހުށަހެޅުނީ ސިއްރު ކޮމިޓީގެ ބައްދަލުވުން ލީކުވި މައްސަލަ ބެލުމަށް ކޮމިޓީ ތެރެއިން ސަބްކޮމިޓީއެއް ނަގައިގެން ބެލުމަށެވެ. މިދެ ހުށަހެޅުން ވެސް ވަނީ ފާސްވެފައެވެ.
