ރާއްޖެޓީވީއަށް ޕްރެސްތަކަށް ނުވަދެވޭނެކަމަށް ބުނެ ރައީސް އޮފީހުން ބަޔާނެއް ނެރުނު
ވެލިދޫ ދާއިރާގެ މެމްބަރ މުޙައްމަދު ޢަބްދުﷲ ޝަފީޤް
މިސަރުކާރުން ނޫސްވެރިންނަށް ހުރަސްއަޅަމުންދާ ކަމަށް ބުނެ ފާޑުކިޔަމުންދާއިރު، ނިމިގެން ދިޔަ ރައީސް ޢަބްދުﷲ ޔާމީންގެ ސަރުކާރުގައި، ރައީސް އޮފީހުގައި ބާއްވަމުންދިޔަ ނޫސްވެރިންގެ ބައްދަލުވުންތަކަށް ރާއްޖެ ޓީވީއަށް ނުވަދެވިގެންވެސް އުޅެންޖެހުނު ކަމަށް ވެލިދޫ ދާއިރާގެ މެމްބަރ މުޙައްމަދު ޢަބްދުﷲ ޝަފީޤް ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި، ބައެއް މީޑިޔާތަކަށް ސުވާލުކުރުމުގެ ފުރުސަތު ނުލިބުމުން، ސަރުކާރުން މީޑިޔާތަކަށް ހުރަސްއަަޅަނީ ކަމަށް ބުނެ އަންނަނީ ފާޑުކިޔަމުންނެވެ. އެބައްދަލުވުން ފެށުމުގެ ކުރިން ރައީސް އޮފީހުން ބުނެފައިވަނީ ސުވާލުކުރުމުގެ ފުރުސަތު ދިނުމުގައި، ކުރީގެ ނޫސްވެރިންގެ ބައްދަލުވުމުގައި އެފުރުސަތު ނުލިބޭ މީޑިޔާތަކަށް އިސްކަންދޭނެކަމަށެވެ.
ބުދަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގައި ވާހަކަފުޅު ދައްކަވަމުން އޭނާ ވިދާޅުވީ، މިސަރުކާރަށް ފާޑުކިޔާ ފަރާތްތަކުން ނޫސްވެރިންނަށް ފުރުސަތު ނުދޭކަމަށް ބުނެ އެވާހަކަ ދައްކަމުން ދިޔަނަމަވެސް، ނޫސްވެރިން ބޭނުން ސުވާލެއް ކުރުމުގެ ފުރުސަތު މިއަދު ލިބިފައިވާކަމަށެވެ.
މީގެއިތުރުން ރައީސް ނަޝީދަށް ދިން ހަމަލާއަށް އިންސާފުލިބޭނީ ޕީޕީއެމް ސަރުކާރެއްގައި ކަމަށް ވިދާޅުވެ އިދިކޮޅު މެމްބަރުން ދައްކަވަމުން ގެންދަވާ ވާހަކަތަކާ ގުޅިގެން ޝަފީގް ވަނީ އެކަމަށްވެސް ރައްދުދެއްވާފައެވެ. އެގޮތުން 2012 ވަނަ އަހަރު އަވަހަރާކޮށްލި ޑރ އަފްރާޝީމް ޢަލީ އާއި، 2014 ވަނަ އަހަރު ވަގަށްނެގި ރިޟްވާން، އަދި 2017 ވަނަ އަހަރު މަރާލި ޔާމީން ރަޝީދުގެ މަރަށް އެސަރުކާރުގައި އިންސާފު ހޯދައިދެވުނުތޯ މެމްބަރު ސުވާލުކުރެއްވިއެވެ.
މީގެއިތުރުން އެސަރުކާރުގައި ރައީސް ނަޝީދަށް ހުކުމް އިއްވުމަށް ކޯޓުތަކުން ކަންކަން ކުރިގޮތަށްވެސް ޝަފީގް އިޝާރާތްކުރެއްވިއެވެ.
