މޭޑޭގައި ބޭއްވި މުޒާހަރާގައި ފުލުހުން އަމަލުކޮށްފައިވާ ގޮތާ ގުޅޭގޮތުން ހޯމް މިނިސްޓަރާ ސުވާލުކުރުން ބުދަ ދުވަހުގެ ޖަލްސާގައި
8 ޖޫން 2021 | އަންގާރަ 15:57ހޯމް މިނިސްޓަރާ ސުވާލުކުރުމަށް ހުށަހަޅުއްވާފައިވަނީ ގަލޮޅު ދެކުނު ދާއިރާގެ މެމްބަރު މީކާއީލް
ހޯމް މިނިސްޓަރު ޢިމްރާން ޢަބްދުﷲ
މިއަހަރުގެ މޭޑޭގައި މާލޭގައި ބޭއްވި މުޒާހަރާ ރޫޅާލުމަށް ފުލުހުން އަމަލުކޮށްފައިވާ ގޮތާއި ގުޅޭގޮތުން ހޯމް މިނިސްޓަރ ޢިމްރާން ޢަބްދުﷲއާ ސުވާލުކުރުމަށް ބުދަ ދުވަހުގެ ޖަލްސާއަށް އެޖެންޑާކޮށްފިއެވެ.
ހޯމް މިނިސްޓަރާއި ސުވާލުކުރުމަށް ހުށަހަޅުއްވާފައިވަނީ ގަލޮޅު ދެކުނު ދާއިރާގެ މެމްބަރު މީކާއިލް އަޙުމަދު ނަސީމެވެ. ހޯމް މިނިސްޓަރާއި މައިގަނޑު ތިން ސުވާލެއް ކުރެއްވުމަށް އޭނާ ވަނީ ހުށަހަޅުއްވާފައެވެ.
އޭގެތެރެއިން އެއް ސުވާލަކީ މެއި 1 ވީ ހޮނިހިރު ދުވަހުގެ ރޭ މާލޭގައި ބޭއްވުނު މުޒާހަރާއެއް ރޫޅާލުމުގައި ފުލުހުން ހާލަތާ ނުބައްދަލު ބާރުގެ ބޭނުންކޮށްފައިވާއިރު، މިހާތަނަށް އެއްވެސް ފުލުހަކަށް ފިޔަވަޅު އެޅިފައިވާނަމަ، އެ ފިޔަވަޅަކީ ކޮބައިތޯއެވެ. އަދި އެރޭ ފުލުހުންގެ ޔުނިފޯމް އަޅައިގެން ތިބީ ފުލުހުންގެ ގާނޫނުގެ ދަށުން، ސަރވިސް ނަންބަރު ފެންނަ ގޮތަށްތޯއާއި، އެރޭގެ މުޒާހަރާ ރޫޅާލުމަށް ހަރަކާތްތެރިވީ އެކަމާ ގުޅޭ އެކަށީގެންވާ ޓްރެއިނިންގ ލިބިފައިވާ ފުލުހުންތޯއެވެ.
އަދި މުޒާހަރާތަކާއި އެކިއެކި އެއްވުންތައް ރޫޅާލުމުގައި ދިވެހި ފުލުހުން ހަރަކާތްތެރިވާއިރު ބޮޑީ ކެމެރާ ބޭނުން ނުކުރަނީ ކީއްވެތޯވެސް ވަނީ އައްސަވާފައެވެ.
މީގެއިތުރުން ބޮޑެތި ކުށްތަކުގެ ތުހުމަތުކުރެވޭ ފަރާތްތަކުގެ ވަނަވަރު ދިވެހި ފުލުހުންގެ ޚިދުމަތުން ހާމަކުރާއިރު، ހުރިހާ ފަހަރަކު އެއްއުސޫލުން ޢަމަލުނުކުރަނީ ކީއްވެތޯވެސް މީކާއީލް ވަނީ އިމްރާން އަރިހުން ސާފުކުރުމަށް ހުށަހަޅުއްވާފައެވެ.
ބުދަ ދުވަހުގެ ޖަލްސާ ކުރިޔަށްދާނީ އޮންލައިންކޮށެވެ. ޖަލްސާ ފެށޭނީ ހެނދުނު 10 ޖަހާއިރުއެވެ.
