އުއްތަމަފަނޑިޔާރަށް ޚާއްސަ ގެއެއް ދައުލަތުން ހަމަޖައްސަންވާނެ ކަމަށް ބަޔާންކުރާ ބިލް ހުށަހަޅައި، ބަހުސް ފަށައިފި

އުއްތަމަފަނޑިޔާރު ދިރިއުޅުމަށްޓަކައި ޚާއްސަކުރެވޭ ވަކި ގެއެއް ދައުލަތުން ހަމަޖައްސައި ދިނުމަށާއި އުއްތަމަފަނޑިޔާރަށް ދޭންޖެހޭ ހިމާޔަތާއި ރައްކާތެރިކަން މޯލްޑިވްސް ނޭޝަނަލް ޑިފެންސް ފޯސްއިން ހަމަޖައްސައިދޭންވާނެ ކަމަށް ކަނޑައެޅުމަށްޓަކައި ފަނޑިޔާރުންގެ ގާނޫނަށް އިސްލާހު ގެނައުމުގެ ބިލު ހުށަހަޅައި، ބަހުސްފަށައިފިއެވެ.

ސަރުކާރުގެ ފަރާތުން މިބިލް ހުށަހެޅުއްވީ މަތިވެރި ދާއިރާގެ މެމްބަރ ހަސަން ޒަރީރެވެ. ބިލް ހުށަހަޅުއްވަމުން ޒަރީރު ވިދާޅުވީ ސަރުކާރުގެ ފަރާތުން މިބިލް ހުށަހެޅުމުގެ ބޭނުމަކީ އުއްތަމަފަނޑިޔާރަށް ދައުލަތުން ދެމުންގެންދާ ހިމާޔަތާއި ރައްކާތެރިކަން އިތުރަށް ހަރުދަނާކުރުންކަމަށެވެ. ޒަރީރު ވިދާޅުވީ މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށްދިން ޓެރަރިސްޓް ހަމަލާއަށްފަހު މިފަދަ ބިލެއްގެ މުހިންމުކަން ބޮޑުވެފައިވާކަމަށެވެ. އެގޮތުން 2008 ވަނަ އަހަރު ފާސްކުރެވުނު އައު ގާނޫނު އަސާސީގެ ދަށުން ދައުލަތުގެ ތިން ބާރު ވަކިވެފައި އޮންނަ ނިޒާމެއް ގާއިމުކުރެވިފައިވާއިރު އަދުލު އިންސާފު ގާއިމުކުރުމުގެ ބާރުގެ އެންމެ އިސްފަރާތަކީ އުއްތަމަ ފަނޑިޔާރުކަމަށް ގާނޫނު އަސާސީގައި ބަޔާންކޮށްފައިވާ ކަމަށެވެ.

އެހެންކަމަށްވާއިރު މިއިސްލާހުގެ މައިގަނޑު ބޭނުމަކީ އުއްތަމަ ފަނޑިޔާރަށް ސަލާމަތާއި ރައްކާތެރިކަން ކަށަވަރުކޮށްދިނުމަށް ގެއެއް ހަމަޖައްސައިދިނުން ކަމަށް ޒަރީރު ވިދާޅުވިއެވެ.

މިހާރު އަމަލުކުރަމުން އަންނަ ފަނޑިޔާރުންގެ ގާނޫނުގެ 13 ވަނަ މާއްދާގެ (ހ) ގައި ބުނެފައިވަނީ އުއްތަމަ ފަނޑިޔާރުގެ ސަލާމަތާއި ރައްކާތެރިކަން ދަމަހައްޓާނީ ސިފައިންގެ ގާނޫނާއި އެ ގާނޫނުގެ ދަށުން ހަދާ ގަވާއިދުގައިވާ ގޮތުގެމަތިން ކަމަށެވެ.

މިހާރު ހުށަހަޅާފައިވާ އިސްލާހުގެ ބިލްގައި 13 ވަނަ މާއްދާ ގެ (ހ) އިސްލާހު ކުރުމަށް ހުށަހަޅާފައިވާ ގޮތަކީ އުއްތަމަ ފަނޑިޔާރަށް ދޭންޖެހޭ ހިމާޔަތާއި ރައްކާތެރިކަން މޯލްޑިވްސް ނޭޝަނަލް ޑިފެންސް ފޯސްއިން ހަމަޖައްސައިދޭންވާނެ ކަމަށެވެ.

މީގެއިތުރުން މިބިލަށް ވަނީ މާއްދާއެއް އިތުރުކުރުމަށް ވެސް ހުށަހަޅާފައެވެ. އެގޮތުން އުއްތަމަ ފަނޑިޔާރު ދިރިއުޅޭނެ ރަސްމީގެ ނަމުގައި މާއްދާއެއް ވަނީ އިތުރުކޮށްފައެވެ.

އިތުރުކުރި މާއްދާގައި ބުނެފައިވަނީ އުއްތަމަ ފަނޑިޔާރާއި އޭނާގެ އާއިލާ ދިރިއުޅޭނެ ރަސްމީ ގެއަކާއި އެގެއަށް ބޭނުންވާ އެކަށީގެންވާ އަދަދެއްގެ މުވައްޒަފުންނާއި އެގެއަށް ހިނގާނެ ޚަރަދު ދައުލަތުގެ ފަރާތުން ހަމަޖަައްސައިދޭންވާނެ ކަމަށެވެ. އަދި ރަސްމީ ގެއަކީ ސަލާމަތީގޮތުން އަޅަންޖެހޭ ފިޔަވަޅުތައް އެޅޭނެ ފަދަ ގޮތަކަށް ހުރި ގެއެއް ކަމުގައިވާންވާނެ ކަމަށް ބިލްގައި ބުނެފައިވެއެވެ.

ރަސްމީ ގެއަށް ބޭނުންވާ މުވައްޒަފުން ހަމަޖައްސަންވާނީ ސްޕްރީމް ކޯޓުން ކަމަށް މިހާރު ހުށަހަޅާފައިވާ ބިލްގައި ބުނެފައިވެއެވެ.

އުއްތަމަ ފަނޑިޔާރުގެ އާއިލާކަމަށް ބުނެފައިވަނީ އުއްތަމަ ފަނޑިޔާރާއި އެކުގައި ދިރިއުޅޭ އޭނާގެ އަނބިމީހާ ނުވަތަ ފިރިމީހާ އާއި ދަރިންނާއި މަންމައިންނާއި ބައްޕައިން ކަމަށް ބިލްގައި ބުނެފައިވެއެވެ.