ޕާކިސްތާނުގެ ސިންދު ޕްރޮވިންސަށް ދަތުރުކުރަމުން ދިޔަ ރޭލެއް އެކްސިޑެންޓްވެ 36 މީހަކު މަރުވެއްޖެއެވެ.

ރޭލު ދަތުރުކުރަމުން ދިޔަ ޓްރެކުން ކައްސާލައިގެން ގޮސް އެހެން ރޭލެއްގައި ޖެހި ރޭލު ފުރޮޅާލައިގެން ހިނގި މި ހާދިސާގައި ގިނަބަޔަކަށް އަނިޔާވިއެވެ. މީހުން ސަލާމަތް ކުރުމުގައި ހަރަކާތްތެރިވާ ޓީމުތަކުން އަނިޔާ ލިބުނު މީހުން ހޮސްޕިޓަލަށް ގެންގޮސްފައިވާއިރު، ބައެއް މީހުންނަށްވަނީ ސީރިއަސް އަނިޔާތަކެއް ވެސް ލިބިފައެވެެ.

އެކްސިޑެންޓް ހިނގާފައިވަނީ ޕާކިސްތާކުގެ ދެކުނުގައި އޮންނަ ގޮޓްކީ އަވަށް ކައިރިންނެވެ.

އޮފިޝަލުންނާ ހަވާލާދީ ރޮއިޓާރސްގައި ރިޕޯޓު ކޮށްފައިވާ ގޮތުން ރޭލު ތެރޭގައި ތާށިވެފައ ތިބީ ކިތައް މީހުންކަން ބުނަން އަދި ނޭނގެއެވެ. މީހުން ސަލާމަތް ކުރުމުގެ މަސައްކަތުގައި ޓީމްތައް އަންނަނީ ހަރަކާތްތރިވަމުންނެވެ.

ބޮޑުވަޒީރު އިމްރާން ޚާން ވިދާޅުވެފައިވަނީ، މި ޚަބަރު އެއްސެވީ ހައިރާން ކަމާއެކު ކަމަށާއި، އާއިލާތަކަށް ބޭނުންވާ ސިއްޙީ އެހީތެރިކަން ފޯރުކޮށްދެއްވާނެ ކަމަށެވެ. އަަދި މިކަން ހިނގައިދިޔަގޮތް ރަނގަޅަށް ބެލުމަށް ވެސް ވަނީ އަންގާފައެވެ.

2013 ވަނަ އަހަރުން ފެށިގެން 2019 ވަނަ އަހަރާ ދެމެދު ޕާކިސްތާނުގައި ހިނގާފައިވާ ރޭލު އެކްސިޑެންޓް ތަކުގައި 150 މީހުންގެ ފުރާނަވަނީ ގެއްލިފައެވެ.