ހާޒިރުކުރަނީ 29 ސިފައިން، އިންކުއަރީ ކުރިޔަށްދާ ވަރަކުން އަދަދުތަކަށް ބަދަލު އަންނާނެ: އަސްލަމް
ލިޔެކުޔުމުން ލިބިފައިވާ މައުލޫމާތުގެ އަލީގައި ފާހަގަކުރެވޭ ބައެއް ބޭފުޅުންނަށް ސުވާލުކުރުމަށް ވަނީ ދަންނަވާފައި
ރައްޔިތުންގެ މަޖިލީހުގެ ރައީސަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތް ހޯދުމަށް 241 ކޮމިޓީން ކުރިއަށް ގެންދާ ޕާލަމެންޓަރީ އިންކުއަައިރީއަށް އެކި ފަރާތްތައް ހާޒިރުކުރުން
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގައި އެމަނިކުފާނުގެ ސެކިއުރިޓީ ފެއިލްވި ގޮތާ ގުޅިގެން ސަލާމަތީ ޚިދުމަތްތަކާ ބެހޭ ކޮމިޓީން ކުރިޔަށް ގެންދާ އިންކުއަރީގައި އެމްއެންޑީއެފްގެ އޮފިސަރުންގެ ތެރެއިން 29 ބޭފުޅަކާ ސުވާލުކުރުމަށް ކޮމިޓީން ނިންމާފައިވާކަމަށް ކޮމިޓީގެ މުގައްރިރު މުހައްމަދު އަސްލަމް ވިދާޅުވެއްޖެއެވެ.
އިންކުއަރީއާ ގުޅޭގޮތުން ނޫސްވެރިންނަށް މައުލޫމާތު ދިނުމަށް ހޯމަ ދުވަހު ބޭއްވި ބައްދަލުވުމުގައި ކޮމިޓީން ސުވާލުކުރުމަށް ހަމަޖެހިފައިވާ ސިފައިންގެ އޮފިސަރުންގެ އަދަދާ ގުޅޭގޮތުން "ރާއްޖެއެމްވީ"ން ދެންނެވި ސުވާލަށް ޖަވާބު ދެއްވަމުން އަސްލަމް ވިދާޅުވީ އެ އަދަދަށް ބަދަލު އައުމަކީ އެކަށީގެންވާ ކަމެއްކަމަށެވެ. އެންމެ ފުރަތަަމަ ކޮމިޓީން ނިންމާފައިވަނީ 29 އޮފިސަރުންނާ ސުވާލުކުރުމަށް ކަމަށެވެ.
އެހެންނަމަވެސް އިންކުއަރީއަށް ބޭނުންވާ މައުލޫމާތު ލިބޭ ކަމަށް ކޮމިޓީއަށް ގަބޫލުކުރެވޭ ކަމަށްވާނަމަ ދެން މައުލޫމާތު ސާފުކުރުމަށް ބޭނުންވާ އެހެން އޮފިސަރުންގެ ފަރާތުން މައުލޫމާތު ސާފުނުކޮށް ވެސް ހިނގައިދާނެކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ ލިޔެކިޔުމުން ލިބިފައިވާ މައުލޫމާތުގެ އަލީގައި ފާހަގަކުރެވޭ ބައެއް ބޭފުޅުންނަށް ބައެއް މަގާމުތަކުގެ މަސްއޫލިއްޔަތު އަދާކުރައްވައި އެ ބޭފުޅުންނަށް މިހާރު ސުވާލުކުރުމަށް ދަންނަވަމުން ގެންދަވާކަމަށެވެ. އަދި އިތުރަށް އިންޓަރވިއުތަކުން ފާހަގަކުރެވޭ ކަންކަމާއި އެނގިގެންދާ ކަންކަމުގެ މައްޗަށް ބިނާކޮށް ސުވާލުކުރަން ބޭނުންވާ ފަރާތްތަކަށް ބަދަލު އަންނަމުންދާ ކަމަށް އަސްލަމް ވިދާޅުވިއެވެ. މީގެއިތުރުން ސުވާލުކުރުމަށް ވަކި އަދަދެއް ކޮމިޓީން ނިންމާފައިނުވާ ކަމަށް އަސްލަމް ވިދާޅުވިއެވެ.
އިންކުއަރީގައި އެކި ފަރާތްތަކާ ސުވާލުކުރުމަށް ފަށާފައިވަނީ މެއި މަހުގެ 5 ވަނަ ދުވަހުން ފެށިގެންނެވެ. މިހާތަނަށް އައިއިރު 7 ފަރާތަކާ ކޮމިޓީން ވަނީ ސުވާލުކޮށްފައެވެ. އޭގެތެރޭގައި ކޮމިޝަނަރ އޮފް ޕޮލިސް މުހައްމަދު ހަމީދުގެ އިތުރުން ފުލުހުންގެ ބައެއް އޮފިސަރުން ހިމެނެއެވެ. އަދި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް އާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަބްދުއްރަހީމް ޢަބްދުއްލަތީފްއާ ވެސް ވަނީ ސުވާލުކޮށްފައެވެ. ހޯމަ ދުވަހު އިންކުއަރީގެ ބޭނުމަށް ވަނީ ކައުންޓަރ ޓެރަރިޒަމް ސެންޓަރ ގެ ޑިރެކްޓަރ ޖެނެރަލް، ބްރިގޭޑިއަރ ޖެނެރަލް ޒަކަރިއްޔާ މަންސޫރާ ވެސް ސުވާލުކޮށްފައެވެ.
