ކަރަންޓުގެ މައްސަލައެއް ދިމާވެފައިވާތީ ހޯމަ ދުވަހުގެ ޖަލްސާ ކެންސަލް
ޓެކްނިކަލް މައްސަލައެއް ދިމާވެ މައްސަލަ ހައްލުކުރަން ވަގުތު ނަގާނެކަމަށް ބެލެވޭތީ ޖަލްސާ ވަނީ ކެންސަލްކޮށްފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގެ އިދާރާގައި ކަރަންޓުގެ މައްސަލައެއް ދިމާވެފައިވާތީ ހޯމަ ދުވަހު ބާއްވަން އެޖެންޑާކޮށްފައިވާ ޖަލްސާ ކެންސަލްކޮށްފިއެވެ.
ކޮވިޑް-19 ގެ ހާލަތު ގޯސްވުމާ ގުޅިގެން މަޖިލީހުގެ ޖަލްސާތައް މިހާރު ކުރިޔަށް ގެންދަނީ އޮންލައިންކޮށެވެ. ޖަލްސާ ބޭއްވުމަށް އެޖެންޑާކޮށްފައިވަނީ ހޯމަ ދުވަހުގެ 10 ޖަހާއިރަށެވެ. ޖަލްސާ ކެންސަލްވި ކަން ހާމަކޮށް މަޖިލީހުގެ އިދާރާއިން ބުނެފައިވަނީ ޓެކްނިކަލް މައްސަލައެއް ދިމާވެ މައްސަލަ ހައްލުކުރަން ވަގުތު ނަގާނެކަމަށް ބެލެވޭތީ ޖަލްސާ ކެންސަލްކޮށްފައިވާ ކަމަށެވެ.
ހޯމަ ދުވަހުގެ ޖަލްސާއަށް އެޖެންޑާކޮށްފައިވަނީ މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެޖްނޮލޮޖީގެ މަގާމުގައި ހުންނެވި އާމިނަތު ޝައުނާއަށް ރުހުންދިނުމުގެ މައްސަލައިގެ އިތުރުން ދެ ބިލެއްގެ އިބްތިދާއީ ބަހުސެވެ. އެއީ ސަރުކާރުގެ ފަރާތުން، މަތިވެރި ދާއިރާގެ މެމްބަރު ހަސަން ޒަރީރު ހުށަހަޅުއްވާފައިވާ، ދިވެހިރާއްޖޭގެ ފަނޑިޔާރުންގެ ގާނޫނަށް އިސްލާހުގެނައުމުގެ ބިލްގެ ބަހުސްގެ އިތުރުން މިދިޔަ ހަފްތާގެ ބުދަ ދުވަހުގެ ޖަަލްސާއަށް ހުށަހަޅާ ބަހުސްކުރަމުން ގޮސްފައިވާ އާމްދަނީން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލްގެ ބަހުސްއެވެ.
މިހާރު ހިނގަމުންދަނީ މިއަހަރުގެ ދެވަނަ ދައުރުގެ ޖަލްސާތަކެވެ. ދެވަނަ ދައުރު މިމަހުގެ ނިޔަލަށް ކުރިޔަށްދާނެއެވެ.
