"ޓޫރިޒަމް ޑައިވަރސިފިކޭޝަން އެންޑް ލޯކަލައިޒޭޝަން" ޕްރޮޖެކްޓްގެ ދަށުން ޓޫރިޒަމް މިނިސްޓްރީން އިސްނަގައިގެން ބާއްވަމުންދާ މަޝްވަރާ ބައްދަލަވުންތަކުގެ ދަށުން ހދ. އަދި ށ. އަތޮޅުގެ ކައުންސިލަރުންނާއި މަޖިލިސް މެމްބަރުންނާ ބައްދަލުކޮށްފިއެވެ.
ވަރޗުއަލްކޮށް ކުރިއަށް ގެންދާ މި ބައްދަލުވުންތަކުގެ ތެރެއިން ހދ. އަތޮޅުގެ ކައުންސިލަރުންނާއި މަޖިލިސް މެމްބަރުންނާ އެކު ބައްދަލުވުން ބާއްވާފައި ވަނީ ޖޫން ފަސް ވަނަ ދުވަހުއެވެ. އަދި ހަމަ އެދުވަހު ށ. އަތޮޅުގެ ކައުންސިލަރުންނާއި މަޖިލިސް މެމްބަރުންނާ އެކު ވަނީ ބައްދަލުވުން ބާއްވާފައެވެ.
މި ބައްދަލުވުންތަކުގައި ޓޫރިޒަމް މިނިސްޓަރ ޑރ. އަބްދުﷲ މައުސޫމް އާއި އެ މިނިސްޓްރީގެ އިސްފަރާތްތަކުން ބައިވެރިވެވަޑައިގަންނަވައެވެ. މި ބައްދަލުވުންތަކުގައި މައިގަނޑުގޮތެއްގައި މަޝްވަރާކުރެވިގެން ދަނީ ރަށު ފަތުރުވެރިކަން ކުރިއަރުވައި ހިންގުމަށް ބޭނުންވާ ފަންނީ އެހީތެރިކަން ފޯރުކޮށްދިނުމާއި ފަތުރުވެރިކަމުގެ ސިނާއަތް ކުރިއަރުވައި ފަތުރުވެރިކަމުން ރަށްރަށުގެ ރައްޔިތުންނަށް ފައިދާ ހޯދައިދިނުމަށް ކައުންސިލްތަކާ އެކު މިނިސްޓްރީއަށް މަސައްކަތްކުރެވޭނެ ގޮތްތަކެވެ. އަދި ސީދާ ގޮތުންނާއި ނުސީދާގޮތުން ފަތުރުވެފަތުުރުވެރިކަމުގެ ފައިދާ ރައްޔިތުންނަށް ލިބޭނެ ގޮތަކަށް ރަށު ފަތުރުވެރިކަން ތަރައްގީކުރުމާ ގުޅޭގޮތުން މި ބައްދަލުވުންތަކުގައި މަޝްވަރާކުރެއެވެ.
އޭގެ އިތުރުން ސްޓްރެޓެޖިކް އެކްޝަން ޕްލޭންގައި ފަތުރުވެރިކަމަށް ކަނޑައަޅާފައިވާ ހަ ސިޔާސަތުގެ ދަށުން ކައުންސިލްތަކާ ގުޅުންހުރި އެކިއެކި ފަތުރުވެރިކަމުގެ ހަރަކާތްތަކުގެ މައުލޫމާތު ބައްދަލުވުމުގެ ބައިވެރިންނާއި ހިއްސާކުރުމާއި ފަތުރުވެރިކަމުގެ ގާނޫނާއި ރާއްޖޭގެ އިދާރީ ދާއިރާތައް ލާމަރުކަޒުކުރުމަށް ގެނެވުުނު އިސްލާހުތަކާއެކު ފަތުރުވެރިކަމާ ގުޅޭ މަސައްކަތްތަކުގައި މިނިސްޓްރީ އާއި ކައުންސިލްތަކާ ގުޅިގެން ކުރެވޭނެ މަސައްކަތްތަކަށް އަލިއަޅުވާލައެވެ. އަދި ސީދާ ކައުންސިލްތަކުން ކުރާނެ މަސައްކަތްތަކުގެ ތެރެއިން މީހުން ދިރިއުޅޭ ރަށްރަށުގައި ފަތުރުވެރިކަމަށް ދޫކުރެވޭ ބިމުގެ ބީލަމުގެ މަސައްކަތްތަކުގެ ވާހަކަ އާއި އެ އަތޮޅުގެ ފަތުރުވެރިކަމުގެ ސިނާއަތުގެ އަޕްޑޭޓެއް ބައްދަލުވުމުގެ ބައިވެރިންނާ ހިއްސާކުރެއެވެ.
ޓޫރިޒަމް ޑައިވާސިފިކޭޝަން އެންޑް ލޯކަލައިޒޭޝަން ޕްރޮޖެކްޓުގެ މަސައްކަތް ކުރިއަށް ގެންދިއުމަށް މިކަމަށް ހާއްސަ ޔުނިޓެއް ގާއިމުކޮށް އެ ޔުނިޓުން ވަކިވަކި އަތޮޅުތަކުގެ ލޯކަލް ޓޫރިޒަމް ފުޅާކުރުމާ ގުޅޭގޮތުން މަޝްވަރާކުރުމަށް ހާއްސަ ބައްދަލުވުންތަކެއް ބާއްވަމުންދާ އިރު، މިއީރާއްޖޭގެ ފަތުރުވެރިކަމުގެ ސިޔާސަތުގެ ދަށުން ރަށްރަށުގައި ފަތުރުވެރިކަން ފުޅާކުރުމަށް މިނިސްޓްރީން ކުރަމުންދާ މަސައްކަތެކެވެ.
