ގްރޭޓަރ މާލޭ ކަނެކްޓިވިޓީ ބްރިޖުން ގުޅާލައި ގުޅީފަޅުން ބިންހިއްކަން ތައްޔާރުވެއްޖެއެވެ.

އެމްޓީސީސީން ބުނީ މި މަސައްކަތް ފެށުމަށް ޖޫން މަހުގެ 2 ވަނަ ދުވަހު ޕްރޮޖެކްޓް ސައިޓް މޮބިލައިޒްކޮށްފައިވާ ކަމަށެވެ. މި މަޝްރޫޢަކީ 8.94 މިލިއަން ރުފިޔާގެ މަޝްރޫޢެކެވެ. އަދި މި މަޝްރޫޢު ނިންމުމަށް ހަމަޖެހިފައިވަނީ 55 ދުވަސްތެރޭގައެވެ. 80،000 ކިއުބިކް މީޓަރުގެ ސަރަޙައްދެއްގެ ބިން ހިއްކައި، 380 މީޓަރުގެ ސަރަޙައްދެއްގައި ގޮނޑުދޮށް ހިމާޔަތް ކުރުމުގެ މަސައްކަތް ކުރުމަށް ވަނީ ނިންމާފައެވެ. ގުޅީފަޅު ބިންހިއްކައި، ނިމި ގްރޭޓަރ މާލޭ ކަނެކްޓިވިޓީ ބްރިޖުން ގުޅާލައި މިކަން ހަޤީޤަތަކަށްވުމުން މާލޭ ރައްޔިތުންނަށް 1200 ބިން ދޫކުރަން މަސައްކަތް ކުރަމުން ގެންދަވާ ކަމަށް ޕްލޭނިންގ އެންޑް ހައުސިންގ މިނިސްޓަރު މުހައްމަދު އަސްލަމް މިދިޔަ އަހަރު ވަނީ ވިދާޅުވެފައެވެ.

ގްރޭޓަރ މާލޭ ކަނެކްޓިވިޓީ ބްރިޖް މަޝްރޫޢުގެ ދަށުން މާލެ-ވިލިމާލެ-ގުޅިފަޅު އަދި ތިލަފުށި ގުޅާލުމަށްވަނީ ނިންމާފައެވެ. މިމަސައްކަތުގެ ޢަމަލީ މަސައްކަތް ފެށުމުގެ ކުރިން ހަދަންޖެހޭ ސަރވޭއާއި، ބްރިޖްގެ ކުރެހުންތައް ފައިނަލްކުރުމުގެ މަސައްކަތްތައް މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރއިންދަނީ ކުރަމުންނެވެ. އަދި ބްރިޖްގެ ޢަމަލީ މަސައްކަތް ކުރާނެ ބަޔަކު ހޯދުމުގެ މަސައްކަތް ވެސް ވަނީ ފަށާފައެވެ. މިޕްރޮޖެކްޓާއެކު ގްރޭޓަރ މާލެ ސަރަޙައްދުން އެންމެ ބޮޑު ބަދަލެއް އަންނާނީ ގުޅިފަޅަށެވެ. ބޯހިޔާވަހިކަމުގެ މަޝްރޫޢުތަކާއެކު، ވިޔަފާރީގެ ގޮތުންވެސް ގުޅިފަޅުވެގެންދާނީ ސަރަޙައްދުގެ އިޤްތިޞާދީ މައި ހަބަށެވެ. މިބޮޑު މަންޒަރު ގުޅެނީ ގްރޭޓަރ މާލެ ކަނެކްވިޓީ ބްރިޖް މަޝްރޫޢާއެވެ. ގުޅިފަޅާއި ބްރިޖް ގުޅާލާ ސަރަޙައްދު ހިމެނޭހެން 6 މިލިއަން ކިއުބިކް މީޓަރުގެ ސަރަޙައްދެއް ހިއްކުމުގެ މަސައްކަތް ނެދަލޭންޑްސްގެ ބޮސްކާލިސް ކުންފުންޏާ ހަވާލުކޮށްގެންވަނީ ކުރިއަށްގެންގޮސްފައެވެ.

ގުޅިފަޅު ތަރައްޤީކުރުމުގެ އެންމެ ބޮޑު މަޤްސަދަކީ މާލޭގެ ވިޔަފާރި ބަނދަރު ގުޅިފަޅަށް ބަދަލުކުރުމެވެ. މި މަސައްކަތް ކުރިއަށްގެންދިއުމަށް މިއަހަރުގެ ބަޖެޓުގައި 400 މިލިއަނަށްވުރެ ގިނަ ރުފިޔާ ހިމަނާފައިވެއެވެ. ސަރުކާރުގެ ޢަމާޒަކީ ޖާގައިގެ ގޮތުން ތަނަވަސް ޒަމާނީ، އަދި ބައިނަލްއަޤްވާމީ ވިޔަފާރި ބަނދަރެއްގެގޮތުގައި މިބަނދަރު ހެދުމެވެ. އަދި މާލޭގައި މި ޚިދުމަތް ދިނުމަށް އޮތް ދަތިތަކަށް ހައްލެއް ހޯދައިދިނުމެވެ. ޓްރާންޝިޕްމަންޓް ބަނދަރުގެ މަސައްކަތް ނިމުމުން ބަނދަރު ހިންގުމުގެ މަސައްކަތް ހަވާލުކުރާނީ މިހާރުވެސް މާލެ ވިޔަފާރި ބަނދަރު ހިންގަމުން އަންނަ މޯލްޑިވްސް ޕޯޓްސް ލިމިޓެޑްއާއެވެ. ގުޅީފަޅުގައި ބައިނަލްއަގުވާމީ ވިޔަފާރި ބަނދަރެއް އެޅުމުގެ މަޝްރޫއަކީ މާލޭގެ ބަނދަރުތަކުގެ ޖާގައިގެ ދަތިކަމުގެ ސަބަބުން ޚިދުމަތް ހޯދާ މީހުންނަށް ދިމާވާ ދަތިތައް ހައްލު ކުރުމަށްޓަކައި ކުރިއަށް ގެންދިޔުމަށް ހަމަޖެހިފައިވާ ޕްރޮޖެކްޓެކެވެ. މިގޮތުން، ސަރުކާރުން ނިންމާފައިވަނީ 2023 ވަނަ އަހަރު ގުޅީފަޅު ޕޯރޓް ހުޅުވުމުން އެ ސަރަހައްދަށް މާލޭ ކޮމާރޝަލް ހާބާ، ނޯތު ހާބާ، އަދި ޓީ ޖެޓީ ސަރަހައްދުގެ ބައެއް ހިދުމަތްތަކާއި މަސައްކަތްތައް ބަދަލު ކުރުމަށެވެ. މި ޕްރޮޖެކްޓާއެކު މާލޭގެ ބަނދަރުގެ ތޮއްޖެހުމުގެ މައްސަލައަށް ބޮޑު ޙައްލެއް ލިބޭނެއެވެ. އަދި ވިޔަފާރިވެރިންނަށް ވެސް އަވަސް ޚިދުމަތާއެކު އޭގެ ފަސޭހަތައް ލިބޭނެއެވެ.

ގުޅީފަޅު ތަރައްގީވަމުން އަންނައިރު އެތަނުގައި ރޭސް ޖެހޭނެ އިންތިޒާމް ހަމަޖެއްސުމަށް މަސައްކަތް ކުރަމުން އަންނަކަމަށް ޔޫތް މިނިސްޓަރ އަހުމަދު މަހުލޫފް ވަނީ ވިދާޅުވެފައެވެ. ރާއްޖޭގައި ވެސް ރޭސިން ކުރިއެރުވުމަށް އެކިއިރު އެކި މަސައްކަތްކޮށްފައިވާކަން ފާހަގަކޮށްލެވެއެވެ. އެގޮތުން މިދިޔަ ސަރުކާރުންވަނީ ހުޅުމާލޭގައި ރޭސިން ޓްރެކެއް ހެދުމާއި ބެހޭގޮތުން ވާހަކަދައްކާފައެވެ. އެހެންނަމަވެސް، މި މަސައްކަތް ކުރިއަށްދާގޮތެއް ނުވިއެވެ.