މި ދަނޑިވަޅުގައި ވެސް ރާއްޖެއިން ރައްކާތެރި ފަތުރުވެރިކަމެއް ހިންގައި، ދުނިޔެއަށް މިސާލުދައްކައިފި - މައުސޫމް
ސަރުކާރުން އަމާޒު ހިފާފައިވަނީ މި ދަތި ދަނޑިވަޅުގައިވެސް ދިވެހި ރައްޔިތުންނާއި ދަތުރުވެރިންގެ ރައްކާތެރިކަން ކަށަވަރުކޮށް އިޤްތިޞާދު ހުއްޓުނަނުދީ ހިންގުމަށް
މިނިސްޓަރ މައުސޫމް މާފުއްޓަށް ޒިޔާރަތްކުރި ފުރަތަމަ ފަތުރުވެރިޔާއަށް މަރުހަބާކިޔުމުގެ ތެރެއިން
ކޮވިޑްގައި ރާއްޖެ ކުރިމަތިލި އެންމެ ނުރައްކާތެރި ރާޅާއި މިހާރު ކުރިމަތިލަމުންދާއިރު ވެސް، ރާއްޖެއިން ރައްކާތެރި ފަތުރުވެރިކަމެއް ހިންގައި، ދުނިޔެއަށް މިސާލުދައްކައިފިކަމަށް މިނިސްޓަރ އޮފް ޓޫރިޒަމް ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން މިނިސްޓަރ މައުސޫމް ވަނީ ކޮވިޑްގެ ހަތަރުވަނަ ރާޅާއެކު އަސަރުކުރީ ލޯ ސީޒަންގެ އަމާޒަށްކަމަށާއި، އަހަރުގެ ޓާގެޓްތައް އަދިވެސް ހާސިލުވާނެކަމުގެ ޔަޤީންކަން އެބައޮތްކަމަށް ވިދާޅުވެފައެވެ. މިނިސްޓަރ މައުސޫމް ވަނީ ފަތުރުވެރިކަމަކީ ރާއްޖޭއަށް އެންމެ ގިނައިން އާމްދަނީ ވަންނަ މަގުކަމުގައިވާއިރު، ސަރުކާރުން އަމާޒު ހިފާފައިވަނީ މި ދަތި ދަނޑިވަޅުގައި ވެސް ދިވެހި ރައްޔިތުންނާއި ދަތުރުވެރިންގެ ރައްކާތެރިކަން ކަށަވަރުކޮށް އިޤްތިޞާދު ހުއްޓުނަ ނުދީ ހިންގުމަށްކަމަށެވެ. މި އަމާޒުގެ ދަށުން ކުރި މަސައްކަތުން މިއަދުވެސް ރާއްޖެއަކީ ރައްކާތެރި ފަތުރުވެރިކަމުގެ މަންޒިލެއްގެ ގޮތުގައި ބަލައިގެންފައިވާކަމަށް ވިދާޅުވިއެވެ.
މިހާރުގެ ޙާލަތު އޮތްގޮތުން ބޯޑަރު ބަންދުކުރާނެތޯ ސުވާލުކުރުމުން މިނިސްޓަރ ވަނީ މިދިޔަ އަހަރާ ޚިލާފަށް މިއަހަރު ރާއްޖެއަށް ވެކްސިން ލިބި ގިނަ ބަޔަކު ވެކްސިން ޖަހާފައިވާކަމަށް ވިދާޅުވެފައެވެ. މިކަމުގައި ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުން މިސާލުދައްކަވާފައިވާކަމަށް ވިދާޅުވެ މިނިސްޓަރ ވަނީ މިއަދާ ހަމައަށް އައިރު މި ސިނާއަތުގެ 95 އިންސައްތައަށްވުރެ ގިނަ މަސައްކަތްތެރިން ވެކްސިންގެ ފުރަތަމަ ޑޯޒް ފުރިހަމަކޮށްފައިވާކަމަށް ވިދާޅުވެފައެވެ. ހާޑް އިމިއުނިޓީއަކާ ދިމާލަށް ދިއުމަށް ސިނާއަތުގެ 70 އިންސައްތަ މަސައްކަތްތެރިންނަށް ދެ ޑޯޒް ފުރިހަމަކުރަންޖެހޭއިރު، މިހާރު މި އަމާޒާ ވަރަށް ކައިރިވެ ދެ ޑޯޒް ފުރިހަމަކުރި މުއައްޒަފުންގެ އަދަދު އުޅެނީ 66 އިންސައްތައިގައި ކަމަށް މިނިސްޓަރ ވިދާޅުވިއެވެ. ދުނިޔޭގެ އެހެން ޤައުމުތަކުން އަޅަމުންދާ ފިޔަވަޅުތަކާއި ސަރަހައްދުގެ ކޮވިޑްގެ ޙާލަތައް ބަލައި، އަޅަން ޖެހުނު ކޮންމެ ފިޔަވަޅެއް އަޅަންވެސް ސަރުކާރު އަދިވެސް ފަސްނުޖެހޭނެ ކަމަށް މިނިސްޓަރ މައުސޫމް ވިދާޅުވިއެވެ. މިނިސްޓަރ މައުސޫމް ވަނީ ކޮވިޑްގެ ޙާލަތު ރާއްޖޭގައި އެންމެ ގޯސްވި މެއި މަހުވެސް، މި ސިނާޢތް ހުއްޓުމަކަށް ނައިސް 64،613 ފަތުރުވެރިން އެ މަހުގައި ގެނެވުމަކީ ވެސް ކާމިޔާބީއެއްގެ ގޮތުގައި ސިފަކުރައްވާފައެވެ.
ޓޫރިޒަމް މިނިސްޓަރ މައުސޫމް ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަރުކާރުން ފަތުރުވެރިކަމުގެ ނަފާ ރައްޔިތުންނަށް ހޯދައިދީ، ފަތުރުވެރިކަމަކީ ރައްޔިތުންގެ އެއްޗަކަށް ހަދައިދޭނެކަމުގެ ޔަޤީންކަން އަނެއްކާވެސް އަރުވާފައެވެ. މިނިސްޓަރ މައުސޫމް ވިދާޅުވީ، ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙްގެ ޓޫރިޒަމް ސިޔާސަތުގެ އެންމެ މުހިންމު ބައެއްގެ ގޮތުގައި އޮތީ ފަތުރުވެރިކަން ރައްޔިތުންނާ ހަމައަށް ގެންގޮސް ރައްޔިތުންނަށް އޭގެ ފައިދާ ހޯދައިދިނުންކަމަށެވެ. މިނިސްޓަރ ވިދާޅުވީ، މިކަން ހާސިލްކުރުމަށްޓަކައި ޓޫރިޒަމް ލޯކަލައިޒޭޝަނާއި ޑައިވަރސިފިކޭޝަނާބެހޭ ޔުނިޓެއް ޤާއިމްކޮށްފައިކަމަށެވެ.
މީގެ އިތުރުން ސަރުކާރުން އަމާޒު ހިފާފައިވަނީ ޒަމާނުއްސުރެ ރާއްޖެއަށް ފަތުރުވެރިން އެންމެ ގިނައިން އަންނަ ގައުމުތަކުން ފަތުރުވެރިން ރާއްޖެއަށް އަންނަކަން ކަށަވަރުކޮށް، އައު މާކެޓްތަކުގައި ވެސް ރާއްޖޭގެ ފަތުރުވެރިކަމުގެ މަޤުބޫލުކަން އިތުރުކުރުންކަމަށެވެ. މި އަމާޒުގެ ދަށުން މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން، އެމް.އެމް.ޕީ.އާރް.ސީގެ އިސްނެގުމާއެކު ދާއިރާގެ ސްޓޭކް ހޯލްޑަރުން ގިނަ މަސައްކަތްތަކެއް ކުރަމުންދާކަމަށެވެ. އެގޮތުން މިހާލަތުގައި ވެސް ވާޗުއަލް ފެއާތަކާއި ރޯޑް ޝޯތަކުގައި ބައިވެރިވަމުންދާއިރު، ލިބޭ ކޮންމެ ފުރުސަތެއްގައި އެހެން ޤައުމުތަކަށް ގޮސްގެން ވެސް ރާއްޖެ އިސްތިހާރުކުރަމުންދާކަމަށެވެ.
