މި ސަރުކާރު ދެމިއޮތުމަށް ތާއީދުކުރާ އެކަކުވެސް ނަފުރަތުގެ ބިލަށް ތާއީދެއް ނުކުރާނެ: ޖޭޕީ
މި އިސްލާހާ ގުޅޭ ގޮތުން ސަރުކާރު ކޯލިޝަންގައި ހިމެނޭ އަދާލަތު ޕާޓީން ވެސް ވަނީ ކަންބޮޑުވުން ފާޅުކޮށްފައި
ޖޭޕީގެ ލީޑަރ ގާސިމް އިބްރާހިމް | ރައްޔިތުންގެ މަޖިލިސް
މުސްލިމަކާ ދިމާއަށް އާންމު ތަނެއްގައި ކާފަރެއް ކަމަށް ބުނުމަކީ ޖިނާއީ ކުށެއް ކަމުގައި ކަނޑައަޅަން ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލު އޮތް ގޮތަށް ފާސްކޮށް، ގާނޫނަކަށް ވެއްޖެ ނަމަ ރާއްޖޭގައި ފިތުނަ ފަސާދަތައް އިތުރަށް ބޮޑުވާނެ ކަމަށާއި މި ސަރުކާރު ދެމިއޮންނަން ތާއީދު ކުރާ އެކަކު ވެސް މިހާރު އެ ބިލް އޮތް މަފްހޫމުގައި އެ ފާސްކުރަން ތާއީދު ނުކުރާނެ ކަމަށް ޖުމްހޫރީ ޕާޓީ (ޖޭޕީ) ން ބުނެފިއެވެ.
ސަރުކާރުގެ ކޯލިޝަނުގައިވެސް ހިމެނޭ ޖޭޕީން އެބިލަށް ތާއީދުނުކުރާކަން ހާމަކޮށް އެޕާޓީން ނެރެފައިވާ ބަޔާނެއްގައި ބުނެފައިވަނީ މުސްލިމަކާ ދިމާލަށް ކާފަރެކޭ ބުނުމަކީ އިސްލާމް ދީން ހުއްދަ ކުރާ ކަމެއް ނޫންކަމަށެވެ. ނަމަވެސް މުސްލިމަކަށް ވަނީ އޭނާ ކިޔާ ނަމަކުން ނޫންކަމަށާއި އިސްލާމް ދީނުގައި ކަނޑައަޅާފައިވާ ހުރިހާ ކަމަކަށް ފުރިހަމައަށް ތަބާވުމުން ކަމަށެވެ.
އަދި ތިމާއަކީ މުސްލިމެއްކަމަށް ބުނެ އިސްލާމް ދީނަށް ފުރައްސާރަކޮށް ހަދާނަމަ އެމީހަކާ ދިމާލަށް އެމީހަކީ އިސްލާމް ދީނާ ދެކޮޅު ލާދީނީ މީހެކޭ ބުނާނެކަމަށް ޖޭޕީގެ ބަޔާނުގައި ބުނެފައިވެއެވެ. އަދި އެއީ ފާސްކުރާ ގާނޫނަކުން މަނާކުރެވޭނެ ކަމެއްވެސް ނޫންކަަމަށް ޖޭޕީގެ ބަޔާނުގައި ބުނެފައިވެއެވެ.
ޖޭޕީން ނެރުނު ބަޔާނުގައި ބުނީ މަޖިލީހަށް އެ ބިލު ހުށަހަޅާފައި އޮތް ގޮތަށް ފާސްކޮށް، ރައީސް އިބްރާހިމް މުހައްމަދު ސާލިހު އެ ބިލު ތަސްދީގު ކުރައްވައިފިނަމަ މަޖިލީހާއި އެނޫން ވެސް ތަންތަނުގައި ރަސޫލާއަށް ފުރައްސާރަކޮށް، އިސްލާމްދީނާ ދެކޮޅަށް ފާޅުގައި ވާހަކަ ދައްކާ މީހުންނަށް ގާނޫނީ ދޮރެއް ހުޅުވޭނެ ކަމަށެވެ.
ޖޭޕީން ބުނިގޮތުގައި އެ ބިލު މިހާރު އޮތް ގޮތަށް ފާސް ކުރަން މެންބަރަކު ވޯޓު ދެއްވުމަކީ އެ މެންބަރުން ކުރައްވާފައިފާ ހުވައާ ވެސް ޚިލާފުވުމެވެ. އަދި މި ސަރުކާރު ދެމިއޮތުމަށް ތާއީދުކުރާ އެކަކުވެސް އެބިލު ގާނޫނަކަށް ހަދަން ތާއީދެއް ނުކުރާނެ ކަމަށް ޖޭޕީން ބުންޏެވެ.
އިސްލާމްދީނާ ދެކޮޅަށް ވާހަކަދައްކާ މީހުންނަށް އަޅާ ފިޔަވަޅުތައް ގާނޫނުތަކުގައި ބުނެދީފައިވީ ނަމަވެސް އެއްވެސް ސަރުކާރަކުން އެފަދަ މީހަކާ މެދު ތަހުގީގެއް ހިންގާ ފިޔަވަޅު އަޅާފައިވޭތޯ ޖުމްހޫރީ ޕާޓީން ސުވާލު އުފެއްދިއެވެ. އަދި މިފަދަ ގާނޫނެއް ހަދައިފިނަމަ ދީނާ ދެކޮޅަށް ވާހަކަ ދައްކާ މީހުންނަށް އެއްވެސް ފިޔަވަޅެއް ނާޅައި ދޫކޮށްލުމުގެ ފުރުސަތު އޮންނާނެ ކަމަށާއި ދިވެހި މުޖުތަމައު ފިތުނަވެ، ފަސާދަވުން ނޫން ގޮތެއް ނުވާނެ ކަމަށް ޖޭޕީން ބުންޏެވެ.
ސަރުކާރު ފަރާތުން ގާނޫނުލްއުގޫބާތަށް މި އިސްލާހު ހުށަހަޅާފައި ވަނީ ތުޅާދޫ ދާއިރާގެ އެމްޑީޕީގެ މެމްބަރު ހިސާން ހުސެއިން އެވެ. ނަފްރަތުގެ އަމަލު ހިންގުމަކީ ކުށެއް ކަމުގައި ގާނޫނުލްއުގޫބާތުގައި ކަނޑައަޅާފައިވާ މި ބިލުގައިވާ ގޮތުން އާންމު ތަނެއްގައި ވަކި މީހަކީ އިސްލާމް ދީނާ ޚިލާފަށް އުޅޭ މީހެއް ނުވަތަ މުސްލިމަކު، ކާފަރެއް ގޮތުގައި ސިފަކުރުމާއި އެކަމުގައި ބައިވެރިވުމަކީ ޖިނާއީ ކުށެވެ.
ގާނޫނުލްއުގޫބާތަށް ގެންނަން ހުށަހަޅާފައިވާ މި އިސްލާހާ ގުޅޭ ގޮތުން ސަރުކާރު ކޯލިޝަނުގައި ހިމެނޭ އަދާލަތު ޕާޓީން ވެސް ވަނީ ކަންބޮޑުވުން ފާޅުކޮށްފައެވެ.
