ހުޅުމާލެ ފޭސް 1އިން ފޭސް 2އަށް ކަރަންޓު ނެޓްވޯކް ގުޅުމުގެ މަސައްކަތް ނިންމާލައިފިއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން ސްޓެލްކޯގެ މެނޭޖިންގް ޑިރެކްޓަރ ހަސަން މުޣުނީ ވިދާޅުވީ، ސްޓެލްކޯއިން ނެޓްވޯކް އަޅާނީ ފޭސް 1ގެ އިންޖީނުގެއިން ފޭސް 2އަށް އެކަނި ކަމަށެވެ. އަދި އެތެރޭގެ ކޭބަލްތައް އަޅައި ސްޓެލްކޯގެ ނެޓްވޯކާ ގުޅާލާނީ ފޭސް ދޭއްގެ ކަރަންޓު ނެޓްވޯކް އެޅުމަށް ހަވާލުކުރި ޗައިނާގެ ސީއެމްއީސީ ކުންފުނިން ކަމަށް މުޣުނީ ވިދާޅުވިއެވެ.
ފޭސް 2ގެ ކަރަންޓު ނެޓްވޯކް އެޅުމަށް ކުރީގެ ރައީސް ޔާމީންގެ ސަރުކާރުގައި ބޭރު ގައުމެއްގެ ކުންފުންޏަކާ ހަވާލުކޮށްފައިވަނީ ސްޓެލްކޯއިންވެސް މިކަމަށް ބިޑްކޮށްފައި ވަނިކޮށްކަން މުޣުނީ ފާހަގަކުރެއްވިއެވެ.
ހުޅުމާލެ ފޭސް 1އިން ފޭސް 2އަށް ކަރަންޓު ނެޓްވޯކް ގުޅާ ނިމިފައި ވަނީ. އެތަން ސާފުކުރަނީ މިހާރު އިނގޭތޯ.ހަސަން މުޣުނީ / ސްޓެލްކޯގެ މެނޭޖިންގް ޑިރެކްޓަރ
ސަރުކާރުން ވަނީ ހުޅުމާލެ ދެވަނަ ފިޔަވަހީގައި، ފުރަތަމަ ފިޔަވައްސެކޭ އެއްގޮތަށް 50 މެގަވޯޓްގެ އިންޖީނުގެއެއް އެޅުމަށް ރާވާފައެވެ.
ހުޅުމާލެ ދެ ވަނަ ފިޔަވަހީގައި ބޮޑު އާބާދީއެއް ދިރިއުޅުމަށް އިމާރާތްތައް ކުރަން ފެށިއިރު، އެއާއެކު ފޯރުކޮށްދޭންޖެހޭ އެހެން ޚިދުމަތްތައް ފޯރުކޮށްދިނުމުގެ މަސައްކަތް އޭރުގެ ސަރުކާރުން ފަށާފައެއް ނުވެއެވެ. ދެ ވަނަ ފިޔަވަހީގައި ސުކޫލެއްވެސް ނެތްއިރު، ސުކޫލެއް އިމާރަތްކުރުމަށް އެޑިއުކޭޝަން މިނިސްޓްރީން ވަނީ ކުންފުންޏަކާ ހަވާލުކޮށްފަ އެވެ. އޭގެއިތުރުން ބަސް ސްޓޮޕްތަކާއި، އެހެނިހެން ހިދުމަތްތައް ލިބޭނެ އިންތިޒާމް އެޗްޑީސީން އަންނަނީ ހަމަޖައްސަމުންނެވެ.
