ކެނެޑާއިން ރާއްޖެއަށް ވެކްސިން ހަދިޔާކުރަނީ
ރާއްޖޭގެ އިތުރުން ސްރިލަންކާއަށް ވެސް ކެނެޑާއިން ވެކްސިން ފޯރުކޮށްދޭނެ
ކެނެޑާއިން ކޮވެކްސް މެދުވެރިކޮށް ރާއްޖެއަަށް ވެކްސިން ފޯރުކޮށްދޭނެ
ކެނެޑާއިން ރާއްޖެއަށް ކޮވިޑް-19އިން ދިފާއުވުމަށް ވެކްސިން ހަދިޔާކުރުމަށް ނިންމައިފިއެވެ.
ކޮވިޑް19އިން ދިފާއުވުމަށް އެކި ގައުމުތަކަށް އެހީތެރިކަން ފޯރުކޮށްދިނުމަށް ހިންގާ ޕްރޮގްރާމްގެ ދަށުން، ކެނެޑާއިން ވެކްސިން ފޮނުވާ ގައުމުތަކުގެ ލިސްޓުގައި ރާއްޖެ މިވަނީ ހިމެނިފައެވެ.
ކެނެޑާއިން ރާއްޖެއާ ސްރިލަންކާއަށް ކަނޑައަޅުއްވާފައި ހުންނަވާ ސަފީރު ޑޭވިޑް މެކިނަން، ވަނީ މިކަން އިއުލާން ކުރައްވައި ޓްވީޓް ކުރައްވާފައެވެ. ކެނެޑާގެ އެހީ ރާއްޖެއަށް ދެނީ، ކުދި އަދި ތަރައްގީވަމުން އަންނަ ގައުމުތަކަށް ފަސޭހައިން ވެކްސިން ފޯރުކޮށްދިނުމަށް ޑަބްލިއުއެޗްއޯ އިން އެކުލަވައިލައިފައިވާ ކޮވެކްސް ފެސިލިޓީ މެދުވެރިކޮށެވެ. މިކަމަށްޓަކައި ކޮވެކްސްއާއެކު ބުރާސްފަތި ދުވަހު ވަނީ އެއްބަސްވެފައެވެ.
ރާއްޖޭގެ އިތުރުން ސްރީލަންކާއަށް ވެސް ވެކްސިން ފޯރުކޮށްދިނުމަށް ކެނެޑާއިން ވަނީ ނިންމާފައެވެ.
މިކަމަށް 220 މިލިއަން ޑޮލަރު ކެނެޑާއިން ޚަރަދު ކުރެއެވެ.
އެމެރިކާއިން ވެކްސިން ފޯރުކޮށްދޭ ގައުމުތަކުގެ ތެރޭގައިވެސް ރާއްޖެ ހިމެނެއެވެ. ކޮވިޑް19އިން ރައްކާތެރިވުމަށް އެމެރިކާއިން ރާއްޖެއަށް ދިން އެހީގެ ޝިޕްމެންޓް މިއަދު ވަނީ ރާއްޖެއައިސްފައެވެ.
