ޕީޕީއީއާއި އަދި ފެސިލިޓީގައި ބޭނުންވާ އެހެނިހެން ސިއްހީ ސާމާނު އެމެރިކާއިން ހަދިޔާކޮށްފި
4 ޖޫން 2021 | ހުކުރު 14:50އެ ގައުމުން ވަނީ މީގެ ކުރިން ވެސް ކޮވިޑް-19ގެ ހާލަތާއި ގުޅިގެން ރާއްޖެއަށް ސިއްހީ ސާމާނު ހަދިޔާކޮށްފައި
އެމެރިކާއިން ރާއްޖެއަށް ސިއްހީ ސާމާނު ހަދިޔާކުރުން
ފްރަންޓްލައިން މުވައްޒަފުން ބޭނުންކުރާ ޕީޕީއީ ކިޓްތަކާއި ކޮވިޑް-19އަށް ފަރުވާކުރުމުގައި ބޭނުންކުރާ ބައެއް އެހެނިހެން ސިއްހީ ސާމާނު އެމެރިކާއިން ރާއްޖެއަށް ހަދިޔާކޮށްފިއެވެ.
އެމެރިކާއިން ހުކުރު ދުވަހު ރާއްޖެއަށް ފޮނުވި ސާމާނުގެ ތެރޭގައި ހިމެނެނީ 32،000 k95 މާސްކާއި، 4،000 ގޮގްލްއާއި، 256،000 މެޑިކަލް އަންގީގެ އިތުރުން، 600 ފިންގަރޓިޕް ޕަލްސް އޮކްސިމީޓަރެވެ.
އެމެރިކާއިން މިތަކެތި ހަދިޔާކޮށްފައިވާއިރު އެ ގައުމުން ވަނީ މީގެ ކުރިން ވެސް ކޮވިޑް-19ގެ ހާލަތާއި ގުޅިގެން ރާއްޖެއަށް ސިއްހީ ސާމާނު ހަދިޔާކޮށްފައެވެ. އެގޮތުން އޭރު ވަނީ (ރާއްޖޭގެ އެކި ހިސާބުތަކުގައި ތިބި މެޑިކަލް ފެސިލިޓީތައް ވެސް ހިމެނޭގޮތުން) 60 ވެންޓިލޭޓަރު ހަދިޔާކޮށްފައެވެ. މީގެ އިތުރަށް 796 ޑޮކްޓަރުންނާއި ނަރުހުން ކޮވިޑް-19 ކޮންޓްރޯލްއަށް ޓްރެއިން ކުރުމުގެ އިތުރުން، 191 ސިއްހީ މުވައްޒަފުން ވެންޓިލޭޓަރަށް އަހުލުވެރިކޮށް ޓްރެއިންކޮށްފައިވެއެވެ.
މީގެ އިތުރުން ކޮވިޑް-19އާ ގުޅިގެން އާންމުން ހޭލުންތެރިކުރުމުގެ ޕްރޮގްރާމްތަކުގައި އެހީތެރިވުމާއި، ރާއްޖޭގެ އިކޮނޮމީ މެނޭޖްކުރާނެ ގޮތްތަކާ ގުޅޭގޮތުން ސަރުކާރަށް ލަފާއާއި މަޝްވަރާ ދީފައިވާނެ ކަމަށް ވެސް އެ ގައުމުން ބުނެފައިވެއެވެ.
އަދި ކޮވެކްސް ފެސިލިޓީ މެދުވެރިކޮށް ކޮވިޑް-19 ވެކްސިންގެ 113،850 ޑޯޒު ހިލޭ ރާއްޖެއަށް ދިނުމަށް ވެސް މަސައްކަތް ފަށާފައިވާނެ ކަމަށާއި، ކޮވެކްސް އިން ރާއްޖެއަށް ލިބޭ ވެކްސިންގެ ތެރެއިން ފުރަތަމަ 17,850 ޑޯޒު މިދިޔަ މާޗް މަހުގެ ތެރޭގައި ރާއްޖެއަށް ފޮނުވާފައި ވާނކަން ވެސް ފާހަގަކޮށްފައިވެއެވެ.
