އައްސޭރި ޖަލަށް ވެއްދުމަށްޓަކައި ޕޮޓުކޮއްފައިވާ މަސްތުވާތަކެއްޗާއި މޯބައިލް ފޯނުތަކެއް ހޯދައިފި
4 ޖޫން 2021 | ހުކުރު 08:05މި ތަކެތި ހޯދާފައިވަނީ ބުރާސްފަތި ދުވަހުގެ ރޭ ލިބުނު މައުލޫމާތަކާ ގުޅިގެން
އައްސޭރި ޖަލުން ހޯދުނު ތަކެތި
އައްސޭރި ޖަލަށް ވެއްދުމަށްޓަކައި ޕޮޓުކޮއްފައިވާ މަސްތުވާތަކެއްޗާއި މޯބައިލް ފޯނުތަކެއް އެޖަލުގެ އޮފިސަރުން ހޯދާފައިވާ ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.
ކޮމިޝަނަރ އޮފް ޕްރިޒަންސް ވިދާޅުވީ މި ތަކެތި ހޯދާފައިވަނީ ބުރާސްފަތި ދުވަހުގެ ރޭ ލިބުނު މައުލޫމާތަކާ ގުޅިގެން އައްސޭރި ޖަލުގެ އޮފިސަރުން ހިންގި އޮޕަރޭޝަނެއްގައި ކަމަށެވެ. އަދި މި ތަކެތި މިހާރު ފުލުހުންނާ ހަވާލު ކުރެވިފައިވާ ކަމަށް ވެސް ބުނެއެވެ.
ޖަލުތަކުގައި ހިންގާ މިފަދަ ޚާއްސަ އޮޕަރޭޝަންތަކުގައި ގައިދީން ޖަލަށް ވެއްދުމަށް މަސައްކަތް ކުރަމުންދާ އަދި ޖަލަށް ވައްދާފައިވާ މިފަދަ ތަކެތި ދަނީ ފުލުހުންގެ ބެލުމުގެ ދަށަށް ގެންނަމުންނެވެ.
ކަރެކްޝަނުން އާންމުކޮށްފައިވާ އެންމެ ފަހުގެ ތަފާސްހިސަބުތައް ދައްކާ ގޮތުން މި އަހަރުގެ އޭޕްރީލް މަހުވެސް ޖަލުތަކުގައި ހިންގުނު އޮޕަރޭޝަންތަކުގައި ބައެއް ތަކެތި ފުލުހުންގެ ބެލުމުގެ ދަށަށް ގެނަސްފައިވެއެވެ. އެގޮތުން މާފުށީ ޖަލުން 9 ފޯނާއި 3 ސިމްކާޑުގެ އިތުރުން ހަތަރު ޗާޖަރު ހޯދާފައިވެއެވެ. އަދި އައްސޭރި ޖަލުން 2 ފޯނާއި 1 ޗާޖަރުގެ އިތުރުން 1 ކޭބަލް ވަނީ ހޯދާފައެވެ.
