ރާއްޖޭގެ ފަތުރުވެރިކަމުގެ ހަބަކަށް ހއ. އަތޮޅު ވެގެންދާނެ ކަމަށް މިނިސްޓަރ ވިދާޅުވެއްޖެ

ހއ. އަތޮޅުގެ ކައުންސިލްތަކާ ބައްދަލުކޮށް ރާއްޖޭގެ ފަތުރުވެރިކަމުގެ ހަބަކަށް އެ އަތޮޅު ވެގެންދާނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

މިނިސްޓަރ މައުސޫމް މިހެން ވިދާޅުވީ ސަރުކާރުގެ ސްޓްރެޓެޖިކް ޕްލޭންގައި އެކުލަވާލާފައިވާ ފަތުރުވެރިކަމުގެ ސިޔާސަތުގެ ތެރޭގައި ހިމެނޭ "ޓޫރިޒަމް ޑައިވަރސިފިކޭޝަން އެންޑް ލޯކަލައިޒޭޝަން" ޕްރޮޖެކްޓްގެ ދަށުން ރަށްރަށުގައި ފަތުރުވެރިކަން ފުޅާކުރުމާ ބެހޭގޮތުން ހއ. އަތޮޅުގެ ކައުންސިލްތަކާ ބައްދަލުކޮށް ވާހަކަދައްކަވަމުންނެވެ. އެގޮތުން މިނިސްޓަރ ވަނީ މި ބައްދަލުވުމުގައި ރަށު ފަތުރުވެރިކަން ކުރިއަރުވައި ހިންގުމަށް ބޭނުންވާ ފަންނީ އެހީތެރިކަން މިނިސްޓްރީން ފޯރުކޮށްދެއްވާނެ ކަމުގެ ޔަގީންކަން ވެސް އަނެއްކާވެސް ދެއްވާފައެވެ. އަދި ފަތުރުވެރިކަމުގެ ސިނާއަތް ކުރިއަރުވައި ފަތުރުވެރިކަމުން ރަށްރަށުގެ ރައްޔިތުންނަށް ފައިދާ ހޯދައިދިނުމަށް ކައުންސިލްތަކާ އެކު މަސައްކަތްކުރާނެ ކަމަށާއި ސީދާ ގޮތުންނާއި ނުސީދާގޮތުން ފަތުރުވެފަތުުރުވެރިކަމުގެ ހަބެއްގެ ގޮތުގައި ހއ. އަތޮޅު ތަރައްގީވެގެން އަންނާނެ ކަމަށް މިނިސްޓަރ ވަނީ ވިދާޅުވެފައެވެ.

މިބައްދަލުވުމުގައި މިނިސްޓަރގެ އިތުރުން ޓޫރިޒަމް މިނިސްޓްރީގެ ސީނިއަރ އެގްޒެކިއުޓިވް ޑިރެކްޓަރ ރައްޒާން އަދި ޑިރެކްޓަރ ޝިނާން ވަނީ ބައްދަލުވުގެ ބައިވެރިންނަށް ޕްރެޒެންޓޭޝަނެް ހުށަހަޅައިދީ ސްޓްރެޓެޖިކް އެކްޝަން ޕްލޭންގައި ފަތުރުވެރިކަމަށް ކަނޑައަޅާފައިވާ ހަ ސިޔާސަތުގެ ދަށުން ކައުންސިލްތަކާ ގުޅުންހުރި އެކިއެކި ފަތުރުވެރިކަމުގެ ހަރަކާތްތަކުގެ މައުލޫމާތު ހިއްސާކުރައްވާފައެވެ. އަދި ފަތުރުވެރިކަމުގެ ގާނޫނާއި ރާއްޖޭގެ އިދާރީ ދާއިރަތައް ލާމަރުކަޒުކުރުމަށް ގެނެވުުނު އިސްލާހުތަކާއެކު ފަތުރުވެރިކަމާ ގުޅޭ މަސައްކަތްތަކުގައި މިނިސްޓްރީ އާއި ކައުންސިލްތަކާ ގުޅިގެން ކުރެވޭނެ މަސައްކަތްތަކަށް ވަނީ އަލިއަޅުވާލާފައެވެ. އަދި ސީދާ ކައުންސިލްތަކުން ކުރާނެ މަސައްކަތްތަކުގެ ތެރެއިން މީހުން ދިރިއުޅޭ ރަށްރަށުގައި ފަތުރުވެރިކަމަށް ދޫކުރެވޭ ބިމުގެ ބީލަމުގެ މަސައްކަތްތަކުގެ ވާހަކަ ވަނީ ދައްކަވާފައެވެ. އަދި މިނިސްޓްރީގެ ޕްލޭނިން އޮފިސަރ އަބްދުﷲ އިޔާޒް ވަނީ ހއ. ގެ ފަތުރުވެރިކަމުގެ ސިނާއަތުގެ އަޕްޑޭޓެއް ބައްދަލުވުމުގެ ބައިވެރިންނާ ހިއްސާކުރައްވާފައެވެ.

އޮންލައިންކޮށް ކުރިއަށް ގެންދެވުނު މިބައްދަލުވުމުގައި ވާހަކަދައްކަވަމުން ހއ. އަތޮޅުގެ ރައީސް، މޫސާ ޝާފީގު ވަނީ އެއަތޮޅުގައި އައު ރިސޯތްތައް ހުޅުވި، ޓޫރިޒަމް ޑައިވާސިފިކޭޝަން ޕްރޮޖެކްޓްގެ މަސައްކަތްތަކާ އެކު ލޯކަލް ޓޫރިޒަމް ފުޅާވެ، ހޯމް ސްޓޭ ވިޔަފާރި އާއި ގެސްޓް ހައުސް، ހޮޓާތައް ހުޅުވި ރައްޔިތުންނަށް ފަތުރުވެރިކަމުގެ ފައިދާ މިހާރަށްވުރެ ބޮޑަށް ލިބެންފަށާނެ ކަމަށް ވިދާޅުވެފައެވެ. ބައްދަލުވުމުގައި ބައިވެރިވި ހއ. އަތޮޅުގެ މަޖިލިސް މެމްބަރުން ވަނީ ހއ. ގެ ފަތުރުވެރިކަން ފުޅާކުރުމަށް މެމްބަރުންގެ ފުރިހަމަ އެއްބާރުލުން ލިބޭނެ ކަމަށާއި މަޖިޅިލީހުން ނިންމަންޖެހޭ ކަންތައްތައް ނިންމުމުގައި އަތޮޅުގެ ފަސް މެމްބަރުން ގުޅިގެން މަސައްކަތްކުރާނެ ކަަމަށް ވިދާޅުވެފައެވެ.

ޓޫރިޒަމް ޑައިވާސިފިކޭޝަން އެންޑް ލޯކަލައިޒޭޝަން ޕްރޮޖެކްޓުގެ މަސައްކަތް ކުރިއަށް ގެންދިއުމަށް މިކަމަށް ހާއްސަ ޔުނިޓެއް ގާއިމްކޮށް އެ ޔުނިޓުން މިވަނީ ވަކިވަކި އަތޮޅުތަކުގެ ލޯކަލް ޓޫރިޒަމް ފުޅާކުރުމާ ގުޅޭގޮތުން މަޝްވަރާކުރުމަށް ހާއްސަ ބައްދަލުވުންތަކެއް ބާއްވަން ފަށާފައެވެ. އެގޮތުން ޖޫން ދެ ވަނަ ދުވަހު ހއ. އަތޮޅުގެ ކައުންސިލަރުންނާއި މަޖިލިސް މެމްބަރުންނާއި އެކު ކުރިއަށްގެންދެވުނު މި ބައްދަލުވުމަކީ މި ސިލްސިލާގެ ފުރަތަމަ ބައްދަލުވުމެވެ.