ހުޅުމާލޭގައި ބައިސްކަލް ކުއްޔަށް ދިނުމުގެ މަޝްރޫއެއް ކުރިއަށް ގެންދަނީ
3 ޖޫން 2021 | ބުރާސްފަތި 07:23ހުޅުމާލޭގެ އެކި ސަރަހައްދުތަކަށް ބަހާލައިގެން ޕާކިންގ ޑޮކްސް އަދި ޑިޖިޓަލް ޕޭމަންޓް ހެދޭނެ ވަސީލަތްތައް ޤާއިމުކުރެވޭނެ
ހުޅުމާލޭގައި ސިޓީ ބައިކް ރެންޓަލް ޕްރޮޖެކްޓެއް ކުރިއަށް ގެންދިޔުން، މި މަޝްރޫއު ފަށަނީ 300 ބައިސްކަލާއެކު
ހުޅުމާލޭގައި ސިޓީ ބައިކް ޕްރޮޖެކްޓް ގެ ނަމުގައި ބައިސްކަލް ކުއްޔަށް ދިނުމުގެ މަޝްރޫއެއް ހިންގުމަށްޓަކައި ބޭންކް އޮފް މޯލްޑިވްސް (ބީ.އެމް.އެލް) އާއި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އާ ދެމެދު ފަހުމުނާމާގައި ސޮއިކޮށްފިއެވެ.
މި މަޝްރޫއަކީ ބައިނަލްއަޤުވާމީ ބައިސްކަލު ދުވަހުގެ މުނާސަބާތާ ގުޅުވައިގެން އިފްތިތާޙު ކުރެވުނު މަޝްރޫއެކެވެ. މި މަޝްރޫއުގެ ދަށުން ހުޅުމާލޭގައި ދިރިއުޅޭ ރައްޔިތުންނަށާއި ހުޅުމާލެއަށް އެކި ބޭނުންތަކަށް ޒިޔާރަތް ކުރާ ފަރާތްތަކަށް ހެޔޮ އަގެއްގައި ބައިސްކަލު ކުއްޔަށް ނެގުމުގެ މަގު ފަހިވެގެންދާނެ ކަމަށް އެޗްޑީސީން ބުނެއެވެ.
ޖުމްލަ 300 ބައިސްކަލާ އެކު ފެށުމަށް ހަމަޖެހިފައިވާ މި މަޝްރޫއުގެ ދަށުން ހުޅުމާލޭގެ އެކި ސަރަހައްދުތަކަށް ބަހާލައިގެން ޕާކިންގ ޑޮކްސް އަދި ޑިޖިޓަލް ޕޭމަންޓް ހެދޭނެ ވަސީލަތްތައް ޤާއިމުކުރުމަށް ވަނީ ހަމަޖެހިފައެވެ. މީ އެޗްޑީސީއާ ގުޅިގެން ބޭންކް އޮފް މޯލްޑިވްސްއިން ފަންޑުކޮށްގެން ކުރިއަށް ގެންދިއުމަށް ހަމަޖެހިފައިވާ މަޝްރޫއުއެކެވެ.
މި މަޝްރޫއާ ގުޅޭގޮތުން އެޗްޑީސީގެ މެނޭޖިންގ ޑިރެކްޓަރ ވިދާޅުވީ, މި މަސައްކަތަކީ ރާއްޖޭގެ ނާޒުކު ތިމާވެށި ރައްކާތެރިކޮށް ދެމެހެއްޓުމަށް ކުރެވެމުންދާ މަސައްކަތުގައި އެޅުނު އިތުރު މުހިއްމު ފިޔަވަޅެއްކަމަށެވެ. އަދި މި ޚިދުމަތުގެ ސަބަބުން ހުޅުމާލޭގެ ރައްޔިތުންނަށް ގިނަ ފަސޭހަތަކެއް ލިބިގެންދާނެ ކަމަށް އުއްމީދު ކުރައްވާކަމަށް ވިދާޅުވިއެވެ.
ހުޅުމާލެއަކީ ސާފު އަދި ދިރިއުޅުމަށް ހިތްފަސޭހަ ތަނަކަށް ހެދުމަށް އެޗްޑީސީގެ ފަރާތުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ރައްޔިތުންނާ ވީހާވެސް ގާތުން ޚިދުމަތްތައް ފޯރުކޮށްދީ، ގަވައިދުން ހުޅުމާލޭގެ އެކި ސަރަހައްދުތައް ސާފުކޮށް ބެލެހެއްޓުމަށް ކުރެވެމުންދާ މަސައްކަތްތައް ފާހަގަކޮށްލެވެއެވެ.
