މައުރޫފް އަޙްމަދު: ޔޫރޯގެ މަރުގެ ގްރޫޕުގެ އެނަލިސްޓް
އެ ގްރޫޕުގައި ހިމެނެނީ ޕޯޗުގަލް، ފްރާންސް، ޖަރުމަން އަދި ހަންގޭރީ
މައިލޯ ޔޫރޯ ފޯރި 2021 - ގްރޫޕް އެފް އިންސާފުކުރާނީ މައުރޫފް އަޙްމަދު
މި މަހުގެ 11 ވަނަ ދުވަހު "ޔޫރޯ 2020" ފަށާއިރު، ރާއްޖެޓީވީން ގެނެސްދޭ "މައިލޯ ޔޫރޯ ފޯރި 2021" ގައި ހަރަކާތްތެރިވާ އެއް އެނަލިސްޓަކީ ސްޕޯޓްސް ކޯޕަރޭޝަނުގެ މެނޭޖިން ޑިރެކްޓަރު އަދި ރާއްޖޭގައި އުފެދުނު އެންމެ މޮޅު އެއް ގޯލްކީޕަރު މައުރޫފް އަޙްމަދު (މާއްޓޭ) އެވެ. މީގެ ކުރިންވެސް އެނަލިސްޓެއްގެ ގޮތުގައި ބޮޑެތި މުބާރާތްތަކުގައި ހަރަކާތްތެރިވި މާއްޓޭއަކީ ބެލުންތެރިންގެ އިތުބާރު ލިބިފައިވާ އެނަލިސްޓެކެވެ.
އެނަލިސްޓެއްގެ ގޮތުގައި މާއްޓޭ ހަރަކާތްތެރިވާއިރު، އޭނާ އިންސާފުކުރުމަށް ހަމަޖެހިފައިވަނީ ގްރޫޕް "އެފް" އެވެ. މި އަހަރު ބާއްވާ ޔޫރޯގައި އެންމެ ފާހަގަކޮށްލެވޭ ގްރޫޕަކީވެސް އެ ގްރޫޕެވެ. އެގޮތުން މަރުގެ ގްރޫޕުގެ ގޮތުގައި ގްރޫޕް "އެފް" ފާހަގަކޮށްލެވޭއިރު، އެ ގްރޫޕުގައި ހިމެނެނީ އެންމެ ފަހުގެ ޗެމްޕިއަން ޕޯޗުގަލާއި، ދުނިޔޭގެ ޗެމްޕިއަން ފްރާންސާއި، ޖަރުމަނުގެ އިތުރުން ޕްލޭއޮފުން ޖާގަ ހޯދި ހަންގޭރީއެވެ. އެ ގްރޫޕުގެ މެޗުތައް ކުޅޭނީ ހަންގޭރީގެ ބުޑަޕެސްޓާއި ޖަރުމަނުގެ މިއުނިކުގައެވެ.
މަރުގެ ގްރޫޕް އިންސާފުކުރަން ލިބުމާއެކު އެކަމާ ހިތްހަމަޖެހުން ފާޅުކޮށް މާއްޓޭ ވިދާޅުވީ އެ ގްރޫޕުގައި ވާދަކުރާ ފްރާންސް، ޕޯޗުގަލް އަދި ޖަރުމަނުގެ ކުޅުންތެރިންނަކީ ދިވެހީންނަށް ފަރިތަ ކުޅުންތެރިންތަކެއް ކަމަށެވެ. އަދި ހަންގޭރީއަކީވެސް ރަނގަޅު ފައިޓެއްދޭނެ ގައުމެއް ކަމަށް މާއްޓޭ ވިދާޅުވިއެވެ.
މާއްޓޭ ވިދާޅުވީ އެ ގްރޫޕުން ދެވަނަ ބުރަށް ދެވޭނެ ގައުމެއް ގޮތުގައި ބަލަނީ ފްރާންސް ކަމަށާއި، އެގޮތުން ފްރާންސްގެ ކުޅުންތެރިން ޔޫރަޕުގެ މުބާރާތްތަކުގައި ވަރަށް ރަނގަޅަށް ކުޅެފައިވާ ކަމަށެވެ. އަދި މި ވަގުތު ފްރާންސްގެ ކުޅުންތެރިން ތިބީ ވަރަށް ފޯމުގައި ކަމަށްވެސް ވިދާޅުވިއެވެ. މީގެ އިތުރުން އެ ގްރޫޕުގައި ދެން ހިމެނޭ ޖަރުމަނާއި ޕޯޗުގަލަކީވެސް ދެވަނަ ބުރަށް ދަތުރުކޮށް، ތަށި ނެގޭނެ ފެންވަރުގެ ގައުމުތައް ކަމަށްވެސް ވިދާޅުވިއެވެ.
މި އަހަރު ބޭއްވުމަށް ހަމަޖެހިފައިވާ ޔޫރޯގެ ރާއްޖޭގެ އެކްސްކްލޫސިވް މީޑިއާ ޕާޓްނަރުކަން ރާއްޖެޓީވީން ވަނީ ނަގާފައެވެ. މާއްޓޭ ވިދާޅުވީ ރާއްޖޭގެ އެންމެ ބޮޑު ކަވަރޭޖެއް ނަގަމުން އަންނަނީ ރާއްޖެޓީވީން ކަމަށާއި، މިކަހަލަ މުހިންމު މުބާރާތެއް ރާއްޖެޓީވީން ދެއްކުން އެއީ ދިވެހި ރައްޔިތުންނަށް އޭގެ ފައިދާ ލިބޭނެ ކަމެއް ކަމަށެވެ.
އަދި ވިދާޅުވީ ދުނިޔޭގެ ލީގުތައް ބަލާ ދިވެހީން އަންނަނީ އިތުރުވަމުން ކަމަށާއި، އެގޮތުން ދިވެހީން އާންމުކޮށް ބަލާ އުޅެނީ ޔޫރަޕުގެ ވަރުގަދަ ލީގުތައް ކަމަށެވެ. އަދި ޔޫރޯއަކީ ފީފާ ވޯލްޑް ކަޕް ނެގުމަށްފަހު، ދުނިޔޭގައި ބާއްވާ އެންމެ ބޮޑު މުބާރާތް ކަމަށާއި، އެގޮތުން ފައިސާގެ ގޮތުންވެސް ޔޫރޯއަކީ ވޯލްޑް ކަޕަށް ދޫނުކުރާ ވަރުގެ މުބާރާތެއް ކަމަށްވެސް ވިދާޅުވިއެވެ.
