މަޖިލިސް ގޮއްވާލަން ބުނި މީހާގެ ބަންދަށް 15 ދުވަސް
2 ޖޫން 2021 | ބުދަ 14:50"ތި މަޖިލިސް ގޮއްވާލަންވީ" ކަމަށް ބުނެ އަލާން ވަނީ މަޖިލިސް ލައިވްއަށް ކޮމެންޓް ކޮށްފައި
މަޖިލީހުގެ ޖަލްސާއެއްގެ ތެރެއިން
ރައްޔިތުންގެ މަޖިލިސް ގޮއްވާލަންވީ ކަމަށް ބުނި ކޮމެންޓްކުރި މީހާގެ ބަންދަށް 15 ދުވަސް ޖަހައިފިއެވެ.
ޓެރަރިޒަމްގެ ތުހުމަތުގައި އަންގާރަ ދުވަހުގެރޭ ހައްޔަރު ކުރި ހަސަން އަލާން އަލީ (28އ).ގެ ބަންދަށް ގޮތެއް ނިންމުމަށް ބުދަ ދުވަހު ކްރިމިނަލް ކޯޓުގައި ކުރިއަށް ގެންދިޔަ ބަންދުގެ މަޖިލީހުގައި ގާޒީ އާދަމް މުހައްމަދު ވަނީ، އޭނާ ހިންގާފައިވާ އަމަލަކީ މުޖުތަމައުއަށް ނުރައްކާވާ ފަދަ ކަމެއް ކަމާއި، އަދި އެއީ އެކަމުން މުޅި މުޖުތަމައުއަށް ނޭދެވޭ އަސަރު ކުރާނެ ކަމެއްކަމަށް ވިދާޅުވެފައެވެ.
ފުލުހުން ބުނެފައިވަނީ އަލާންގެ ކޮމެންޓަކީ ޓެރަރިޒަމަށް ހިތްވަރު ދިނުމުގެ އަމަލެއް ކަމަށާއި، އޭނާގެ އެ ކޮމެންޓަކީ ފުލުހުން ސީރިއަސް މައްސަލައެއްގެ ގޮތުގައި ބަލަމުންދާ މައްސަލައެއް ކަމަށެވެ. އެ ކޮމެންޓް ކޮށްފައިވާ ދަނޑިވަޅަކީ ރައްޔިތުންގެ މަޖިލީހުގެ ރައީސަށް އަމާޒުކޮށް ޓެރަރިޒަމްގެ ހަމަލާއެއް ދީފައިވާ ދުވަސްވަރެއް ކަމުން، މައްސަލައިގެ ސީރިއަސްކަން ބޮޑުވާ ކަމަށް ފުލުހުން ބުނެފައިވެެއެވެ. އޭނާގެ މައްޗަށް މިހާތަނަށް ހެކީގެ ގޮތުގައި ހުށަހަޅާފައިވަނީ އޭނާ ކޮށްފައިވާ ކޮމެންޓްގެ ސްކްރީންޝޮޓާއި، އޭނާގެ އެކައުންޓްތަކުގެ ސްކްރީންޝޮޓްގެ އިތުރުން އިންޓެލް ރިޕޯޓެކެވެ. އަދި އޭނާ ދިރިއުޅުނު އެޕާޓްމެންޓް ބަލާފާސްކޮށް، ދެ ފޯނާއި ދެ ހާޑް ޑްރައިވް، އަދި ޕެން ޑްރައިވެއްވެސް ފުލުހުންވަނީ ހޯދާފައެވެ.
ބަންދާމެދު ގޮތެއް ނިންމުމަށް ބޭއްވި މަޖިލީހުގައި، އަލާންގެ ވަކީލު ބުނެފައިވަނީ، ފޭސްބުކް އެކައުންޓަކީ ކޮންމެ މީހަކަސްވެސް ހެދިދާނެ އެއްޗެއްކަމާއި، އެއީ އޭނާގެ ކޮމެންޓެއްކަން ޔަގީން ނުކުރެވޭނެ ކަމަށެވެ. އަދި އެކަމާ ގުޅިގެން ނުރައްކާތެރި ކަމެއް ހިނގާފައިވެސް ނެތް ކަމަށެވެ.
ފުލުހުން ބުނީ، ޓެރަރިޒަމާ ގުޅޭ އެފަދަ މައްސަލަތައް ފުލުހުން ބަލަމުންދާނީ ވަރަށް ސީރިއަސް މައްސަލަތަކެއް ގޮތުގައި ކަމަށާއި، ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރާނެ ކަމަށެވެ.
ރައްޔިތުންގެ މަޖިލީހަށް ނުރައްކަލެއް އޮތްކަމަށް ލިބުނު މައުލޫމާތާ ގުޅިގެން، މަޖިލިސް އިމާރާތާއި އަދި އިމާރާތުގެ ވަށައިގެންވާ ސަރަހައްދުގެ ސެކިޔުރިޓީވެސް އެމްއެންޑީއެފުން އިތުރު ކުރިއެވެ.
އަލާން ހައްޔަރު ކޮށްފައިވަނީ، މަޖިލީހުގެ ޖަލްސާއެއް ކުރިއަށްދަނިކޮށް، ރާއްޖެޓީވީގެ ފޭސްބުކް ލައިވަށް "ތި މަޖިލިސް ގޮއްވާލަންވީ" ކަމަށް ބުނެ ކޮށްފައިވާ ކޮމެންޓަކާ ގުޅިގެން،ފުލުހުން ހިންގި ތަހުގީގުގައެވެ.
