"މައިލޯ ޔޫރޯ ފޯރި 2021" ޝޯގައި ބައިވެރިވާ އެނަލިސްޓުންނާއެކު އެއްބަސްވުމުގައި ސޮއިކޮށްފިއެވެ.
މި އަހަރު ބޭއްވުމަށް ހަމަޖެހިފައިވާ "ޔޫރޯ 2020" ގެ ރާއްޖޭގެ އެކްސްކްލޫސިވް މީޑިއާ ޕާޓްނަރުކަން ރާއްޖެޓީވީން ނަގާފައިވާއިރު، ރާއްޖެޓީވީން ގެނެސްދޭ ކަވަރޭޖުގައި ތަޖުރިބާކާރު އެނަލިސްޓުން ހަރަކާތްތެރިވާނެއެވެ.
އެ އެނެލިސްޓުންނަކީ ތަޖުރިބާކާރު ކޯޗު އަދި މި ވަގުތު ރާއްޖޭގެ ފުރަތަމަ ޑިވިޝަނުގައި ވާދަކުރަމުން އަންނަ ސުޕަ ޔުނައިޓެޑް ސްޕޯޓްސް (ސަސް) އާ ހަވާލުވެހުރި މުޙައްމަދު ޝިޔާޒް (މޯހަން) އާއި، ޔުނައިޓެޑް ވިކްޓަރީ (ޔޫވީ) ގެ ކޯޗު އިހުސާން އަބްދުލް ޣަނީ (ސާންތި) އާއި، ކުރީގެ މަޝްހޫރު ގޯލްކީޕަރު އިސްމާޢީލް ޒަރިޔަންދު އާއި، ޓީސީ ސްޕޯޓްސް ކުލަބުގެ ކޯޗު މުޙައްމަދު ނިޒާމް (ނިޒާމްބެ) އަދި ސްޕޯޓްސް ކޯޕަރޭޝަނުގެ މެނޭޖިން ޑިރެކްޓަރު އަދި ރާއްޖޭގައި އުފެދުނު އެންމެ މޮޅު އެއް ގޯލްކީޕަރު މައުރޫފް އަޙްމަދު (މާއްޓޭ) ގެ އިތުރުން ތަޖުރިބާކާރު ނޫސްވެރިޔާ އަދި ކުޅިވަރު އެނަލިސްޓެއްގެ ގޮތުގައި ރާއްޖޭގައި ފާހަގަކޮށްލެވޭ އިމާދު ލަތީފެވެ.
ބުދަ ދުވަހު ބޭއްވި ރަސްމިއްޔާތެއްގައި މި އެނެލިސްޓުންނާއެކު ރާއްޖެޓީވީން ވަނީ އެއްބަސްވުމުގައި ސޮއިކޮށްފައެވެ. މި ރަސްމިއްޔާތަށްފަހު ވާހަކަ ދައްކަމުން ރާއްޖެޓީވީގެ ޑެޕިއުޓީ ޗީފް އޮޕަރޭޓިން އޮފިސަރު ނާޒުމީ ސައީދު ވިދާޅުވީ ޔޫރޯ ފޯރީގެ ކަވަރޭޖުގައި ބައިވެރިވެވަޑައިގަންނަވާ އެނަލިސްޓުންނަކީ ރާއްޖޭގައި މި ވަގުތު ތިބި އެންމެ ތަޖުރިބާކާރު އެނަލިސްޓުން ކަމަށެވެ. އަދި ވިދާޅުވީ ރާއްޖޭގެ ގިނަ ރައްޔިތުންނަކީ ފުޓްބޯޅައަށް ސަޕޯޓުކުރާ ރައްޔިތުން ކަމަށާއި، އެހެންކަމުން ކުރިއަށް ޔޫރޯއަށް ތަޖުރިބާކާރު އެނަލިސްޓުންނާއެކު ވަރަށް ފުރިހަމަ ކަވަރޭޖެއް ގެނެސްދިނުމަށް މަސައްކަތްކުރައްވާނެ ކަމަށެވެ.
ރާއްޖެޓީވީގެ ހެޑް އޮފް ސްޕޯޓްސް ހުސައިން ފަރިޔާޒް ވަނީ މި ކަވަރޭޖުގައި ބައިވެރިވާ އެނަލިސްޓުންނަށް ޝުކުރުއަދާކުރައްވާފައެވެ. ފަރިޔާޒް ވިދާޅުވީ މިއަހަރުގެ ޝޯ ހާއްސަކުރާނީ ހަމައެކަނި އެނަލިސްޓުންނާއެކު ނޫން ކަމަށާއި، އެގޮތުން މި ޝޯގައި ބައިވެރިވުމަށް ގިނަ އަދަދެއްގެ ހާއްސަ މެހުމާނުންނަށްވެސް ދައުވަތު ދީފައިވާ ކަމަށެވެ. އަދި މި އަހަރުގެ ޔޫރޯ ރާއްޖެޓީވީން ގެނަސްދޭނީ 2016 ވަނަ އަހަރުގެ ޔޫރޯގައި ލިބުނު ތަޖުރިބާގެ އަލީގައި، އެއަށްވުރެ ފުރިހަމަކޮށް ކަމަށްވެސް ވަނީ ވިދާޅުވެފައެވެ.
ޔޫރަޕުގެ ގައުމުތަކުގެ ފުޓްބޯޅަ މުބާރާތް ކަމަށްވާ ޔޫރޯ 2020 މި މަހުގެ 11 ވަނަ ދުވަހު ފަށާނެއެވެ. މުޅިއެކު 24 ގައުމު ވާދަކުރާ މި މުބާރާތް ކުރިއަށްދާނީ ޖުލައި މަހުގެ 11 ވަނަ ދުވަހުގެ ނިޔަލަށެވެ. އަދި މި މުބާރާތުގައި ޖުމްލަ 51 މެޗު ކުޅޭއިރު، މި ހުރިހާ މެޗެއްވެސް ރާއްޖެޓީވީން ދައްކާނެއެވެ. އަދި މެޗުތަކުގެ ކުރިންނާއި މެދުތެރެއިންނާއި ފަހުންވެސް މެޗުތައް ދިރާސާކުރުމުގެ އެކި ޝޯތައްވެސް ރާއްޖެޓީވީން ގެނެސްދިނުމަށް ވަނީ ހަމަޖެހިފައެވެ. އަދި މެޗުތައް "ރާއްޖެ.އެމްވީ" އިން ލައިވް ސްޓްރީމް ކުރާނެއެވެ.
މި ފަހަރުގެ ޔޫރޯ ރާއްޖެޓީވީން ބްރޯޑްކާސްޓް ކުރާއިރު، 2016 ވަނަ އަހަރު ފްރާންސްގައި ބޭއްވި ޔޫރޯވެސް ރާއްޖެޓީވީން ވަނީ ބްރޯޑްކާސްޓް ކޮށްފައެވެ. އަދި އެ ފަހަރު ރާއްޖެޓީވީން ވަނީ ޔޫރޯގެ ވަރަށް ފުރިހަމަ ކަވަރޭޖެއް ގެނެސްދީފައެވެ.
