އޭއެފްސީ ކަޕުގެ ދެކުނު އޭޝިއާގެ ޓީމުތަކުގެ ގްރޫޕް ސްޓޭޖު މެޗުތައް އޮގަސްޓް މަހަށް ފަސްކުރަން އޭއެފްސީން ނިންމާފައިވާ ކަމަށް ރިޕޯޓުތައް ބުނެފިއެވެ.
މީގެ ކުރިން މި މުބާރާތުގެ ގްރޫޕް ޑީގެ މެޗުތައް ކުޅުމަށް ތާވަލުކޮށްފައިވަނީ މިދިޔަ މެއި މަހު ރާއްޖޭގައެވެ. އެގޮތުން އޭއެފްސީން މީގެ ކުރިން ތާވަލުކޮށްފައި އޮތީ މެއި މަހުގެ 11 ވަނަ ދުވަހު އޭއެފްސީ ކަޕުގެ ކޮލިފައިން ޕްލޭއޮފުގައި ރާއްޖޭގެ ކުލަބު އީގަލްސް އާއި އިންޑިއާގެ ބެންގަލޫރު އެފްސީ ބައްދަލުކުރާ ގޮތަށެވެ. އަދި އެ މެޗަށްފަހު މުބާރާތުގެ ދެކުނު އޭޝިއާ ގްރޫޕުގެ މެޗުތައް މެއި މަހުގެ 14 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް ރާއްޖޭގައި ބޭއްވުމަށްވެސް އޮތީ ތާވަލުކޮށްފައެވެ.
އެކަމަކު އޭއެފްސީ ކަޕުގެ މައްސަލަ ހޫނުވީ ޕްލޭއޮފް މެޗުގައި އީގަލްސްއާ ދެކޮޅަށް ކުޅެން މާލެއައި ބެންގަލޫރު ޓީމުން ކޮވިޑް-19 ގެ އުސޫލުތަކާ ޚިލާފުވުމުންނެވެ. އެ މައްސަލައިގައި އޭއެފްސީ ކަޕުގެ މެޗުތައް ރާއްޖޭގައި ނުބޭއްވޭނެކަން އެންގުމާއެކު، އޭއެފްސީން ވަނީ ޕްލޭއޮފް މެޗާއި ގްރޫޕް ޑީގެ މެޗުތައް މުއްދަތެއް ނެތް ގޮތަށް ފަސްކޮށްފައެވެ.
މީގެ ކުރިން ބައެއް މީޑިއާތަކުން ވަނީ ޕްލޭއޮފް މެޗާއި ގްރޫޕް ސްޓޭޖުގެ މެޗުތައް ޖޫން މަހުގެ ފަހު ކޮޅު ފެށުމަށް އޭއެފްސީން މަސައްކަތްކުރަމުން އަންނަ ކަމަށް ރިޕޯޓުކޮށްފައެވެ. އެކަމަކު އިންޑިއާގެ މީޑިއާ ރިޕޯޓުތައް ބުނާ ގޮތުން އޭއެފްސީން މިހާރު ތާވަލުކޮށްފައި އޮތީ ޖޫން މަހުގެ 27 ވަނަ ދުވަހު ކޮލިފައިން ޕްލޭއޮފުގައި އީގަލްސް އާއި ބެންގަލޫރު ބައްދަލުކުރާ މެޗު ކުޅުމަށެވެ. އަދި އެއަށްފަހު ގްރޫޕް ސްޓޭޖުގެ މެޗުތައް އޮގަސްޓް މަހުގެ 18 ވަނަ ދުވަހުން 24 ވަނަ ދުވަހުގެ ނިޔަލަށް ކުރިއަށްގެންދާން ނިންމާފައިވާ ކަމަށްވެސް ރިޕޯޓުތައް ބުނެއެވެ.
މީގެ ކުރިން ގްރޫޕް ސްޓޭޖުގެ މެޗުތައް ސެންޓްރަލައިޒް ކޮޑްގެން ރާއްޖޭގައި ކުޅުމަށް ނިންމި ނަމަވެސް، އޭއެފްސީން މިހާރު ވަނީ ގްރޫޕް ޑީގެ މެޗުތައް ހޯސްޓްކުރުން އަލުން ހުޅުވާލަން ނިންމާފައެވެ. އެއާއެކު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ މިހާރު ރާއްޖޭގެ ހާލަތު އޮތްގޮތުން މެޗުތައް ކުޅެން އަލުން ބިޑް ނުކުރަން ނިންމާފައިވާ ކަމަށް ބުނެފައެވެ. ރިޕޯޓުތައް ބުނާ ގޮތުން އޭއެފްސީން މުބާރާތް ބާއްވަން އަލުން ބިޑަށް ހުޅުވާލައިފިނަމަ، ބަންގްލަދޭޝް އާއި އިންޑިއާއިން އޮތީ މުބާރާތުގެ މެޗުތައް ބޭއްވުމަށް ބިޑްކުރަން ތައްޔާރަށެވެ.
ބެންގަލޫރުގެ މައްސަލައިގައި އޭއެފްސީ ކަޕުގެ މެޗުތައް ފަސްކުރިއިރު، މި މައްސަލައިގައި އެފްއޭއެމުން ވަނީ ބެންގަލޫރާ މެދު ފިޔަވަޅު އަޅައިދޭން އޭއެފްސީއަށް ހުށަހަޅާފައެވެ. އަދި ދާދި ފަހުން ރާއްޖެ ޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ބައްސާމް ވަނީ އޭއެފްސީ ކަޕް ފަސްކުރި މައްސަލައިގައި ރާއްޖެއަށް އަދަބެއް އައުން ގާތް ކަމަށް ވިދާޅުވެފައެވެ. އެގޮތުން މާޒީގައި ކަންތައްތައް ދިމާވެފައި ހުރި ގޮތަށް ބަލާއިރު، ރާއްޖެއަށް އޭއެފްސީން އަޅަން އޮތީ ދެ ފިޔަވަޅެއް ކަމަށާއި، އެއީ ޖޫރިމަނާ ކުރުން ނޫނީ އޭއެފްސީގެ މެޗުތައް ހޯސްޓްކުރުމުގެ ފުރުސަތު ވަކި މުއްދަތެއް ވަންދެން ރާއްޖެއަށް ނުދޭން ނިންމުން ކަމަށް ވެސް ބައްސާމް ވަނީ ވިދާޅުވެފައެވެ.
އޮގަސްޓް މަހު އޭއެފްސީ ކަޕުގެ ގްރޫޕް ސްޓޭޖު މެޗުތައް ކުޅޭއިރު، ގްރޫޕް ސްޓޭޖުގައި މި ވަގުތު އޮތީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނާއި، އިންޑިއާގެ މޯހަން ބަގާން އަދި ބަންގްލަދޭޝްގެ ބަޝުންދަރާ ކިންގްސްއެވެ.
