މިސްކިތުގައި ނަމާދުކުރެވޭނީ ހުއްދަ ލިބިގެން ބޭރުގައި އުޅޭ މީހުންނަށް އެކަނި
މިސްކިތްތަކުގައި ނަމާދުކުރުން މެދުކަނޑާލީ މިދިޔަ މަހުގެ 19 ވަނަ ދުވަހު
އިސްލާމިކް މިނިސްޓަރު ޑރ. އަހުމަދު ޒާހިރު އަލީ
މިސްކިތުގައި ނަމާދުކުރެވޭނީ ހުއްދަ ލިބިގެން ބޭރުގައި އުޅޭ މީހުންނަށް އެކަނިކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އިސްލާމިކް މިނިސްޓަރު ވިދާޅުވީ ކޮވިޑް-19އާ ގުޅިގެން މާލެ ސަރަހައްދުގައި މިސްކިތްތައް ބަންދުކުރަން ނިންމުމަށްފަހު 37 މިސްކިތެއްގައި ނަމާދު ކުރެވޭނެ އިންތިޒާމު އިސްލާމިކް މިނިސްޓްރީން ހަމަޖައްސަވާފައިވާކަމަށެވެ. އިސްލާމިކް މިނިސްޓަރު ވިދާޅުވީ ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ވައިރަސް، ރާއްޖޭގައި ހަލުވިކަމާއެކު ފެތުރެމުންދާތީ، މިހާރުގެ ޙާލަތަށް ރިޢާޔަތްކޮށް، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ރައްކާތެރިކަމުގެ މުހިންމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ ޢިލްމުވެރިންގެ ލަފާގެ މަތިން، މެއި 19ން ފެށިގެން މިސްކިތްތަކުގައި ޖަމާޢަތުގައި ނަމާދުކުރުން މެދުކަނޑާލެވުނު ކަމަށެވެ.
ނަމަވެސް ބައެއްފަރާތްތަކުން މިސްކިތްތަކުގައި ގައިދުރުކަމެއް ނެތި، ޖަމާޢަތް ހަދައިގެން ނަމާދުކުރަމުންދާތީ، އާންމު މަޞްލަޙަތަށް ރިޢާޔަތްކޮށް، ރައްކާތެރިކަމުގެ ފިޔަވަޅެއްގެ ގޮތުން މިސްކިތްތައް ބަންދު ކުރުމަށް ނިންމި ކަމަށާއި، މިސްކިތްތައް ބަންދުކުރަން ނިންމިކަމުގައި ވިއަސް ބައެއް ޢާންމު ފަރާތްތަކުން، ޚާއްޞަ ޙާލަތްތަކުގައި މިސްކިތްތައް ބޭނުން ކުރަމުންދާތީ، މާލެސަރަޙައްދުގައި ހިމެނޭ 40 މިސްކިތުގެ ތެރެއިން 37 މިސްކިތެއްގައި ނަމާދު ކުރުމާއި، ފާޚާނާކުރުމާއި، ވުޟޫ ކުރެވޭނެ އިންތިޒާމު މިހާރު ހަމަޖައްސާފައި ވާނެ ކަމަށެވެ. މިގޮތަށް ހުޅުވާލިކަމުގައިވިޔަސް މިސްކިތުގައި ނަމާދުކުރެވޭނީ ހުއްދަ ލިބިގެން ބޭރުގައި އުޅޭ މީހުންނަށް އެކަނިކަމަށް މިނިސްޓަރ ވިދާޅުވިއެވެ.
މިސްކިތްތައް އާންމުނަށް ހުޅުވާނުލިކަމުގައިވިޔަސް، މި ހާލަތުގައި ވެސް ފަރުޟު ފަސް ނަމާދު ބަރާބަރަށް އަދާކުރުމަށާއި، ސުންނަތް ނަމާދު ގިނަކޮށް، ކީރިތި ޤުރްއާން ކިޔަވައި، އިސްތިޣްފާރު ކުރުމަށާއި، މިބަލިމަޑުކަމުން އަވަހަށް ސަލާމަތް ކޮށްދެއްވުން އެދި ގިނަގިނައިންދުޢާކޮށް އުޅުމަށް ހުރިހާ ރައްޔިތުންނަށް އިސްލާމިކް މިނިސްޓަރ ނަސޭހަތްތެރިވިއެވެ، މީގެ އިތުރުން ކަމާގުޅޭ ފަރާތްތަކުން ދޭ އިރުޝާދުތަކާ އެއްގޮތަށް ޢަމަލުކުރުމަށާއި، ﷲގެ ރަޙްމަތުން މާޔޫސްނުވެ، ސަބަބުތަކުގައި ހިފައި، ފުރިހަމައަށް ﷲ އަށް ވަކީލުކޮށް އުޅުމަށް މިނިސްޓަރ ގޮވާލެއްވިއެވެ.
މިސްކިތްތައް ބަންދުކޮށްފައި ހުރި ނަމަވެސް، މިސްކިތްތަކުގެ އިމާމުން މިސްކިތްތަކަށް ގޮސް ބަންގިގޮވާނެ އިންތިޒާމު ހަމަޖައްސާފައިވާއިރު، މިސްކިތްތައް ބެލެހެއްޓުމަށް ހަވާލުކޮށްފައިވާ ފަރާތްތައް އެ މަސައްކަތް މެދުކެނޑުމެއްނެތި ކުރާނެކަމަށެވެ. ކޮވިޑްގެ ފިޔަވަޅުތަކަށް ލުއިދޭން ފެށުމާއެކު އެންމެ ފުރަތަމަ ލުއިދީ މިސްކިތްތައް ހުޅުވާލުމަށް ސަރުކާރުން އިސްކަންދޭކަން މިނިސްޓަރ ފާހަގަކުރެއްވިއެވެ. އަދި މިސްކިތްތައް ހުޅުވާއިރު، ބަންދުކުރިއިރު ހުރި ހާލަތުގައި އެ ސާފުތާހުރިކަމާއެކު މިސްކިތްތައް ހުންނާނެކަމުގެ ޔަޤީންކަން ދެއްވިއެވެ.
