ފްލައިން ސްކޫލެއް ހިންގާނެ ބަޔަކު ހޯދަން އިއުލާނު ކޮށްފި
އަމިއްލައަށް ފައިނޭންސްކުރާ ބަޔަކަށް އިސްކަންދޭނެ
އިތުރު ފްލައިންގ ސްކޫލެއް ގާއިމް ކުރުމަށް އައިލެންޑް އޭވިއޭޝަނުން މަސައްކަތް ފަށާފައި
އައްޑޫ ފްލައިންގ ސްކޫލްގެ މައްސަލަ ބޮޑުވެފައިވާ މިދަނޑިވަޅުގައި، އިތުރު ފްލައިންގ ސްކޫލެއް ހިންގާނެ ބަޔަކު ހޯދުމަށް، ގައުމީ އެއަރލައިން ހިންގާ ކުންފުނި އައިލެންޑް އޭވިއޭޝަނުން އިއުލާނު ކޮށްފިއެވެ.
މިކަމަށް ޓަކައި ނެރުނު އިއުލާނުގައި ބުނެފައިވަނީ، އެކަމަށްޓަކައި އުފައްދާ ސަބްސިޑަރީ ކުންފުންޏެއްގެ ކޮންމެވެސް އެއް އެއަރޕޯޓެއްގައި މި ސްކޫލް ގާއިމްކުރަން ނިންމާފައިވާ ކަމަށެވެ.
މިކަމަށް ޝައުގުވެރިވާ ދިވެހި، އަދި ބޭރު ކުންފުނި ތަކަށްވެސް ސްކޫލް ހިންގުމަށް ފުރުސަތުވަނީ ހުޅުވާލާފައެވެ. މިކަމަށް ޝައުގުވެރިކަން ފާޅުކުރުމުގެ ފުރުސަތު ޖޫން މަހުގެ 10 ވަނަ ދުވަހާ ހަމައަށް ހުޅުވާލާފައިވާ ކަމަށާއި، އަދި ކުންފުނިތައް ޝޯޓް ލިސްޓް ކުރުމުގައި އިސްކަންދޭނީ އަމިއްލައަށް ފައިނޭންސް ކޮށްގެން އެކަން ކުރެވޭނެ ބަޔަަކަށް ކަމަށް އިއުލާނުގައި ބުނެފައިވެއެވެ.
ކޮމާޝަލް ޕައިލެޓް ލައިސަންސާ ހަމައަށް ކިޔަވައިދޭ ގޮތަށް ހަމަޖެހިފައިވާ މި ސްކޫލް ވަކިން މެނޭޖުކުރި ނަމަވެސް، އެއަރކްރާފްޓް މެއިންޓަނެންސާއި ސަލާމަތީ ކަންކަން ބަލަހައްޓާނީ އެ ކުންފުނިން ކަމަށް ވެސް ބުނެފައި ވެއެވެ.
އަދި އެ ސްކޫލް ހިންގަން ހަވާލުވާ ފަރާތުން އެއަރކްރާފްޓް ހޭންގަރަކާއި، ތަމްރީނުދޭ އިމާރާތަކާއި، ދެ މަލްޓި އިންޖީނާއި، އަދި ހަތަރު ސިންގަލް އިންޖީން އެއަރކްރާފްޓް ބަލަހައްޓަން ޖެހެއެވެ.
މިކަމަށް ކުރިމަތިލާ ފަރާތުގެ ހުންނަން ލާޒިމްކުރާ ޝަރުތު ތަކުގެތެރޭގަައި، 10 އަހަރުގެ ތަޖުރިބާއާއި އަދި ކަމާގުޅޭ ހުއްދަ އޮންނަން ޖެހެއެވެ. ހަަމައެއާއެކު އަމިއްލަ ގައުމު ފިޔަވައި އެހެން ގައުމެއްގައި، މަދުވެގެން ދެ ފްލައިން ސްކޫލެއް ގާއިމްކޮށްފައިވާ ފަރާތަކަށް ވާންޖެހެއެެވެ.
