ނޫސްވެރިންގެ ބައްދަލުވުންތައް ބޮއިކޮޓް ކުރަން ނިންމި މައްސަލަ ހޫނުވެ، ފްރެންޗް އޯޕަން ޓެނިސް މުބާރާތުން ވަކިވަން ޖަޕާނުގެ ނައޯމީ އޮސާކާ ނިންމައިފިއެވެ.
މިހާތަނަށް ހަތަރު ގްރޭންޑް ސްލޭމް މުބާރާތް ކާމިޔާބުކޮށްފައިވާ އުމުރުން 23 އަހަރުގެ އޮސާކާ ވަނީ އޭނާގެ ނަފްސާނީ ދުޅަހެޔޮ ކަމަށް ވިސްނުމަށްފަހު މި ފަހަރުގެ ފްރެންޗް އޯޕަންގައި މީޑިއާއާ ވާހަކަ ނުދައްކަން ނިންމާފައެވެ. އަދި އެ ގޮތަށް ކަންތައް ކޮށްގެން ދައްކަން ޖެހޭ ޖޫރިމަނާ ޗެރިޓީއެއްގެ ގޮތުގައި ދައްކާނެ ކަމަށްވެސް އޮސާކާ ވަނީ ބުނެފައެވެ.
އެއާއެކު އެ މައްސަލަ ހޫނުވިއިރު، ފްރެންޗް އޯޕަންގެ އޮގަނައިޒިން ކޮމިޓީން ވަނީ އޮސާލާ 15،000 ޑޮލަރުން ޖޫރިމަނާކޮށްފައެވެ. އަދި އެއާއެކު ޓެނިހުގެ ވަރުގަދަ ހަތަރު ގްރޭންޑް ސްލޭމް މުބާރާތުން އޭނާ ސަސްޕެންޑްކުރަން ޖެހިދާނެ ކަމުގެ އިންޒާރެއްދީ ބަޔާނެއް ވަނީ ނެރެފައެވެ.
އެ އިންޒާރު ދިންތާ މާ ގިނައިރެއް ނުވެ އޮސާކާ ވަނީ ފްރެންޗް އޯޕަންއިން އަމިއްލައަށް ވަކިވާން ނިންމިކަން ޓްވިޓާ މެދުވެރިކޮށް އިއުލާން ކޮށްފައެވެ. އެކަން އިއުލާންކޮށް އޮސާކާ ބުނީ ނޫސްވެރިންގެ ބައްދަލުވުން ބޮއިކޮޓް ކުރަން ނިންމީ ނަފްސާނީ ދުޅަހެޔޮ ކަމަށް ސަމާލުވާން މެސެޖެއް ދިނުމަށް ކަމަށާއި، އެކަމަކު އެކަންތައް ދިޔައީ ބޭނުންވި ގޮތަކަށް ނޫން ކަމަށެވެ. އަދި މިހާރު އޮތް ގޮތުން ފްރެންޗް އޯޕަންއަށް އެންމެ ރަނގަޅު ގޮތަކީ އޭނާ ވަކިވުން ކަމަށާއި، އަދި އެ ނިންމުން ނިންމީ އޭނާގެ ސަބަބުން އިތުރު އުނދަގޫތަކެއް ނުވެ މުބާރާތަށް އެންމެން ފޯކަސް ކުރަން ފަސޭހަކޮށްދިނުމުގެ ގޮތުން ކަމަށްވެސް ވަނީ ބުނެފައެވެ.
މިހާތަނަށް އޮސްޓްރޭލިއަން އޯޕަން އާއި ޔޫއެސް އޯޕަން ދެ ފަހަރު ކާމިޔާބުކޮށްފައިވާ އޮސާލާ އެންމެ ފުރަތަމަ ޕްރޮފެޝަނަލް ޓެނިސް ކުޅުންތެރިއެއްގެ ގޮތުގައި ސީނިއާ ކެރިއަރު ފެށީ 2014 ވަނަ އަހަރު އުމުރުން އެންމެ 16 އަހަރުގައެވެ. އެއަށްފަހު ޓެނިހުގައި އޮސާކާ ވިދާލިއިރު، އޭނާ މި ވަގުތު އޮތީ ދުނިޔޭގެ ރޭންކިންގެ ދެވަނައިގައެވެ.
