ފްރެންޗް ލީގުގައި ބައިކޮޅަށް ލިޔޯން އިން ޖެހި ދެ ލަނޑުން ޕެރިސް ސެއިންޓް ޖާމަން (ޕީއެސްޖީ) މޮޅުވެއްޖެ އެވެ.

ހޮނިހިރު ދުވަހުގެ ރޭ ކުޅުނު މި މެޗު ލިޔޯންއާ ވާދަކޮށް ޕީއެސްޖީ މޮޅުވީ 0-2 ގެ ނަތީޖާއަކުންނެވެ.

ޕީއެސްޖީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅެމުންދިޔައީ އެޓީމުންނެވެ. އެގޮތުން އެޓީމުން ވަނީ ލިޔޯންގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތުތަކެއް ތަނަވަސްކޮށްފައެވެ.

ފުރަތަމަ ހާފް 0-0 ގެ ނަތީޖާއިން ދެ ޓީމު އެއްވަރުވެގެންނެވެ.

އެހެންނަމަވެސް ދެވަނަ ހާފް ފެށިގެން ޕީއެސްޖީން ވަނީ އެޓީމުގެ އެޓޭކްތައް އިތުރަށް ވަރުގަދަކޮށްފައެވެ. އެގޮތުން ކީލިއަން އެމްބަޕޭ، ނޭމާ އަދި އެޑިންސަން ކަވާނީ އަށް ވަނީ ލީޑު ނެގުމަށް ހުސް ގިނަ ފުރުސަތުތައް ލިބި ބޭކާރުވެފައެވެ.

ޕީއެސްޖީން މެޗުގެ ލީޑު ނެގީ 76 ވަނަ މިނެޓުގައެވެ. މި ލަނޑަކީ ލިޔޯންގެ މާސެލޯގެ އަތުން ބައިކޮޅަށް ވަން ލަނޑެކެވެ. އޭގެ ތިން މިނެޓު ފަހުން ޕީއެސްޖީއަށް ވަނީ ޕެނަލްޓީއެއް ލިބި ބޭކާރުވެފައެވެ. ކަވާނީ ކުރިޔަށް ފޮނުވާލި މި ޕެނަލްޓީ ލިޔޯންގެ ކީޕަރު ލޮޕޭޒް ވަނީ ދިފާއުކޮށްފައެވެ.

މެޗުގެ 81 ވަނަ މިނެޓުގައި ލިޔޯން އަށް ވެސް ވަނީ ޕެނަލްޓީއެއް ލިބި ބޭކާރުވެފައެވެ. ލިޔޯންގެ މެންފިސް ޑިޕޭ އަށް ތިއާގޯ ސިލްވާ ކުރި ފައުލަކުން ލިބުނު މި ޕެނަލްޓީ އެންތޮނީ ލޮޕޭޒް ފޮނުވާލިއިރު، ޕީއެސްޖީގެ ކީޕަރު ވަނީ ބޯޅަ ދިފާއުކޮށްފައެވެ.

ޕީއެސްޖީން މެޗުގެ ލީޑު ފުޅާކުރީ 86 ވަނަ މިނެޓުގައި ލިޔޯންގެ މޮރެލް އަތުން ބައިކޮޅަށް ވަން ލަނޑުންނެވެ.

މި ނަތީޖާއާއެކު ޕީއެސްޖީ އޮތީ ކުޅުނު ހަ މެޗުން ލިބުނު 18 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ލިޔޯން އޮތީ ކުޅުނު ހަ މެޗުން ލިބުނު 11 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ.