އަތޮޅުތަކަށް އައްޔަނުކުރި ބޭފުޅުންނަކަށް ކައުންސިލްތަކުގެ މައްޗަށް ގޮތްކިޔުމުގެ ބާރެއް ނޯންނާނެ- މަބްރޫކް
31 މެއި 2021 | ހޯމަ 17:15މިބޭފުޅުން މަސައްކަތްކުރައްވާނީ ކައުންސިލްތަކާއި ޓާސްކްފޯސްތަކާއި ގުޅިގެން
ރައީސް އޮފީހުގެ ތަރުޖަމާނު މުޙައްމަދު މަބްރޫކް ޢަޒީޒް
ކޮވިޑް-19 އާއި ގުޅިގެން އަތޮޅުތަކުގެ ހާލަތު ބެލުން އިތުރަށް ހަރުދަނާ ކުރުމަށާއި ކޯޑިނޭޝަން އިތުރަށް ރަނގަޅު ކުރުމަށްޓަކައި ކޮންމެ އަތޮޅަކަށް ސަރުކާރުގެ ފަރާތުން އައްޔަނުކުރައްވާފައިވާ ބޭފުޅުންނަށް، ކައުންސިލްތަކުގެ މައްޗަށް ބަސް ބުނުމުގެ ބާރެއް ނޯންނާނެ ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
މަބްރޫކް ވިދާޅުވީ އެންމެ ބޮޑު އެއް ކަންބޮޑުވުމަކީ އެޗްޕީއޭ، އަދި ކައުންސިލްތަކާއެކު ކުރެވޭ މަޝްވަރާތަކާ ގުޅިގެން، ސަރުކާރުގެ ފަރާތުން ފޯރުކޮށްދޭންޖެހޭ ޚިދުމަތްތައް ލަސްވަމުންދާކަމުގެ ވާހަކަ ކަމަށެވެ. މިކަމަށް އިތުރު ހަލުވިކަމެއް ގެނައުމަށް ކޮންމެ އަތޮޅެއް ކޯޑިނޭޓް ކުރުމަށް ސަރުކާރުގެ ފަރާތުން އިސް ބޭފުޅެއް އައްޔަނު ކުރެވިފައިވާ ކަމަށް މަބްރޫކް ވިދާޅުވިއެވެ.
އަދި އެބޭފުޅުންގެ ޒިންމާއަކީ އެޗްޕީއޭއާ ކައުންސިލްތަކާ ދެމެދު ހިނގާ މުއާމަލާތްތަކާއި، ކުރެވޭ މަޝްވަރާތަކާ ގުޅިގެން ނިންމާ ކަންކަން ފަސޭހަ ކުރުމަށް ސަރުކާރުގެ ފަރާތުން އަދާކުރަން ޖެހޭ ދައުރު އަދާކުރުން ކަމަށް ވެސް ވިދާޅުވިއެވެ. މަބްރޫކް ވިދާޅުވީ މި ބޭފުޅުންނަކަށް، ކައުންސިލްތަކުން އަދާކުރަންޖެހޭ ޒިންމާ އަދާކުރާކުރުމުގެ ބާރެއް ނޯންނާނެ ކަމަށާއި، ރަށްރަށުގެ ކަންކަން ނިންމުމުގެ ބާރެއްވެސް ނޯންނާނެ ކަމަށެވެ.
މަބްރޫކް ވިދާޅުވީ ކޮވިޑާ ދެކޮޅަށް ކުރަމުންދާ މަސައްކަތުގެ ތެރެއިން ފާއިތުވި އަހަރު ސަރުކާރުން މިކަމަށް ތައްޔާރުވާން ފެށިއިރު ނިންމުނު އެންމެ ރަނގަޅު އެއް ނިންމުމަކީ، އަދި އޭގެ ސަބަބުން އެންމެ ބޮޑު ފައިދާއެއް ލިބުނު އެއް ކަމަކީ، ލާމަރުކަޒީ ގޮތަކަށް މިކަމާ ކުރިމަތިލުން ކަމަށެވެ. އެގޮތުން ރާއްޖޭގެ ކޮންމެ ސަރަހައްދެއްގައި ސިއްހީ ފަރުވާދެވޭނެ އިންތިޒާމު ރޭވުމާއި، ކޮންމެ ރަށެއްގައި ޓާސްކްފޯހެއް އެކުލަވާލުމާއެކު ބޭނުންވާ ތަމްރީނު ދެވިގެން ދިޔަކަމަށް ވިދާޅުވިއެވެ.
އަދި ރާއްޖޭގެ ފަސް ސަރަހައްދެއްގައި ފަރުވާދެވޭނެ ރަނގަޅު ފެންވަރުގެ ވަސީލަތްްތަކާއި އާލާތްތައް ހުރި، ކޮވިޑް މެނޭޖްމަންޓް ސެންޓަރުތައް އެބަހުރި ކަމަށާއި، ކޮންމެ ރަށެއްގައި އައިސޮލޭޝަންއަށް ވަކިިން ތަންތަން ހަމަޖެއްސުން ފަދަ ކަންކަން ރޭވުން އެއީ މުހިއްމު ކަމެއް ކަމަށް ވިދާޅުވިއެވެ.
މަބްރޫކް ވިދާޅުވީ ކޮވިޑުގެ ސަބަބުން ދަސްވި އެއް ކަމަކީ ލާމަރުކަޒީ ގޮތަކަށް ސިއްހީ ފަރުވާ ދިނުމުގެ މުހިއްމުކަން ކަމަށެވެ. އެގޮތުން މާލޭގައި އެއްތަނަކުން ހުރިހާ ފަރުވާއެއް ލިބޭ ގޮތަށް އޮތް އޮތުން މިއީ ކުރިން ފެށިގެން ވެސް ދިމާވެފައިވާ ބޮޑު އެއް މައްސަލަ ކަމަށް ވިދާޅުވިއެވެ.
