ވިޔަފާރި ބަނދަރުގައި ނުގެންގޮސް ގިނަދުވަސްވެފައިވާ މުދާ ނީލަންކިޔަނީ

ރާއްޖެއަށް މުދާ އެތެރެކޮށް މާލޭ ވިޔަފާރި ބަނދަރުގައި ނުގެންގޮސް ގިނަދުވަހު ބެހެއްޓިފައިވާ، މުދާ ނީލަންކިޔަން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ނިންމައިފިއެވެ.

ރާއްޖެއަށް މުދާ އެތެރެކޮށް މާލޭ ވިޔަފާރި ބަނދަރުގައި ނުގެންގޮސް ގިނަދުވަހު ބެހެއްޓިފައިވާ، މުދަލުގެ ތެރޭގައި ލަކުޑިއާ މިނޫންވެސް ގިނަ އަދަދެއްގެ ތަކެތި ހިމެނޭކަމަށް އެމްޕީއެލް އިން ބުނެއެވެ.

އެމްޕީއެލް އިން ބުނީ 06 ޖޫންގެ 10:00ގެ ކުރިން ނީލަން މުދާ ބެލުމަށް އެދޭ ފޯމު ފުރިހަމަކުރަން ޖެހޭނެ ކަމަށެވެ. އަދި މުދާ ބެލުން އޮންނާނީ އެދުވަހުގެ ހެނދުނު 14:00 ގައި ކަމަށް އެމްޕީއެލް އިން ބުނެއެވެ.

ނީލަމުގައި ބައިވެރިވެވޭނީ ޖޫން ހަތް ވަނަ ދުވަހުގެ 14:00 ގެ ކުރިން، ނީލަމުގައި ބައިވެރިވުމަށް އެދި ނީލަމުގައި ރަޖިސްޓްރީ ކުރާ ފޯމު ފުރިހަމަކޮށް އެޑްވާންސް ޕޭމަންޓް ދައްކާ ފަރާތްތަކަށް ކަމަށާއި ނީލަން ކިއުން އޮންނާނީ އެމްޕީއެލް ހެޑް އޮފީހުގެ ބަނދަރު މާލަމުގައި ޖޫން 8 ވަނަ ދުވަހުގެ 14:00ން ފެށިގެން ކަމަށް އެކުންފުނިން ބުނެއެވެ. ސެކިއުރިޓީ ޑިޕޮޒިޓް ފައިސާ ދެއްކުމަށް ޗެކް ބޭނުންކުރެވޭނީ ބޭންކް ގެރެންޓީ ދެވިފައިވާ ޗެކެވެ.

މުދާ ބަލަން ދާއިރު ޕޯޓުގެ ގަވާއިދާ އެއްގޮތަށް، ބޫޓް، ވެސްޓް އަދި ހެލްމެޓް ހިފައިގެން ދިއުމަށް ވަނީ އަންގާފައެވެ. މުދާ ނީލަންކިޔުން ކުރިއަށް ގެންދެވޭނީ އެކުންފުނީގައި މުދާ ނީލަން ކިޔުމަށް ހެދިފައިވާ ގަވާއިދުގެ ދަށުން ކަމަށާއި ކުންފުނީގެ ވެބްސައިޓުން ގަވާއިދު ފެންނާނެކަމަށް އެމްޕީއެލް އިން ފާހަގަކުރެއެވެ.

ނީލަމާއިބެހޭ އިތުރު މައުލޫމާތު އެމްޕީއެލްގެ ކާގޯ ކްލިއަރެންސް ޑިޕާރޓްމެންޓް އަދި ވެބްސައިޓުން ލިބޭނެއެވެ.