ކުރިއަށް ޔޫރޯ ފުޓްބޯޅަ މުބާރާތުގައި ބެލްޖިއަމުގެ ގައުމީ ފުޓްބޯޅަ ޓީމުގެ އެސިސްޓަންޓް ކޯޗެއްގެ ގޮތުގައި މަސައްކަތްކުރުމަށް ފްރާންސްގެ ލެޖެންޑް ތިއެރީ އޮންރީ ނިންމައިފިއެވެ.
އާސެނަލުގެ ޔޫތު ޓީމުން ކޯޗިން ކެރިއަރު ފެށި އޮންރީ މީގެ ކުރިންވެސް ވަނީ ބެލްޖިއަމުގެ އެސިސްޓަންޓް ކޯޗެއްގެ ގޮތުގައި މަސައްކަތް ކޮށްފައެވެ. އެގޮތުން 2016 ވަނަ އަހަރު އެ މަގާމާ އޮންރީ ހަވާލުވިއިރު، ބެލްޖިއަމުން 2018 ވަނަ އަހަރު ރަޝިއާގައި ބޭއްވި ފީފާ ވޯލްޑް ކަޕުގެ ތިންވަނަ ހޯދި ޓީމުގައި އޭނާ ވަނީ މުހިންމު މަސައްކަތްތަކެއް ކޮށްފައެވެ. އެކަމަކު އެ މުބާރާތަށްފަހު ފްރާންސްގެ މޮނާކޯގެ ކޯޗުގެ މަގާމާ ހަވާލުވުމަށް އޮންރީ ވަނީ ބެލްޖިއަމް ޓީމު ދޫކޮށްލާފައެވެ.
މޮނާކޯގެ އިތުރުން އެމެރިކާގެ މޮންޓްރެއާލް އިމްޕެކްޓަށް މީގެ ކުރިން އިރުޝާދުދިން އޮންރީ އަލުން އަނބުރާ ބެލްޖިއަމުގެ އެސިސްޓަންޓް ކޯޗުގެ މަގާމާ ހަވާލުވީ އަންނަ ޖޫން މަހު ފަށާ ޔޫރޯއަށް ޓީމު ތައްޔާރުކުރުމަށެވެ. ރޮބާޓޯ މާޓިނޭޒްގެ ކޯޗުކަމުގައި ބެލްޖިއަމުން މި ފަހަރުގެ ޔޫރޯއާ ކުރިމަތިލާއިރު، އޮންރީ ބުނީ މާޓިނޭޒް އާއެކު އަލުން މަސައްކަތްކުރަން ލިބުމަކީ އޭނާއަށް ލިބުނު ފަޚުރެއް ކަމަށެވެ.
ފްރާންސާއެކު 1998 ގެ ވޯލްޑް ކަޕް ކާމިޔާބުކުރި އޮންރީ ފުޓްބޯޅަ ކުޅުން ހުއްޓާލާފައިވަނީ 2014 ވަނަ އަހަރުއެވެ. ކޯޗެއްގެ ގޮތުގައި މިހާތަނަށް އޮންރީއަށް ކާމިޔާބީއެއް ހޯދިފައި ނުވާއިރު، މި ފަހުން އޭނާ މަސައްކަތް ކޮށްފައިވަނީ ބީބީސީގެ އެނަލިސްޓެއްގެ ގޮތުގައެވެ. އެގޮތުން ކުރިއަށް އޮތް ޔޫރޯގައިވެސް ބީބީސީއަށް މަސައްކަތްކުރަން އޮންރީ މީގެ ކުރިން ވަނީ ނިންމާފައެވެ.
އަންނަ މަހުގެ 11 ވަނަ ދުވަހުން ފެށިގެން ޖުލައި މަހުގެ 11 ވަނަ ދުވަހުގެ ނިޔަލަށް ޔޫރޯ ކުރިއަށްދާއިރު، އެ މުބާރާތުގައި ބެލްޖިއަމް ހިމެނުނީ ގުރޫޕް ބީ ގައެވެ. އެ ގުރޫޕުގައި ދެން ހިމެނެނީ ޑެންމާކާއި، ފިންލެންޑް އަދި ރަޝިއާއެވެ.
