ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ އަހަރީ އާންމު ޖަލްސާ 31 މެއި ވާ ހޯމަ ދުވަހުގެ ހަވީރު 4:00 ގައި ފަށާނެއެވެ.

މައިކްރޮސޮފްޓް ޓީމްސް މެދުވެރިކޮށް ބޭއްވުމަށް ހަމަޖެހިފައިވާ މި ޖަލްސާގައި ބައިވެރިވެވޭނީ 19 މޭ 2021 ވާ އާދިއްތަ ދުވަހުގެ ނިޔަލަށް ކުންފުނީގެ ހިއްސާދާރުންގެ ދަފްތަރުގައި ހިމެނޭ މީހުންނަށެވެ.

އެ ކުންފުނިން ބުނީ އަހަރީ އާންމު ޖަލްސާގައި ބައިވެރިވުމަށް ނުވަތަ ޕްރޮކްސީ މެދުވެރިކޮށް ޖަލްސާގައި ބައިވެރިވުމަށް، އެސްޓީއޯގެ ވެބްސައިޓްގައި ހޮސްޓް ކޮށްފައިވާ agm.sto.mv ޕޭޖު މެދުވެރިކޮށް ރަޖިސްޓަރީކުރަން ޖެހޭނެ ކަމަށެވެ. އެސްޓީއޯއިން ބުނީ ކުންފުނީގެ ހިންގާ ގަވާއިދުގެ 44 ވަނަ މާއްދާގެ (ހ) ގައި ބަޔާން ކޮށްފައި ވާގޮތަށް ކޮންމެ ހިއްސާދާރަކަށް އޭނާގެ ބަދަލުގައި ޖަލްސާއަށް ހާޒިރުވެ، ވޯޓު ދިނުމަށް އައްޔަން ކުރެވޭނީ 1 ޕްރޮކްސީ ކަމަށެވެ.

އަދި އެކަކަށްވުރެ އިތުރު ފަރާތްތަކަށް ޕްރޮކްސީދީފައިވާ ހާލަތުގައި، ހުށަހަޅާފައިވާ ހުރިހާ ޕްރޮކްސީއެއް ބާތިލް ކުރެވޭނެ ކަމަށާއި ޕްރޮކްސީ ގަބޫލު ކުރެވޭނީ ކޮންމެ ވަކި ފަރާތަކަށް ގިނަވެގެން 100 މެންބަރުންގެ ޕްރޮކްސީ ކަމަށެވެ.

ކުންފުނީގެ ބޯޑުގެ ޕްރޮކްސީގެ ގޮތުގައި އައްޔަންކުރާ ފަރާތަކީ ހިއްސާދާރަކަށް ވުން ލާޒިމެއް ނުވާނެއެވެ. ނަމަވެސް، ޑިރެކްޓަރަކަށް ޕްރޮކްސީ ހަވާލެއް ނުކުރެވޭނެއެވެ. ރަޖިސްޓަރީ ކުރުމުގައި ހުށަހަޅާފައިވާ މައުލޫމާތެއް، ޖަލްސާ ފެށުމުގެ 24 ގަޑިއިރު ކުރިން ކުންފުންޏަށް ޔަގީން ނުކުރެވި، ސާފު ނުވެ، ފުރިހަމަ ކޮށްފައި ނުވާނަމަ ނުވަތަ ހުށަހަޅަންޖެހޭ ލިޔުމެއް ހުށަހަޅާފައި ނުވާނަމަ، ރަޖިސްޓްރޭޝަން ބާތިލްކުރުމުގެ އިޚްތިޔާރު ކުންފުންޏަށް ލިބިގެންވާ ކަމަށް އެސްޓީއޯއިން ބުނެއެވެ.

އެސްޓީއޯއިން ބުނީ ކުންފުނީގެ ފައިދާއިން 2020 ވަނަ އަހަރު ހިއްސާދާރުންނަށް ބަހަން ހުށަހެޅުމަށް، ޑިރެކްޓަރުންގެ ބޯޑުން ފާސްކޮށްފައިވަނީ، ހިއްސާއަކަށް 60 ރުފިޔާ ކަމަށެވެ.