ނޭޕާލުން ސިއްހީ ކުއްލި ނުރައްކަލުގެ ހާލަތު އިއުލާންކުރުމުގެ މަޝްވަރާ ކުރަނީ

ކޮވިޑް-19ގެ ދެވަނަ ރާޅަކާ ކުރިމަތިލާފައިވާ ނޭޕާލުން ސިއްހީ ކުއްލި ނުރައްކަލުގެ ހާލަތު އިއުލާންކުރުމުގެ މަޝްވަރާތައް ކުރަމުންދާ ކަމަށް އެގައުމުގެ ހެލްތް މިނިސްޓަރ ރިދްޔޭޝް ތްރިޕާތީ ވިދާޅުވެއްޖެއެވެ.

އެގައުމުގައި ކޮވިޑް-19 ހަލުވިކަމާއެކު ފެތުރެމުން އަންނައިރު ގައުމުގެ ސިއްހީ ނިޒާމަށް ނުކަތާވަރަށް މީހުން ބައްޔަށް ޕޮޒިޓިވް ވެދާނެ ކަމުގެ ބިރު ހީވާން ފަށާފައިވާކަމަށް ބައިނަލްއަގުވާމީ މީޑިއާތަކުގައި ރިޕޯޓުކޮށްފައިވެއެވެ. އެގައުމުގެ ސިއްހީ މާހިރުން ލަފާކުރާ ގޮތުގައި އެގައުމަށް ކޮވިޑްގެ ދެވަނަ ރާޅަކާ ކުރިމަތިލާންޖެހުނީ އެގައުމަށް ގޮސްފައިވާ އެހެން ގައުމުތަކުގެ މީހުންގެ ފަރާތުން ބަލި ފެތުރުމުގެ ސަބަބުން ކަމަށެވެ.

ނޭޕާލުން މިހާތަނަށް 557،124 މީހުންނަށް ކޮވިޑް ޖެހިގެން ވަނީ ރިޕޯޓުކޮށްފައެވެ. އަދި 7،272 މީހަކު ބަލީގެ ސަބަބުން މަރުވެފައިވާއިރު ޖުމްލަ 440،955 މީހުން ވަނީ ބަލިން ރަނގަޅުވެފައެވެ. ފާއިތުވި ހަފުތާތަކުގައި އެގައުމުން ކޮވިޑަށް ކުރެވޭ ޓެސްޓުތަކުގެ 40 އިންސައްތަ އަންނަނީ ޕޮޒިޓިވް ވަމުންނެވެ.

ދުނިޔޭގެ އެކި ގައުމުތަކުގައި ކޮވިޑް ފެތުރެމުން އަންނައިރު ކޮވިޑް-19ގެ އަސްލު ދެނެގަތުމަށް ދުނިޔޭގެ ސިއްހަތު ޖަމުޢިއްޔާ (ޑަބްލިޔުއެޗްއޯ)އިން ކުރަމުންދާ މަސައްކަތުގެ ދެވަނަ ފޭސްގެ މަސައްކަތްތައް ކުރިޔަށް ގެންދާނެގޮތުގެ ޕްރޮޕޯސަލްއެއް މާހިރުން އެކުލަވާލަމުން ގެންދާކަމަށް ޑަބްލިޔުއެޗްއޯގެ ސްޕޯކްސްވުމަން ފަދޭލާ ޗެއިބް ދާދި ފަހުން ވަނީ ވިދާޅުވެފައެވެ.

ޑަބްލިޔުއެޗްއޯއިން މިކަން ހާމަކޮށްފައި މިވަނީ ކޮވިޑް-19ގެ އަސްލު ދެނެގަތުމުގެ ދެވަނަ ފޭސްގެ މަސައްކަތްތައް ކުރިޔަށް ގެންދިޔުމަށް އެމެރިކާއިން ގޮވާލާފައިވަނިކޮށެވެ. އެމެރިކާއިން ވަނީ މިނިވަން ޓީމަކުން އެމަސައްކަތްކުރުމަށް ގޮވާލާފައެވެ. އަދި މާހިރުންގެ ޓީމަށް ޗައިނާއިން އެންމެ ފުރަތަމަ ފެނުނު ކޮވިޑް-19ގެ ސާމްޕަލްތަކުގެ އަސްލާ ހަމައަށް ވާސިލްވުމުގެ ފުރުސަތު ފަހިކޮށްދިނުމަށް ވެސް ވަނީ ގޮވާލާފައެވެ.