ކޮވިޑްގެ ކޭސްތައް މަދުވިއިރު، ހޮސްޕިޓަލުތަކުގައި އެޑްމިޓްކޮށްގެން ފަރުވާދޭ މީހުންގެ އަދަދުވެސް ދަށަށް
ހޮސްޕިޓަލުގައި އެޑްމިޓްކޮށްގެން ފަރުވާ ދެމުން ދަނީ 218 މީހުންނަށް
ފުލުހުން މަގުމަތީގައި ހަރަކާތްތެރިވަނީ
ފާއިތުވެދިޔަ 24 ގަޑިއިރުގެ ތެރޭގައި، ކޮވިޑަށް ޕޮޒިޓިވްވީ މީހުންގެ އަދަދު ވަރަށް ބޮޑަށް ދަށްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސް ހިސާބުތަކުން ދައްކައިފިއެވެ.
އެޗްޕީއޭއިން އެންމެ ފަހުން އާންމުކުރި ތަފާސް ހިސާބުތައް ދައްކާ ގޮތުގައި، ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން 4،356 މީހުން ވަނީ ކޮވިޑަށް ޓެސްޓު ކޮށްފައެވެ. އަދި އޭގެ ތެރެއިން ޕޮޒިޓިވްވެފައި ވަނީ 780 މީހުންނެވެ. އެއީ މާލެ ސަރަހައްދުން ޕޮޒިޓިވްވި 571 މީހުންނާއި، އަތޮޅު ތެރެއިން ޕޮޒިޓިވްވި 205 މީހުންނާއި، ރިސޯޓުތަކުން ޕޮޒިޓިވްވި 4 މީހުންނެވެ.
މިއަދު ޕޮޒިޓިވްވީ 780 މީހުންނާއެކު ރާއްޖެއިން މިބައްޔަށް ޕޮޒިޓިވްވީ މީހުންގެ އަދަދު ވަނީ 63،686އަށް އަރާފައެވެ. އަދި އެކްޓިވް ކޭސްތަކުގެ އަދަދު 24،205ގައި އުޅޭއިރު، ހޮސްޕިޓަލުތަކުގައި އެޑްމިޓް ކޮށްގެން ފަރުވާދޭ މީހުންގެ އަދަދަކީ 218އެވެ. ރާއްޖެއިން މިހާތަނަށް 39،314 މީހުން މިބަލިން ފަސޭހަވެފައިވާއިރު، 158 މީހުން ވަނީ މި ބަލީގައި ނިޔާވެފައެވެ.
އެޗްޕީއޭއިން އެންމެ ފަހުން އާންމު ކުރި މައުލޫމާތުތައް ދައްކާ ގޮތުން، މިއަހަރުގެ ޖެނުއަރީ މަހުން ފެށިގެން، ޕޮޒިޓިވްވާ މީހުންގެ ތެރޭގައި ގިނައީ އުމުރުން 18 އަހަރާއި 49 އަހަރާ ދެމެދުގެ މީހުންނެވެ. މި އުމުރު ފުރައިގެ 50 އިންސައްތަ މީހުން ޕޮޒިޓިވްކަމަށް ވެސް އެޗްޕީއޭއިން ހާމަކުރެއެވެ.
މާލެ ސަރަހައްދުގައި ޓެސްޓް ކުރެވޭނެ ސެންޓަރުތަކާއި ފްލޫ ކްލިނިކްތައް ހަމަޖައްސައި، ވަކި ގަޑިތަކެއް މިހާރު ވަނީ ކަނޑައަޅާފައެވެ. އެގޮތުން މާލޭގައި ސާމްޕަލް ނަގާ ސެންޓަރުތަކުގެ ތެރެއިން ހ. މުނިއުފާއާއި، ސޯޝަލް ސެންޓަރުގައި ހޮނިހިރު ދުވަހުން ފެށިގެން ބުރާސްފަތި ދުވަހަށް، ކޮންމެ ދުވަހަކު ވެސް ހެނދުނު 9:00އިން މެންދުރުފަހު 3:30އަށް ސާމްޕަލް ނަގާނެއެވެ. ހުކުރު ދުވަހު ސާމްޕަލް ނަގާނީ ހެނދުނު 10:00އިން 11:30އަށް، އަދި މެންދުރު 1:30އިން ހަވީރު 4:00އަށެވެ.
ހުޅުމާލޭގައި މެންދުރު 1:00އިން ހަވީރު 4:00އަށެވެ. އަދި ވިލިމާލޭގައި މެންދުރު 2:30އިން ހަވީރު 4:00ށް ސާމްޕަލް ނަގާނެއެވެ.
ކޮވިޑް-19ގެ ހާލަތު ގޯސްވަމުން ދިއުމާއެކު، މާލޭގައި ހަރުކަށި ފިޔަވަޅުތަކެއް އަޅާފައިވާތީ، ސާމްޕަލް ނަގާ ސެންޓަރުތަކަށް ދިއުމަށްވެސް ޕޮލިސް ޕާމިޓް ޕޯޓަލް މެދުވެރިކޮށް ހުއްދަ ނެގުމަށް ވަނީ އެދިފައެވެ.
