ދެވޭ ލުއިތަކުގެ ސަބަބުން ކޭސްތައް އިތުރުވި ނަމަވެސް ހޭންޑަލް ކުރެވޭނެ: ޑރ. ލަތީފް
27 މެއި 2020 | ބުދަ 18:46މެނޭޖް ކުރުމަށް ދަނީ މަސައްކަތް ކުރަމުން
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގެ ތެރެއިން ޓެގްގެ ލީޑަރު ޑރ. އަލީ ލަތީފް
ފުދޭ ވަރަކަށް ގިނަ ދުވަސް ވަންދެން ކޮވިޑް-19އާ އެކު ދިރިއުޅެން ޖެހޭ ކަމަށާއި، ދެވޭ ލުއިތަކުގެ ސަބަބުން ކޭސްތައް އިތުރުވި ނަމަވެސް ހޭންޑަލް ކުރެވޭނެ ކަަމަށް ޓެކްނިކަލް އެޑްވައިޒަރީ ގްރޫޕް (ޓެގް) ގެ ލީޑަރު ޑރ. އަލީ ލަތީފް ވިދާޅުވެއްޖެއެވެ.
ލޮކްޑައުން އަށް ލުއި ދިނުމަށް ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ.ލަތީފް ވިދާޅުވީ ނިސްބަތުން ޑޮކްޓަރުންނާއި، ނަރުހުން އަދި ޓެކްނީޝަނުން މަދު ކަމަށެވެ. ނަމަވެސް ބޭނުންވާ އެކިއުޕްމެންޓް ލިބޭ ކަމަށާއި، މިހާލަތުގައި އެހެން ގައުމުތަކުން ޑޮކްޓަރުންނާއި، ނަރުހުން ގެނައުމަކީ އެހާ ފަސޭހަ ކަމެއް ނޫން ކަމަށެވެ. އަދި މިހާރު މަސައްކަތް ކުރަމުންދަނީ ހުރި ވާސީލަތްތަކުން މެނޭޖް ކުރުމަށް ކަމަށެވެ.
ލޮކްޑައުންނަށް ލުއި ދެވިގެންދިޔައީ ފާއިތުވި ދެހަފްތާގައި ކޮވިޑް-19ށް ޕޮޒިޓިވްވާ ރޭޓް ދަނީ ދަށަށް ދިއުމުން ކަމަށެވެ. އެގޮތުން ފުރަތަމަ ކޭސްތައް ފެނިގެން ދިޔައިރު ކޮންޓެކްޓުންގެ ގޮތުގައި ބިދޭސީންގެ ގާތްގަނޑަކަށް 45އަކަށް ދިޔަ ކަމަށާއި، ދިވެހިންގެ ތެރޭގައި 33 އަށްވުރެ މަދު ނުވާ ކަމަށެވެ. ނަމަވެސް މިހާރު ކޮންޓެކްޓުން ގެ ގޮތުގައި ފާހަގަކުރެވެނީ އެއްގެއެއްގަ ދިރިއުޅޭ މީހުންގެ ތެރެއިން ގާތްގަނޑަކަށް 6 ވަރަކަށް މީހުންކަން ޑރ.ލަތީފް ފާހަގަކުރެއްވިއެވެ.
މީގެ އިތުރުން ޑރ. ލަތީފް ވިދާޅުވީ ލޮކްޑައުންއަށް ލުދިދިނީ ލުއިދިނުމަށް ބޭނުންވާ ކްރައިޓީރިއާ ހަމަވުމުން ކަމަށާއި، މިހާރު ކޭސްތައް ފެނުނު ނަމަވެސް ޚިދުމަތް ދެވޭ ވަރަށް ފެސިލިޓީތައް ގާއިމް ކުރެވިފައިވާ ކަމަށެވެ.
އެގޮތުން ހުޅުމާލެ ހޮސްޕިޓަލްގައި ގާތްގަނޑަކަށް 290 އެނދު ހިމެނޭ ކަމަށާއި ޓްރީ ޓޮޕް ހޮސްޕިޓަލްގައި 25 އައިސީޔޫ އެނދު އެބަހުރި ކަމަށް ޑރ. ލަތީފް ވިދާޅުވިއެވެ. އަދި ވިދާޅުވީ ކޭސްތައް ފެނިއްޖެކަމުވާނަމަ އެޑްމިޓް ކުރެވޭ ފުރުސަތު އެބައޮތް ކަމަށެވެ.
ކޮވިޑް-19ށް ޓެސްޓް ކުރެވޭ ކެޕޭސިޓީ އިތުރު ކުރެވޭކަން ފާހަގަކުރައްވައި ޑރ.ލަތީފް ވިދާޅުވީ މިހާރު ދުވާލަކަށް 600 ޓެސްޓު ހެދޭ ކަމަށެވެ. އަދި އޭޑީކޭއިން ވެސް ކުރިއަށް އޮތްތާގައި ކޮވިޑް-19ށް ޓެސްޓު ކުރުމުގެ މަސައްކަތް ފަށާނެ ކަމަށް ޑރ.ލަތީފް ވިދާޅުވި އެވެ.
ޑރ.ލަތީފް ވިދާޅުވީ ލޮކްޑައުންއަށް ލުއިތައް ދިނުމާ ގުޅިގެން ކޭސްތައް އިތުރުވި ނަމަވެސް ހޭންޑަލް ކުރުމުގެ ގާބިލްކަން އެބަހުރި ކަމަށެވެ. ނަމަވެސް ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އެންގުންތަކާ އެއްގޮތަށް އަމަލު ކުރަަންޖެހޭ ކަމަށް ޑރ.ލަތީފް ވިދާޅުވި އެވެ.
ޑރ.ލަތީފް ވިދާޅުވީ ލޮކްޑައުންއިން ބޭރަށް ނިކުންނައިރު ސިއްހީ އިދާރާތަކުން ދޭ އިރުޝާދުތަކަށް އަމަލުނުކޮށްފިނަމަ އަނެއްކާވެސް ކޭސްތައް ގިނަވެ މިހާރު ހުރި ވަސީލަތްތަކުން ވެސް ނުފުދިދާނެ ކަމުގެ އިންޒާރު ދީފަ އެވެ. އެހެންކަމުން އެންގުންތަކަށް ތަބާވުމަށް އިލްތިމާސް ކުރެއްވި އެވެ.
