ބޮޑު ކްލަސްޓަރއެއް ފެނި ޕޮޒިޓިވް ކޭސްތައް އިތުރުވެގެންދާނެ ކަމުގެ އިންޒާރު!
ބަލި ޖެހުމުގެ ހިރާސް ބޮޑުކަމަށް ފާހަގަކުރެވޭ ބިދޭސީން އުޅޭ ތަންތަން ދަނީ މޮނިޓަރ ކުރަމުން
އެޗްޕީއޭގެ އެޕިޑިއަމަލޮޖިސްޓް ޑރ. އިބްރާހިމް އަފްޒަލް
ދެތިން ދުވަހެއްގައި މަދު ކޭސްތަކެއް ފެނުނު ކަމުގައި ވިޔަސް ބޮޑު ކްލަސްޓަރއެއް ފެނި ޕޮޒިޓިވް ކޭސްތައް ވަރަށް ބޮޑުތަނުން އިތުރުވެދާނެ ކަމުގެ އިންޒާރުދީފިއެވެ.
ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި އަދީއްތަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑިއަމަލޮޖިސްޓް ޑރ. އިބްރާހިމް އަފްޒަލް ވިދާޅުވީ ބަލި ޖެހުމުގެ ހިރާސް ބޮޑުކަމަށް ފާހަގަކުރެވޭ ބިދޭސީން އުޅޭ ތަންތަން ދުރާލާ މޮނީޓަރކުރަމުންދާ ކަމަށެވެ.
މިހާތަނަށް އެކްޓިވް ސަރވައިލެންސްގެ ތެރެއިން ހަތް ތަނެއް ބަލާ ނިމިފައިވާކަން ފާހަގަކޮށް ޑރ. އަފްޒަކް ވިދާޅުވީ ޖުމުލަ 23 ތަނެއް މި ލިސްޓުގައި ހިމެނޭ ކަމަށެވެ. އަދި މި ތަންތަނުގެ ސާމްޕްލިންގެ މަސައްކަތް ނިމޭއިރު، އިތުރު އައު ކްލަސްޓަރތަކެއް ފެނުމަކީ އެކަށީގެންވާ ކަމެއް ކަމަށް ޑރ. އަފްޒަލް ވިދާޅުވިއެވެ.
ޑރ.އަފްޒަލް ވިދާޅުވީ މިދަނޑިވަޅަކީ އަދި ރިލެކްސް ވާންވީ ވަގުތު ނޫން ކަމަށެވެ. އަދި ވެސް އިތުރަށް ރައްކާތެރިކަމުގެ ފިޔަވަޅު އަޅާ އެޗްޕީއޭގެ އެންގުންތަކާ އެއްގޮތަށް ބޯލެބުމަށް ޑރ. އަފްޒަލް އެދިލެއްވިއެވެ.
ކޮވިޑް-19 ކޮންޓްރޯލް ކުރުމަށް ސަރުކާރުން ގިނަ މަސައްކަތްތައް ކަރަމުންދާއިރު، ރާއްޖެއިން މިހާތަނަށް 500ށް ވުރެ ގިނަ މީހުން ވަނީ ޕޮޒިޓިވްވެފައެވެ.
