މިދުވަސްވަރު ފެންނަ ކޭސްތައް މަދުވަނީ ޓެސްޓް ކުރެވޭ މިންވަރު މަދުވެގެންނެއް ނޫން: ޑރ އަފްޒަލް
ދުވާލަކު 350 އާއި 385 އާ ދެމެދު ޓެސްޓް ކުރެވޭ
ޑޮކްޓަރ އިބްރާހީމް އަފްޒަލް ނޫސްވެރިންގެ ބައްދަލުވުމުގައި ވާހަކަ ދައްކަވަނީ
މިދުވަސްވަރު ފެންނަ ޕޮޒިޓިވް ކޭސްތަކުގެ އަދަދު މަދުވަނީ ޓެސްޓް ކުރެވޭ މިންވަރު ވަކި ދަށްވެގެން ނޫންކަމަށް ހެލްތު ޕްރޮޓެކްޝަން އެޖެންސީގެ، ޑރ. އިބްރާހީމް އަފްޒަލް ވިދާޅުވެއްޖެ އެވެ.
ކޮވިޑް-19 ޓާސްކް ފޯހުގެ ފަރާތުން އާދިއްތަ ދުވަހުގެރޭ ކުރިޔަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވީ ސާމްޕަލްވެސް ނެގެނީ އެއްވަރަކަށް ކަމަށާއި ޓެސްޓްތައް ހެދެމުންދަނީ އެއް ވަރަކަށް ކަމަށެވެ.
އެގޮތުން ފާއިތުވި ހަތަރު ދުވަހު ސާމްޕަލް ނެގިފައިވާ ގޮތުގެ ތަފްސީލް ދެއްވަމުން ޑރ އަފްޒަލް ވިދާޅުވީ މެއި މަހުގެ 13 ވަނަ ދުވަހު ނަގާފައިވަނީ 300 ސާމްޕަލް ކަމަށެވެ. އަދި 14 ވަނަ ދުވަހު 555 ސާމްޕަލް ނެގިއިރު 15 ވަނަ ދުވަހު 472 ސާމްޕަލް ނެގިއިރު 16 ވަނަ ދުވަހު 506 ސާމްޕަލް ނެގި ކަމަށް ޑރ އަފްޒަލް ވިދާޅުވި އެވެ.
މީގެއިތުރުން ޑރ. އަފްޒަލް ވިދާޅުވީ މިހާރު ފެންނަ ކްލަސްޓަރ ތަކުގެ ކޮންޓެކްޓްވެސް މަދު ކަމަށެވެ. އަދި ފެންނަ ކޭސްތަކުގެ އަދަދު މަދުވާއިރު މިހާރު ކުރިން ފެންނަ ވަރަށް ބިދޭސީން ޕޮޒިޓިވްވާތަން ނުފެންނަ ކަމަށް ޑރ އަފްޒަލް ވިދާޅުވި އެވެ.
ދުވާލެއްގެ މައްޗަށް ޕޮޒިޓިވްވަމުންދާ ދިވެހިންގެ އަދަދު މިހާރުވެސް އުޅެނީ އެއް ވަރެއްގައި ކަމަށާއި ނަމަވެސް ޕޮޒިޓިވްވާ ބިދޭސީންގެ އަދަދުތައް މަދުވެ ދިވެހިންނާ އެއްވަރަށް މިހާރު އަންނަ ކަމަށް ޑރ. އަފްޒަލް ވިދާޅުވި އެވެ. އަދި މިހާރުވެސް ކުރިޔަށް ގެންދާ ރޭންޑަމް ސާމްޕަލިންގ ހަމަ ކުރިޔަށް ގެންދާނެ ކަމަށާއި ނަމަވެސް ރޭންޑަމް ސާމްޕަލިންގ އިން ވަކި ޕޮޒިޓިވްވާ މިންވަރު އިތުރުވަމުންދާ ކަމަށް ފާހަގަ ނުކުރެވޭ ކަމަށް ޑރ. އަފްޒަލް ވިދާޅުވި އެވެ.
ރާއްޖޭގައި މިހާތަނަށް އައިއިރު 1094 މީހުން ވަނީ ކޮވިޑް-19 އަށް ޕޮޒިޓިވްވެފަ އެވެ. މީގެތެރެއިން 562 މީހުންނަކީ ބަންގްލަދޭޝް މީހުންނެވެ. ކޮވިޑް-19 އަށް ޕޮޒިޓިވްވި ދިވެހިންގެ އަދަދަކީ 388 އަށެވެ. އިންޑިޔާ މީހުންގެ އަދަދަކީ 104 އެވެ. މިހާތަނަށް އައިއިރު 15،274 ސާމްޕަލް ވަނީ ޓެސްޓް ކުރުމަށް ނަގާފަ އެވެ.
