ކޮވިޑްގެ ކަންކަމަށް 814.2 މިލިއަން ރުފިޔާ ހޭދަކޮށްފި
މިއީ އޭގެ ކުރީ ހަފްތާއާއި އަޅާ ބަލާއިރު 22.4 އިންސައްތަ އިތުރު އަދަދެއް
ކޮވިޑާއި ގުޅިގެން މާލޭގައި ބޭއްވި ޑްރިލްއެއްގެ ތެރެއިން - ދެވަނަ ހަފްތާގައި ކޮވިޑަށް ކުރި ހަރަދު ވަނީ 22 އިންސައްތައިން އިތުރުވެފައި
ކޮވިޑަށް 814.2 މިލިއަން ރުފިޔާ ހޭދަކޮށްފައިވާ ކަމަށް ފިނޭންސް މިނިސްޓްރީން ބުނެފިއެވެ.
ފިނޭންސް މިނިސްޓްރީން ނެރުނު ކޮވިޑްގެ ތަފާސް ހިސާބުތައް ދައްކާގޮތުން މި މަހުގެ 7 ވަނަ ދުވަހަށް 2 ހަފުތާ ވަނީ ވެފައެވެ. އަދި މެއި މަހުގެ ހަތްވަނަ ދުވަހާއި ހަމައަށް 814.2 މިލިއަން ރުފިޔާ ޚަރަދު ވެފައިވާ އިރު މިއީ އޭގެ ކުރީ ހަފުތާއާއި އަޅާ ބަލާއިރު 22.4 އިންސައްތަ އިތުރު ޢަދަދެކެވެ.
ކޮވިޑަށް ޚަރަދު ކުރި ތަފާސް ހިސާބުގެ ފުރަތަމަ ހަފުތާގައި ދައްކާ ގޮތުން 665.4 މިލިއަން ރުފިޔާ ވަނީ ޚަރަދު ކޮށްފައެވެ.
ފިނޭންސް މިނިސްޓްރީގެ ތަފާސް ހިސާބުތައް ދައްކާގޮތުން ދެވަނަ ހަފުތާގައި އެންމެ ގިނަ ޚަރަދުތައް ހިނގާފައިވަނީ ހެލްތު މިނިސްޓްރީ އަދި ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިންނެވެ. އެއީ 2 ވަނަ ހަފުތާގެ ޖުމުލަ ޚަރަދުގެ 91.5 އިންސައްތަ އެވެ.
ފުރަތަމަ ހަފުތާއަށްވުރެ ދެވަނަ ހަފުތާގައި ހޭދަކުރި މިންވަރު ވަނީ 148.8 މިލިއަން އިތުރު ވެފައެވެ. ފިނޭންސް މިނިސްޓްރީން ބުނީ ޚަރަދުތައް އިތުރު ވެފައިވަނީ އެންޑިއެމްއޭއިން ޞިއްޙީ އާލާތްތައް ގަތުމަށް ކުރި ޚަރަދު އިތުރުވުމުން ކަމަށެވެ.
ދެވަނަ ހަފުތާގެ ތަފާސް ހިސާބުތައް ދައްކާގޮތުން އެންޑީއެމްއޭއިން ވަނީ 609.5 މިލިއަން ރުފިޔާ ޚަރަދު ކޮށްފައެވެ. ހެލްތު މިނިސްޓްރީން ވަނީ 135.7 މިލިއަން ރުފިޔާ ޚަރަދުކޮށްފަ އެވެ. ދެން އެންމެ ގިނައިން ހޭދަ ކޮށްފައިވަނީ ޕްލޭނިންގ މިނިސްޓްރީންނެވެ. އެ މިނިސްޓްރީން ވަނީ 27.9 މިލިއަން ރުފިޔާ ޚަރަދު ކޮށްފައެވެ.
ސަރުކާރުން ކޮށްފައިވާ ހޭދަތަކަށް ބަލާއިރު އެންމެ ބޮޑު ހޭދައެއް ހިނގާފައިވަނީ ޕާސަނަލް ޕްރޮޓެކްޝަން އިކުއިޕްމެންޓް (ޕީޕީއީ) އާއި ބައްޔަށް ޓެސްޓު ކުރުމާއި ވެންޓިލޭޓަރު ހޯދުމުގެ އިތުރުން ފެސިލިޓީތައް ޤާއިމު ކުރުމަށެވެ. އެގޮތުން ޓެސްޓް ކުރުމާއި އިކުއިޕްމެންޓަށް 389 މިލިއަން ރުފިޔާ ހޭދަކޮށްފައި ވެއެވެ. އަދި ކެޕިޓަލް އިކުއިޕްމެންޓް ނުވަތަ އައިސޮލޭޝަން ފަދަ ޚިދުމަތްތައް ތަކަށް 189 މިލިއަން ހޭދަކޮށްފައިވާ އިރު، އެހީ ބޭނުންވާ ފަރާތްތަކަށް ސަބްސިޑީސްގެ ގޮތުގައި 110 މިލިއަން ރުފިޔާ ވަނީ ދޫކޮށްފަ އެވެ.
