ފާއިތުވި އެއް އަހަރު ދުވަސްތެރޭގައި ދެ ފަހަރަށް ކޮވިޑް ޖެހިފައިވަނީ 208 މީހުންނަށްކަމަށް ހެލްތު ޕްރޮޓެކްޝަން އެެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.
އެޗްއީއޯސީން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި އެޗްޕީއޭ ގެ އެޕިޑަމޮލޮޖިސްޓް ޑރ. އިބްރާހީމް އަފްޒަލް ވަނީ ރާއްޖޭގައި ދެވަނަ ފަހަރަށް މީހުންނަށް ކޮވިޑް ޖެހުނު މީހުންގެ ތަފާސްހިސާބު ހިއްސާކުރައްވާފައެވެ. އެގޮތުން އެންމެ ފުރަތަމަ ރާއްޖޭގައި ކޮވިޑް ޖެހިގެން ރިޕޯޓްކުރި 2020 ވަނަ އަހަރުގެ މަރޗް މަހުން ފެށިގެން މިއަދާ ހަމައަށް އެކި ހަފްތާތަކުގައި ދެވަނަ ފަހަރަށް ކޮވިޑް ޖެހުނު މީހުންގެ ތަފްސީލް ވަނީ ހިއްސާކުރައްވާފައެވެ.
މިހާތަނަށް ހޯދިފައިވާ ހޯދުންތަކުން ކޮވިޑް ޖެހިފައިވާ މީހަކަށް ތިން މަސް ނުވަނީސް ދެ ވަނަ ފަހަރަށް ކޮވިޑް ޖެހުމަކީ ވަރަށް ނާދިރުކަމެކެވެ. އެއީ ކޮވިޑް ޖެހުމާއެކު އެބަލިން ދިފާއުވުމުގެ ބާރު ހަށިގަނޑުގައި ތިން މަސްދުވަހަށް ހުންނަ ކަމަށް ހޯދިފައިވާތީއެވެ. ޑރ އަފްޒަލް ވިދާޅުވީ ރާއްޖޭގައި ދެވަނަ ފަހަރަށް ކޮވިޑް ޖެހިގެން ރިޕޯޓްކޮށްފައިވަނީ އެންމެ ފުރަތަމަ ކޭސް ރިޕޯޓްކުރިތާ 17 ވަނަ ހަފްތާގައި ކަމަށެވެ. ރާއްޖޭގައި އެންމެ ފުރަތަމަ ކޮވިޑްގެ ކޭސް އެއް ރިޕޯޓްކޮށްފައިވަނީ މަރޗް މަހުގެ ފުރަތަމަ ހަފްތާއެވެ. އެހެންކަމުން އެންމެ ފުރަތަމަ ދެވަނަ ފަހަރަށް ކޮވިޑް ޖެހިގެން ރިކޯޑް ކޮށްފައިވަނީ ޖޫން މަހުގެ ފަހު ހަފްތާއެވެ.
ޑރ އަފްޒަލް ވިދާޅުވީ ދެވަނަ ފަހަރަށް ކޮވިޑް ޖެހުމުގެ ކޭސްތައް 2020 ވަނަ އަހަރު މައްޗަށް ދިޔަކަމަށެވެ. އެގޮތުން ބައެއް ހަފްތާތަކުގައި ގާތްގަނޑަކަށް 40ށް އެފަދަ ކޭސް ރިޕޯޓްކޮށްފައިވާ ކަމަށް ޑރ އަފްޒަލް ވިދާޅުވިއެވެ. ނަމަވެސް މިދިޔަ އަހަރުގެ ފަހު ކޮޅުން ފެށިގެން އެފަދަ ކޭސްތައް ވަރަށް މަދުކަމަށް ޑރ އަފްޒަލް ވިދާޅުވިއެވެ.
ނަމަވެސް 2020 ވަނަ އަހަރުގެ ފަހުކޮޅަށް އަޅާފައި ރީއިންފެކްޝަން ކޭސްތައް ވަރަށް މަދު. އަދި މިއަހަރުވެސް ކޭސްތައް ފެނުނު ވަރު މަދު ރީއިންފެކްޝަން. އެންމެ މައްޗަށް އަރާފައި ހުރީ 5 ކޭސް ހަފްތާއަކު މިއަހަރު. ދެން ރީއިންފެކްޝަން ކޭސްތައް މުއްދަތަށް ބަލާއިރު ބަލި ޖެހުނުތާ ކިތަން މަސް ފަހުންތޯ ފެނުނީ ބަލާއިރު ބަލި ޖެހުނުތާ 3 މަސްފަހުން 12 ކޭސް ފެނިފައިވޭ. އެންމެ ދިގު މުއްދަތަކަށް އިނީ 13 މަސް ފަހުން ރީއިންފެކްޓްވެފައި އެންމެ އަވަހަށް ވެފައި ހުރީ 3 މަސްފަހުން. އެންމެ ގިނައިން ރީއިންފެކްޓްވެފައިވަނީ 9 މަސް ފަހުން ބަލިޖެހޭތާ. މިހާރު ރީއިންފެކްޝަން މަދުވެފައިވަނީ ވެކްސިން ޖަހަން ފަށާފައިވާތީޑރ އިބްރާހީމް އަފްޒަލް/ އެޗްޕީއޭގެ އެޕިޑަމޮލޮޖިސްޓް
ކުރިޔަށް އޮތްތަނުގައިވެސް އާބާދީގެ ބޮޑު ބަޔަކަށް ވެކްސިން ޖެހެމުންދިޔުމާއެކު ދެވަނަ ފަހަރަށް ކޮވިޑް ޖެހޭ މީހުންގެ އަދަދު މިހާރަށްވުރެ ދަށް ވާނެކަމަށް ޑރ އަފްޒަލް ވިދާޅުވިއެވެ.
ތަފާސްހިސާބުތަކަށް ބަލާލާއިރު ކޮވިޑް ޖެހުނުތާ 3 މަސް ފަހުން ދެވަނަ ފަހަރަށް ކޮވިޑް ޖެހިފައިވަނީ 12 މީހުންނަށެވެ. ކޮވިޑް ޖެހުނުތާ ހަތަރު މަސް ފަހުން ދެވަނަ ފަހަރަށް ބަލި ޖެހިފައިވަނީ 17 މީހުންނަށެވެ. އަދި ފަސް މަސް ފަހުން 10 މީހުންނަށް ޖެހުނު އިރު ހަ މަސް ފަހުން 25 މީހުންނަށް ޖެހިފައިވެއެވެ. ކޮވިޑް ޖެހުނުތާ ހަތް މަސްފަހުން ދެވަނަ ފަހަރަށް 18 މީހުންނަށް ޖެހުނުއިރު އަށް މަސްފަހުން 35 މީހުންނަށް ޖެހިފައިވެއެވެ. ބަލި ދެ ވަނަ ފަހަރަށް އެންމެ ގިނަ މީހުންނަށް ޖެހިފައިވަނީ ބަލި ޖެހުނުތާ ނުވަ މަސް ފަހުންނެވެ. އެއީ 56 މީހުންނެވެ. ދިހަ މަސް ފަހުން ދެވަނަ ފަހަރަށް 29 މީހުންނަށް ޖެހިފައިވެއެވެ. 11 މަސްފަހުން ބަލި ދެ ވަނަ ފަހަރަށް ޖެހިފައިވަނީ 2 މީހުންނަށެވެ. 12 މަސްފަހުން 3 މީހުންނަށް އަދި 13 މަސް ފަހުން ޖެހިފައިވަނީ އެންމެ މީހަކަށެވެ.
ދެވަނަ ފަހަރަށް ކޮވިޑް ޖެހޭ މީހުންގެ އުމުރުފުރައަށް ބަލާއިރު އެންމެ ގިނައީ ކޮވިޑް އެންމެ ގިނައިން ޖެހިގެން ރިޕޯޓްކުރަމުން އަންނަ އުުމުރުފުރާ ކަމުގައިވާ އުމުރުން 18 އަހަރާއި 45 އަހަރާ ދެމެދުގެ މީހުންކަމަށް ޑރ އަފްޒަލް ވިދާޅުވިއެވެ.
