ކޮވިޑް ޖެހިފައިވާ 12 މީހަކު އައިސީޔޫގައި، 10 މީހުން ވެންޓިލޭޓަރުގައި
30 މެއި 2021 | އާދީއްތަ 02:23ހުޅުމާލެ މެޑިކަލް ފެސިލިޓީގައި 160 މީހަކަށް ފަރުވާދެމުން އާދޭ
ދަރުމަވަންތަ ހޮސްޕިޓަލްގެ 11 ވަނަ ފަންގިފިލާ ވަނީ ކޮވިޑްގެ ބަލި މީހުންނަށް ޚާއްސަކޮށްފައި
ރާއްޖޭގައި ކޮވިޑް-19 ޖެހިގެން ފަރުވާ ހޯދަމުން އަންނަ މީހުންގެ ތެރެއިން 12 މީހުންނަށް އައިސީޔޫގައި ފަރުވާ ދެމުން އަންނަކަމަށާއި 10 މީހުންނަށް ވެންޓިލޭޓަރުގައި ފަރުވާ ދެމުން އަންނަ ކަމަށް ހެލްތު އެމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފިއެވެ.
އެސެންޓަރުން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒު ވަނީ ކޮވިޑް ޖެހިގެން ފަރުވާ ދެމުންދާ މީހުންގެ ތެރެއިން އެކި ފެސިލިޓީތަކުގައި އެޑްމިޓްކޮށްގެން ފަރުވާދެމުންދާ އަދަދުތަކުގެ ތަފްސީލު ދެއްވާފައެވެ. ރާއްޖޭގައި ކޮވިޑް ޖެހިގެން މިވަގުތު 240 މީހަކަށް އެޑްމިޓްކޮށްގެން ފަރުވާދެމުންދެއެވެ.
މީގެތެރެއިން ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި 9 މީހުންނަށް އަންނަނީ ފަރުވާދެމުންނެވެ. އެތަނުގެ އައިސީޔުގައި 3 މީހުންނަށް ފަރުވާދެމުން އަންނައިރު 6 މީހަކަށް ފަރުވާދެމުން އަންނަނީ ވެންޓިލޭޓަރުގައެވެ. މީގެއިތުރުން ހުޅުމާލެ މެޑިކަލް ފެސިލިޓީގައި 160 މީހަކަށް ފަރުވާދެމުން އަންނައިރު އެތަނުގެ އައިސީޔުގައި 9 މީހުން އެބަތިބިއެވެ. އަދި ވެންޓިލޭޓަރުގައި 4 މީހަކަށް އަންނަނީ ފަރުވާދެމުންނެވެ.
މީގެއިތުރުން ދަރުމަވަންތަ ހޮސްޕިޓަލްގެ 17 ވަނަ ފަންގިފިލާގައި އަންނަނީ 7 މީހަކަށް ފަރުވާދެމުންނެވެ. އަދި އެހޮސްޕިޓަލްގެ 16 ވަނަ ފަންގިފިލާގައި 5 މީހަކަށް އަންނަނީ ފަރުވާދެމުންނެވެ. އައިޖީއެމްއެޗްގެ ހިޔަލަ ވިންގުގައި 7 ކުއްޖަކަށް އަންނަނީ ފަރުވާދެމުންނެވެ. މިފަހުން ކޮވިޑްގެ ބަލި މީހުންނަށް ފަރުވާދިނުމަށް ހާއްސަކޮށްފައިވާ ހުޅުމާލެ ހޮސްޕިޓަލްގައި 34 މީހަކަށް އަންނަނީ ފަރުވާދެމުންނެވެ.
ރާއްޖޭގައި މިވަގުތު އެކްޓިވް ކޭސްތަކުގެ ގޮތުގައި 24،507 ކޭހެއް އަންނަނީ ރިޕޯޓްކުރަމުންނެވެ. މީގެތެރެއިން އައިސޮލޭޝަން ފެސިލިޓީތަކުގައި މީހުން ތިބި އަދަދުތަކަށް ބަލާއިރު ޖުމްލަ 133 މީހުން އައިސޮލޭޝަން ފެސިލިޓީތަކުގައި ތިބި ކަމަށް މަބްރޫކް ވިދާޅުވިއެވެ. އޭގެތެރެއިން ވެލިދޫ އައިސޮލޭޝަން ފެސިލިޓީގައި 5 މީހުން ތިބިއިރު ފަރުކޮޅުގައި ގާއިމުކޮށްފައިވާ ފެސިލިޓީގައި 66 މީހުން އަދި ހިޔާ އައިސޮލޭޝަންގައި 46 މީހަކު އެބަތިއްބެވެ. ހޮރައިޒަން އައިސޮލޭޝަން ފެސިލިޓީގައި 16 މީހަކު އެބަތިއްބެވެ.
މެއި މަހަކީ ރާއްޖޭގައި ކޮވިޑްގެ ހާލަތު އެންމެ ގޯސްވި މަހެވެ. ކޮވިޑްގެ ހަތަރު ވަނަ ރާޅަކާ ކުރިމަތިލާފައިވާއިރު ހާހަކަށްވުރެ މަތިން ކޭސްތައް ރިޕޯޓްތައް ކުރަމުން އަންނަތާ ވަނީ ތިން ހަފްތާވެފައެވެ. އަދި މިބަލީގައި ދުވާލެއްގެ މައްޗަށް މަރުވާ މީހުންގެ އަދަދުވެސް ވަނީ އިތުރުވެފައެވެ. އެގޮތުން މިހާތަނަށް އެއް ދުވަހާ އެންމެ ގިނަ މީހުން މަރުވެގެން ރިޕޯޓްކުރި ދުވަހު 13 މީހުން ވަނީ މަރުވެފައެވެ.
ކޮވިޑްގެ ހާލަތު ގޯސްވަމުން ދިޔުމާއެކު މުޅި ރާއްޖޭގައި ވަނީ ބަލި ފެތުރުން ކޮންޓްރޯލްކުރުމަށް ފިޔަވަޅުތައް ވަރުގަދަކޮށްފައެވެ.
