އޭޕްރީލް މަހުގެ 14 ވަނަ ދުވަހުގެ ފަހުން އިންޑިޔާގައި ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު އެންމެ މަދުން ރިޕޯޓު ކޮށްފައިވަނީ ހުކުރު ދުވަހުއެވެ.

ހުކުރު ދުވަހު އިންޑިޔާގެ ހެލްތު މިނިސްޓްރީން ހާމަކޮށްފައިވާ ތަފާސްހިސާބުތަކަށް ބަލާއިރު އެދުވަހު ކޮވިޑް ޖެހިފައިވަނީ 186،364 މީހުންނަށެވެ. މިއީ އިންޑިޔާއަށް ކުރިމަތިވެފައިވާ ކޮވިޑްގެ ނުރައްކާތެރި ދެވަނަ ރާޅުގައި ދެ ލައްކައަށްވުރެ މަދުން ރިކޯޑު ކުރި މަދު ދުވަސްތަކުގެ ތެރެއިން ދުވަހެކެވެ. އެގައުމުގައި ކޮވިޑް ޖެހޭ މީހުންގެ އަދަދު ދުވާލެއްގެ މައްޗަށް ހަތަރު ލައްކައިން ވަނީ ރިޕޯޓު ކޮށްފައެވެ.

ހުކުރު ދުވަހު އެގައުމުގައި ކޮވިޑް ޖެހިގެން 3660 މީހުން ވަނީ މަރުވެފައެވެ. މިއާއެކު އެގައުމުގައި ކޮވިޑް ޖެހުނު މީހުންގެ އަދަދު ވަނީ 27.5 މިލިއަނަށް އަރާފައެވެ. އަދި މަރުވި މީހުންގެ އަދަދު ވަނީ 318،895ށް އަރާފައެވެ.

އިންޑިޔާގެ ރަސްމީ ފަރާތްތަކުން ހާމަކުރަމުންދާ ތަފާސްހިސާބުތަކުން ދައްކާގޮތުގައި ފާއިތުވި ދުވަސްތަކުގައި އެގައުމުގައި ކޮވިޑް ޖެހޭ މީހުންގެ އަދަދު ވަނީ ދަށަށްދާން ފަށާފައެވެ. ނަމަވެސް އިންޑިޔާގެ ފަގީރު ހިސާބުތަކާއި އަވަށްތަކުގައި އެކަށީގެންވާ މިންވަރަށް ޓެސްޓު ކުރެވެމުން ނުދާކަމުގެ ކަންބޮޑުވުން އަންނަނީ ފާޅުކުރަމުންނެވެ.

ދުނިޔޭގައި ދެވަނަ އަށް އެންމެ އާބާދީ ބޮޑު ގައުމުގައި ދުވާލެއްގެ މައްޗަށް އެންމެ ގިނަ އަދަދެއްގެ މީހުން މިބަލީގައި މަރުވެގެން ރިޕޯޓުކޮށްފައި ވަނީ ހިނގަމުންމިދާ މެއި މަސްތެރޭގައެވެ. އިންޑިޔާގައި ކޮވިޑްގެ ހާލަތު ގޯސްވެފައިވާއިރު އިންޑިޔާ ހިމެނޭ ދެކުނު އޭޝިޔާގެ ގައުމުތަކުގައިވެސް ވަނީ ކޮވިޑްގެ ހާލަތު ގޯސްވެފައެވެ. އެގޮތުން މިސަރަހައްދުން ކޮވިޑް ޖެހުނު މީހުންގެ އަދަދު ވަނީ 30 މިލިއަނަށް އަރާފައެވެ.

އިންޑިޔާ، ބަންގްލަދޭޝް، ޕާކިސްތާން، ބޫޓާން، ނޭޕާލް، ސްރީލަންކާ އަދި ދިވެހިރާއްޖެ އަކީ މުޅި ދުނިޔެއިން މިހާރު ފެންނަމުންދާ ކޮވިޑް ކޭސްތަކުގެ 18 އިންސައްތަ ހިއްސާކުރާ ގައުމުތަކެވެ. އަދި މަރުވާ މީހުންގެ 10 އިންސައްތަ ހިއްސާކުރަމުން އަންނަނީ މިގައުމުތަކުންނެވެ.

މިމަސްތެރޭގައި އިންޑިޔާއިން ވަނީ އުމުރުން 18 އަހަރުން މަތީގެ އެންމެންނަށް ވެކްސިން ދިނުމުގެ ޕްރޮގްރާމް ފަށާފައެވެ. ނަމަވެސް ވެކްސިންގެ ޑިމާންޑް އޮތްމިންވަރަށް އެގައުމަށް ވެކްސިން ލިބުމުގައި ވަނީ ދަތިތައް ކުރިމަތިވެފައެވެ. އިންޑިޔާއަކީ ދުނިޔޭގެ ނިސްބަތުން އެންމެ ގިނަ އަދަދަކަށް ވެކްސިން އުފައްދަމުން އަންނަ އެއް ގައުމުވެސްމެއެވެ.

އިންޑިޔާއިން މިހާތަނަށް އައިއިރު ޖަހަމުން އަންނަނީ ތިން ވެކްސިނެކެވެ. އެއީ އިންޑިޔާގައި އުފައްދަމުން އަންނަ ކޮވިޝީލްޑް ވެކްސިނާއި ކޮވެކްސިން ވެކްސިން އަދި ރަޝިޔާއިން އުފައްދާފައިވާ ސްޕަޓްނިކް-ވީ ވެކްސިނެވެ.

1.3 ބިލިއަން މީހުން ދިރިއުޅެމުން އަންނަ އިންޑިޔާގެ އާބާދީގެ ތެރެއިން ވެކްސިން ދެވިފައިވަނީ އެންމެ 3 އިންސައްތަ މީހުންނަށް ކަމަށް ވުމާއެކު އެގައުމުގެ ބޮޑު ވަޒީރު ނަރެންދްރަ މޯދީއަށް ވަނީ ގިނަ ބަޔެއްގެ ފާޑުކިޔުންތައް އަމާޒުވެފައެވެ. ދުނިޔޭގައި އެންމެ ގިނަ އަދަދަކަށް މީހުންނަށް ކޮވިޑް ޖެހިގެން ރިޕޯޓުކުރަމުން އަންނަ 10 ގައުމުތެރޭގައި އެގައުމު ހިމެނޭއިރު އެންމެ މަދުން ވެކްސިން ދެވުނު ގައުމުތަކުގެ ތެރޭގައި އިންޑިޔާ ހިމެނެއެވެ.

އިންޑިޔާގެ ރައްޔިތުންނަށް ވެކްސިން ފޯރުކޮށްދިނުމަށްޓަކައި މާޗު މަހުން ފެށިގެން އެގައުމުން ވަނީ އެހެން ގައުމުތަކަށް ވެކްސިން ފޯރުކޮށްދިނުން މެދުކަނޑާލާފައެވެ. މިއާއެކު ދެކުނު އޭޝިޔާގެ ގައުމުތަކަށް ވަނީ ވެކްސިން ލިބުމުގެ ދަތިތަކާ ކުރިމަތިވެފައެވެ.

މިހާތަނަށް އައިއިރު ދެކުނު އޭޝިޔާގެ ގައުމުތަކުގައި ދީފައިވަނީ 219.7 މިލިއަން ވެކްސިން ޑޯޒެވެ.