ފަލަސްތީނަށް އަވަސް އެހީގެ ގޮތުގައި 95 މިލިއަން ޑޮލަރުގެ އެހީ ހޯދުމަށް މަސައްކަތް ކުރަނީ
28 މެއި 2021 | ހުކުރު 17:13ގާޒާއަށް ލިބިފައިވާ ގެއްލުން ދިރާސާ ކުރެވޭނީ މިހާރުން މިހާރަށް ގަޒާ ރައްޔިތުންނަށް ބޭނުންވާ ސާމާނު ހޯދުމަށް ފަހު
ގާޒާގައި ގެދޮރު ގެއްލިފައިވާ އާއިލާއެއް
ކުރިޔަށް އޮތް ތިންމަސް ދުވަހުގެ ތެރޭގައި ފަލަސްތީނުގެ ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމަށް 95 މިލިއަން ޑޮލަރު ހޯދުމަށް އދ. އިން މަސައްކަތް ފަށައިފިއެވެ.
އިސްރާއީލުގެ ޔަހޫދީ ސިފައިން ގާޒާއަށް ދިން އުދުވާނީ ހަމަލާގައި ގާޒާ ސުންނާފަތިވެފައިވާއިރު، އެތައްހާސް ބައެއްގެ ގެދޮރު ވަނީ ގެއްލިފައެވެ. އަދި އެ ހަމަލާތަކުގައި މަދަރުސާތަކާއި، ވިޔަފާރިތަކާއި، އަދި ކާރުހާނާތައް ވެސް ވަނީ ބިމާއި ހަމަވެފައެވެ.
އދ އިން ފަލަސްތީނުގެ ސަރަހައްދުތަކަށް އިންސާނީ އެހީތެރިކަން ފޯރުކޮށްދިނުމުގެ މަސައްކަތާ ހަވާލުވެ ހުންނެވި ލީން ހޭސްޓިންގްސް ވިދާޅުވީ ގާޒާގެ ރައްޔިތުންނަށް މިހާރުން މިހާރަށް އެހީތެރިކަން ފޯރުކޮށްދިނުމަށް 95 މިލިއަން އެމެރިކާ ޑޮލަރު ބޭނުންވާ ކަމަށެވެ. ލީން މިހެން ވިދާޅުވީ ގާޒާއަށް ލިބިފައިވާ ގެއްލުން ބައްލަވާލައްވަން އެ ކަމަނާ ގާޒާއަށް ކުރެއްވި ޒިޔާރަތައް ފަހުގައެވެ. ލީން ވިދާޅުވީ ގާޒާއަށް ލިބިފައިވާ ގެއްލުންތައް ދިރާސާކުރެވޭނީ މިހާރުން މިހާރަށް އާންމުންނަށް ބޭނުންވާ ސާމާނު ހޯދުމަށް ފަހުގައި ކަމަށެވެ. އެގޮތުން މިހާރު އެންމެ ބޮޑަށް ބޭނުންޖެހިފައިވަނީ ކާބޯތަކެއްޗާއި، ބޭހާއި، ސިއްހީ ސާމާނުގެ އިތުރުން ބައެއް އިމާރާތްތައް މަރާމާތުކުރުމަށް ކަމަށް އެކަމަނާ ވިދާޅުވިއެވެ. މިހާތަނަށް އަދ. އިން 22.5 މިލިއަން އެމެރިކާ ޑޮލަރުގެ އެހީތެރިކަން ގާޒާއަށް ވަނީ ފޯރު ކޮށްދީފައެވެ.
ގާޒާއަށް މިހާރުން މިހާރަށް އެހީތެރިކަން ބޭނުންވާ ކަމަށް އދ. އިން ބުނެފައިވާއިރު، އިސްރާއީލުގެ ރަހުމަތްތެރި ގައުމު އެމެރިކާއިން ވަނީ ފަލަސްތީނަށް އެހީވާނެ ކަމަށް ބުނެފައެވެ.
