ހިޔާލު ފާޅުކުރުމުގެ މިނިވަންކަން ދިނުމަށް ޓުވިޓަރއިން އިންޑިއާ ސަރުކާރަށް ގޮވާލައިފި
28 މެއި 2021 | ހުކުރު 07:02ބައެއް މީހުން ކޮށްފައިވާ ޕޯސްޓްތައް ނެގުމަށް އެދިފައިވޭ
އިންޑިއާ ސަރުކާރުން ވަނީ ޓުވިޓަރއަށް އިންޒާރުދީފައި
ހިޔާލު ފާޅުކުރުމުގެ މިނިވަން ދިނުމަށް ޓުވިޓަރއިން އިންޑިއާ ސަރުކާރަށް ގޮވާލައިފިއެވެ.
އިންޑިއާގެ މައުލޫމާތު ފެތުރުމުގެ ސިޔާސަތުތަކާ ދެކޮޅަށް ޓުވިޓަރއިން ފުރުސަތު ދޭ ކަމަށް ބުނެ އިންޑިއާ ސަރުކާރުން ވަނީ ޓުވިޓަރއަށް އިންޒާރު ދީފައެވެ. އިންޒާރު ދީ ފޮނުވާފައިވާ ނޯޓިސްގައި ބުނެފައިވަނީ ކޮވިޑު ކޮންޓްރޯލް ކުރުމަށް ސަރުކާރުން ނުކުޅެދިފައިވާ ކަމަށް ބުނެ ފާޑުކިޔާފައިވާ އަދި ދަނޑުވެރިން ކުރަމުންދާ މުޒާހަރާތަކާ ގުޅިގެން ވެސް ކޮށްފައިވާ ޕޯސްޓްތައް ނެގުމަށް އެދިފައެވެ. މި ޕޯސްޓްތައް ކުރި ފަރާތްތަކުގެ ތެރޭގައި ބައެއް އެކްޓިވިސްޓުންނާއި ނޫސްވެރިންނާއި ސިޔާސީ މީހުން ވެސް ހިމެނެއެވެ.
އިންޑިއާ ސަރުކާރުން ކޮވިޑް-19 ކޮންޓްރޯލް ކުރުމަށް އަޅަމުންދާ ފިޔަވަޅުތަކަށް ވަރަށް ގިނަ ބަޔެއްގެ ފާޑުކިޔުންތައް އަމާޒުވެފައިވާއިރު އެފަރާތްތަކުން އަންނަނީ މި ޝުއޫރުތައް ސޯޝަލް މިޑީއާގެ އެކި އޮންލައިން ޕްލެޓްފޯމްތަކުގައި ހިއްސާކުރަމުންނެވެ. މިކަމާ ގުޅިގެން އިންޑިއާ ސަރުކާރުން ބުނީ އެއްވެސް އަސާސެއް ނެތް ގޮތަށް ބައެއް މީހުން ވާހަކަ ދައްކަމުންދާ ކަމަށާއި ސާބިތު ނުހިފޭ ގޮތަށް ވާހަކަ ނުދެއްކުމަށް ވެސް އެދޭ ކަމަށެވެ.
އިންޑިއާގެ ޤާނޫނު ބުނާ ގޮތުން އިންޑިއާގައި ގާއިމުވެފައި ތިބޭ ޓުވިޓަރގެ އިސްވެރިން މިފަދަ ޕޯސްޓްތަކަށް ފުރުސަތު ދޭ ކަަމަށްވާނަމަ ހަތް އަހަރުގެ ޖަލު ހުކުމެއް ތަންފީޒު ކުރުމުގެ ބާރު ވެސް އިންޑިއާ ސަރުކާރަށް ލިބިގެންވެއެވެ.
ޓުވިޓަރއިން މިހެން ބުނެފައިވާއިރު އިންޑިޔާގައި އެންމެ ފަހުން އުފެދިގެން އުޅޭ އަދި އެންމެ ހަލުވިކޮށް ފެތުރެމުންދާ ކޮވިޑްގެ ބާވަތަށް، "އިންޑިޔާ ވޭރިއެންޓް" ކިޔުން ހުއްޓުވުމަށް، ސޯޝަލް މީޑިއާގެ ޕްލެޓްފޯމްތައް ހިންގާ ކުންފުނިތަކަށް، އިންޑިއާ ސަރުކާރުން ވަނީ ބާރު އަޅަން ފަށާފައެވެ. އިންޑިޔާ އިން ބުނާ ގޮތުގައި، އެ ގައުމަށް ނިސްބަތްކުރި ކަމުގައި ވިޔަސް، ކޮވިޑް-19 އިން އެންމެ ފަހުން އުފެދުނު ވޭރިއަންޓްގެ ސައިންޓިފިކް ނަމަކީ އެއީއެއް ނޫނެވެ. އަދި އިންޑިޔާއާ ގުޅުވައިގެން އެ ނަން ބޭނުންކުރާތީ، އެގައުމުގެ ތަސައްވަރު ހުތުރުވަމުންދާ ކަމަށް ވެސް އިންޑިޔާއިން ބުނެއެވެ.
