ގަތަރު މައްސަލައިގައި މެދުވެރިއެއްގެ ރޯލު ކުޅެދިނުމަށް މޮރޮކޯއިން ވެސް ހުށަހަޅައިފި
12 ޖޫން 2017 | ހޯމަ 05:52މޮރޮކޯގެ ރަސްގެފާނު މުހައްމަދު ހަވަނަ ގެންދަވަނީ ގަލްފުގެ ގައުމުތަކާއެކު ގާތްގުޅުންތަކެއް ބާއްވަމުން
މޮރޮކޯގެ ރަސްގެފާނު މުހައްމަދު ހަވަނަ ގެންދަވަނީ ގަލްފުގެ ގައުމުތަކައެކު ގާތްގުޅުންތަކެއް ބާއްވަމުން
ޤަތަރު އަދި އެގައުމާ ގުޅުން ކަނޑާލައި ދަތިކުރުމުގެ ފިޔަވަޅުތައް އަޅާފައިވާ ގަލްފްގެ އަރަބި ތިން ގައުމާއެކު ވާހަކަދެއްކުމަށް މެދުވެރިއެއްގެ ދައުރު އަދާކުރުމަށް މޮރޮކޯގެ ރަސްގެފާނު މުހައްމަދު ހަވަނަ ހުށަހަޅުއްވައިފިއެވެ.
މޮރޮކޯގެ މިނިސްޓްރީ އޮފް ފޮރިން އެފެއަރޒް އެންޑް އިންޓަރނޭޝަނަލް ކޯޕަރޭޝަނުން އާދިއްތަ ދުވަހު ނެރެފައިވާ ބަޔާނެއްގައި ބުނީ އެ މައްސަލައިގައި "ބިނާކުރަނިވި އަދި ވަކިއަތަކަށް ނުޖެހޭ" ދައުރެއް އަދާކުރުމަށް އެ ގައުމުން ތައްޔާރު ކަމަށެވެ.
މޮރޮކޯގެ ރަސްގެފާނު މުހައްމަދު ހަވަނަ އަދި އެ މަނިކުފާނުގެ އަޚުން ކަމަށްވާ ގަލްފްގެ ރަސްރަސްކަލުން އަދި އަމީރުންނާ އެކު އޮތް ގާތް ގުޅުމަށްބަލައި އެ ގައުމުން އަވަސް އަރުވާލައިގެން ބަޔާނެއް ނުނެރުނީ އެކަމުގެ ސަބަބުން މައްސަލަ އިތުރަށް ގޯސްވެދާނެތީ ކަމަށް ބަޔާނުގައި ބުނެފައި ވެއެވެ.
މީގެ އިތުރުން" ޚިލާފުތައް ކުޑަކޮށް މައްސަލައިން އަރައިގަތުމުގައި ގަލްފު ކޯޕަރޭޝަންގެ މެދުގައި އަބަދުވެސް އިސްކަންދޭ އުސޫލުން ހިކުމަތްތެރިކަން އިސްކުރުމަށް ރަސްގެފާނު ގޮވާލެއްވި ކަމަށް ބަޔާނުގައި ވެއެވެ.
ހުސްވި ހަފްތާގެ ހޯމަ ދުވަހު، މިސްރާއި ޔުނައިޓެޑް އެރަބް އެމިރޭޓްސް އާއި ބަހްރޭން އަދި ބައެއް އެހެން ގައުމުތަކުން ކުއްލި ގޮތަކަށް ގަތަރާ ގުޅުން ކަނޑާލީ ގަތަރުން ޓެރަރިޒަމަށް ވާގިވެރިވާ ކަމަށް ތުހުމަތު ކޮށްފައެވެ.
މީގެ ކުރިން ކުވެއިތުގެ ފަރާތުން ވެސް ވަނީ މެދުވެރިއެއްގެ ދައުރު އަދާކުރުމަށް ހުށަހަޅައި އަދި އެ ގައުމުގެ އަމީރު ސައުދީއާ ޤަތަރާއި ޔޫއޭއީއަށް ވަޑައިގެން މަޝްވަރާކުރައްވާފައެވެ.
