ކޮވިޑް-19 ބަލީގެ މީހުންނަށް އައިސީޔޫގައި ފަރުވާދެނީ ޤުރުއާން ޖަހައިގެން

"މީގެ ނަތީޖާ ވަރަށް ރަނގަޅު. ވެންޓިލޭޓަރަށްލައި އެއްވެސް ބޭހަކަށް ވެސް ނުގުޑާ ބަލި މީހާ ސޫރަތުއް ރަޙްމާން ޖަހައިގެން އެ އަޑު އަހައިގެން އެބަ ރަނގަޅުވޭ." ޕާކިސްތާނުގެ ހޮސްޕިޓަލެއްގެ އައިސީޔޫގައި މަސައްކަތްކުރާ ޑޮކްޓަރެއް، އެ ގައުމުގެ ޓީވީއަކަށް ދިން އިންޓަވިއުއެއްގައި ބުންޏެވެ.

އާންމުކޮށް ދުނިޔޭގެ އެއްވެސް ހިސާބަކުން ނުފެންނަ މަންޒަރެކެވެ. މުޅި ދުނިޔެ މި ކޮވިޑް-19 ބަލީގައި ޖެހި ކުޑަކަކޫ މައްޗަށް ތިރިވެފައިވާއިރު، އެކި ގައުމުތަކުން އެމީހުންގެ ދީނަށް ބޯ ލެނބުމުގައި އަވަދިނެތި ގޮސް ނަޖިހުން ފެންވަރާއިރު ވެސް، އަދި އިސްލާމީ ގައުމަކުން މިފަދަ މަންޒަރެއް މި ނޫނީ ނުދެކެމެވެ. ދިވެހި ރާއްޖެ އަކީ ވެސް ސައްތައިން ސައްތަ މުސްލިމް ގައުމަކަށް ވާއިރު މި ގައުމުން ވެސް އަދި ސައުދީ ފަދަ ބޮޑެތި އިސްލާމީ ގައުމުތަކުން ވެސް ނުފެންނަ މަންޒަރެއް މި ދައްކުވައިދިނީ ހިންދޫންނާއި މުސްލިމުން ދިރިއުޅެމުން އަންނަ ޕާކިސްތާނުންނެވެ.

ޕާކިސްތާނުގެ ލާހޯރުގެ ހޮސްޕިޓަލުގައި މިކަން މިގޮތަށް މި ކުރަނީ އަލަކަށް ނޫނެވެ. ރިޕޯޓުތައް ބުނާގޮތުން އެ ހޮސްޕިޓަލުގައި އަބަދުވެސް ބަލި މީހުންނަށް ފަރުވާދެމުން އަންނަނީ ޤުރުއާން ޖަހައިގެންނެވެ. އަދި ބައެއް ޑޮކްޓަރުން ބަލި މީހުންނަށް ބޭސް ދޭއިރު އޭގައި ކީރިތި ޤުރުއާނުގެ ވަކި ސޫރަތްތަކެއް ކިޔަވަން ހިމަނާ ކަމަށް ވެސްވެއެވެ. އެމީހުންގެ ހިތްތަކުގައި ޤުރުއާނަށް އޮތް ލޯތްބާއި ގަދަރު އަދި ޤުރުއާނާއި މެދު އޮތް ޔަގީންކަން މިކަމުން ވެސް ހާމަވެއެވެ.

ކޮންމެއަކަސް މިކަން ވައިގަ ހިފައިގެން އާންމުންގެ ތެރެއަށް ހާމަވެފައި މިވަނީ ކޮވިޑް-19ގެ މި އާލަމީ ވަބާގެ ތެރެއިންނެވެ. މި ބަލީގައި އެ ގައުމުން ވެސް އެތައް ބަޔަކު މަރުވެ، އެތައް ބަޔަކަށް މިހާރު ވެސް ފަރުވާދެމުން އަންނައިރު، ލާހޯރް ސަރވިސަސް ހޮސްޕިޓަލުގެ އައިސީޔޫގައި ފަރުވާ ދެމުން އަންނަނީ އެތަނުގައި ސޫރަތުއް ރަޙްމާން ޖަހައިގެންނެވެ. މިސޫރަތަކީ ޝިފާގެ ސޫރަތެކެވެ. މިސޫރަތް ކިޔަވާ އަދި އާދަކޮށް އަޑު އަހާ މީހުންނަށް ބަލިތަކުން އަވަސް ޝިފާ ލިބޭ ކަމަށް ވެއެވެ. އަދި ހިތުގެ ނުތަނަވަސްކަން ފިލައިދާ ކަމަށްވެސް ވެއެވެ.

ޕާކިސްތާނުގެ ލާހޯރް ސަރވިސަސް ހޮސްޕިޓަލުގައި މިސޫރަތް ޖަހައިގެން ބަލި މީހުންނަށް ފަރުވާދިނުމުގައި ވަކި މީހަކު އިސްތިސްނާ ވުމެއް ނެތެވެ. މުސްލިމަަކަސް ކާފިރަސް އެތަނުގައި އެމީހުންނަށް

މިސޫރަތް ޖަހާ އަޑު އިއްވައެވެ. ހޮސްޕިޓަލުގައި މަސައްކަތްކުރާ ޑޮކްޓަރުން ބުނާ ގޮތުގައި އިސްލާމްދީން ގަބޫލު ނުކުރިޔަސްވެސް މި ސޫރަތް ޖަހާ އަޑު އިއްވުމުން އެމީހުން ބަލިން ރަނގަޅުވާލެއް އަވަސް ކަމަށް ޑޮކްޓަރުން ބުނެއެވެ. އެމީހެއްގެ މައްޗަށް ޤުރުއާން އަސަރުކުރުމުގައި އެއީ ކޮން ދީނެއްގެ މީހެއްތޯ ބެލުމެއް ނެތެވެ.

"ބައެއް މީހުން އެބަތިބި ހަމަ މެޑިކަލް ސައިންސް އެއްކޮށް އުންމީދު ކަނޑާލާފައ ތިބި މީހުން. އެކަމަކު ހަމަ މިސޫރަތް އަޑު އަހައިގެން ރަނގަޅުވެފަ އެތިބީ." އެ ހޮސްޕިޓަލްގެ އައިސީޔޫގައި މަސައްކަތްކުރާ ޑޮކްޓަރެއް އެ ގައުމުގެ ޓީވީއަކަށް ދިން އިންޓަވިއުއެއްގައި ބުންޏެވެ.

ބަލި މީހުންގެ ގަބޫލުކުރުންތައް ވެސް ހަމަ އެފަދައެވެ. ހޮސްޕިޓަލުގެ އައިސީޔޫއާ ހަމައަށް ގެންދިޔައިރު ވާހަކަވެސް ނުދެއްކޭ މީހަކު ގަދަވެ ނިކުމެ އޭނާ ވެސް ބުނީ އެތަނުގައި ޤުރުއާން ޖަހާފައި ހުންނަ އަޑު އިވުމަކީ ބަލިން ރަނގަޅުވުމަށް އޭނާ އަށް ލިބުނު އެންމެ ބޮޑު ހިތްވަރު ކަމަށެވެ. ޑޮކްޓަރުން ރެއާއި ދުވާލު ކުރި މަސައްކަތްތަކުގެ އިތުރުން އޭނާ ބަލިން ރަނގަޅުވުމުގެ އެންމެ ބޮޑު ބައެއް އަދާކުރި އެއް ކަމަކީ ކީރިތި ޤުރުއާން ކަމަށް އޭނާ ގަބޫލުކުރެއެވެ.

ހޮސްޕިޓަލުގެ އައިސީޔޫގައި މިސޫރަތް ޖެހުން އެކަންޏެއް ނޫނެވެ، މުޅި ހޮސްޕިޓަލާއި، ވަކިން ޚާއްސަކޮށް އައިސީޔޫގެ ފާރުތަކުން ވެސް ފެންނަން ހުރީ ކީރިތި ޤުރުއާނުގެ އެކި ސޫރަތްތައް ތަތްކޮށްފައި ހުރި މަންޒަރެވެ.

ޝައްކެއް ވެސް ނެތެވެ. ޤުރުއާނަކީ ޝިފާއެކެވެ. އިންސާނަކަށް ކުރިމަތިވާނެ ކޮންމެ މުސީބާތަކާއި އޭގެ ޝިފާ ޤުރުއާނުގައި ބަޔާންވެގެންވެއެވެ. އެކަމާ މެދު އެއްވެސް ސުވާލެއް ވެސް ނެތެވެ. ކީރިތި ޤުރުއާން އަޑު އެހުމަކީ ކިޔެވުމަކީ އަބަދުވެސް ހިތަށް ފިނިކަން ގެނުވާ ކަމެކެވެ. ހިތަށް ހަމަޖެހުން ގެނުވާ ކަމެކެވެ. އުދާސްތަކާ މީހާ ދުރުވެ ދިރިއުޅުމަށް އުޖާލާކަން ގެނުވާ ކަމެކެވެ. މިކަން ދޮގުކުރެވޭނެ މީހަކު ނުހުންނާނެއެވެ.. ކީރިތި ޤުރުއާނުގެ ބޭނުން މިގޮތުގައި ހިފަނީ ކިތައް މީހުންބާއޭ ހިތައް އަރައެވެ.