ތޫނު އެއްޗެހި ރަނގަޅަށް ބަންދުނުކޮށް ނެރުމުގެ ސަބަބުން ވެމްކޯގެ މުވައްޒަފުންނަށް ސީރިއަސް އަނިޔާތަކެއް
ވެމްކޯގެ މުވައްޒަފެއްގެ އަތަށް ތޫނު ބިއްލޫރި ފަދަ އެއްޗެއް ހެރި ބޮޑެތި ގެއްލުންތަކެއް ވެފައިވޭ
ވެމްކޯގެ މުވައްޒަފުން ކުނި އުކާލުމުގައި ހަރަކާތްތެރިވަނީ
ގޭބިސީތަކުން ކުނި ނެގުމަށް ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)އިން އާންމުކޮށްފައިވާ ކުނި ބަންދުކުރުމުގެ މިންގަނޑަށް ގިނަ ފަރާތްތަކަކުން އަމަލުނުކުރާ މައްސަލަ އިތުރުވެފައިވާކަމަށް ވެމްކޯއިން ބުނެފިއެވެ.
ވެމްކޯއިން އެކަމާއި ގުޅިގެން ނެރެފައިވާ ނޫސްބަޔާނެއްގައި ބުނެފައިވަނީ މެއި މަހުގެ 26 ވަނަ ދުވަހުގެ ރޭ 11 ޖެހިއިރު މާލެ ސިޓީގެ ގެއަކުން ނެރެފައިހުރި ޑަސްބިންއެއްގައި އޮތް ކުނި ކޮތަޅެއް ނެގުމުގައި ހަރަކާތްތެރިވި ވެމްކޯގެ މުވައްޒަފަކަށް ސީރިއަސް އަނިޔާތަކެއް ވެފައިވާކަމަށެވެ. އެގޮތުން އެމަސައްކަތުގައި އުޅުނު ވެމްކޯގެ މުވައްޒަފެއް ކަމުގައިވާ އަފްރާހު މޫސާގެ އަތަށް ތޫނު ބިއްލޫރި ފަދަ އެއްޗެއް ހެރި އެއަތުގެ ނާރަށް ބޮޑެތި ގެއްލުންތަކެއް ވެފައިވާކަމަށް ވެމްކޯއިން ބުނެއެވެ.
މީގެއިތުރުން މެއި މަހުގެ 27 ވަނަ ދުވަހުގެ ނިޔަލަށް މާލެ ސަރަހައްދުގައި މަސައްކަތްކުރާ ވެމްކޯގެ މުވައްޒަފުންނަށް މިފަދަ އިތުރު ތިން ހާދިސާއަކާއި ކުރިމަތިލާންޖެހި އެކި ވަރުގެ ހާނިއްކައާއި އަނިޔާތައް ލިބިފައިވާކަމަށް ވެމްކޯއިން ބުނެއެވެ.
ވެމްކޯއިން އިތުރަށް ބުނީ ކުނި ނެގުމުގެ ބުރަ މަސައްކަތުގައި ހަރަކާތްތެރިވަމުން އަންނަ ވެށިފާރަވެރިންނަކީ އެކުންފުންޏާއި ހަވާލުކުރެވިފައިވާ އެންމެ ބޮޑު ޒިންމާ ކަމުގައިވާ ކުނި ނެގުމާއި ކުނި މެނޭޖްކުރުމުގެ މަސްއޫލިއްޔަތު ފުރިހަމަކުރުމުގައި އެންމެ އިސް ސަފުގައި ހަރަކާތްތެރިވަމުންދާ އެކުންފުނީގެ ފަޚުރުކަމަށެވެ. އަދި މުވައްޒަފުންގެ ރައްކާތެރިކަމަށްޓަކައި ވެމްކޯއިން ދަނީ މަސައްކަތުގައި މަޝްއޫލުވެއުޅޭ ކޮންމެ ފަރާތަކަށް ރައްކާތެެރިކަމުގެ އަންގި، މާސްކު އަދި އެހެނިހެން އާލާތްތައް ފޯރުކޮށްދެމުން ކަމަށެވެ.
އެހެންނަމަވެސް ގިނަ އަދަދެއްގެ ކަސްޓަމަރުން ވެމްކޯއިން އެކުލަވާލާ އާންމުކޮށްފައިވާ ކުނި ބަންދުކުރުމުގެ މިންގަނޑަށް އަމަލުނުކުރާ މައްސަލަ ވަނީ އިތުރުވެފައި ކަމަށް ވެމްކޯއިން ބުނެއެވެ. މިގޮތުން ބިއްލޫރި އާއި ދަގަނޑު އަދި އެހެނިހެން ތޫނު އެއްޗެހި ރަނގަޅަށް ބަންދުނުކޮށް ނެރުމަކީ މިފަދަ ސީރިއަސް ޒަޚަމްތަކަށް މުވައްޒަފުން ހުށަހެޅުމަށް އޮތް ފުރުސަތަކަށްވާއިރު މިކަމަށް މިހާރަށްވުރެ ބޮޑަށް ކަސްޓަމަރުން ސަމާލުވުމަށް ވެމްކޯއިން ވަނީ އިލްތިމާސްކޮށްފައެވެ.
މީގެއިތުރުން ކަސްޓަމަރުން އުކާލުމަށް ނެރޭ ކޮންމެ ކުނި ކޮތަޅަކީ ވެމްކޯގެ މުވައްޒަފުންގެ އަމިއްލަ ދެ އަތުން ނަގާނެ ކުނި ކޮތަޅެއްކަމަށް ވެމްކޯގެ ނޫސްބަޔާނުގައި ވަނީ ކަސްޓަމަރުންނަށް ހަނދާންކޮށްދީފައެވެ.
