ޖޫން މަހުގައި ހިދުމަތް ފަށާނެ ކަމަށް ރައީސް ވިދާޅުވި ހުޅުދެލި ވޭސްޓް މެނޭޖްމަންޓް ސެންޓަރަށް ވީގޮތެއް ނޭނގޭ!
ހުޅުދެލި ކުނި މެނޭޖްކުރާ ސެންޓަރުގެ މަސައްކަތް ހަވާލުކުރެވުނު ވެމްކޯއިން މިހާތަނަށް އެއްވެސް މަސައްކަތެއް ނުކުރޭ
ހުޅުދެލީ ކުނި ގޮނޑު: ޖޫން މަހުގައި ހިދުމަތް ފަށާނެ ކަމަށް ރައީސް ވިދާޅުވި ހުޅުދެލި ވޭސްޓް މެނޭޖްމަންޓް ސެންޓަރަށް ވީގޮތެއް ނޭނގޭ
ޖޫން މަހުގައި ހިދުމަތް ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ހުޅުދެލި ވޭސްޓް މެނޭޖްމަންޓް ސެންޓަރަށް ވީގޮތެއް ނޭނގޭ ކަމަށާއި ބިން ސާފުކުރުން ފިޔަވައި އިތުރު މަސައްކަތެއް މިހާތަނަށް އެތަނުގައި ނުހިނގާ ކަމަށް ހުޅުދެލި ކައުންސިލްގެ ރައީސް އަހުމަދު ނާޒިމް ވިދާޅުވެއްޖެއެވެ.
ރާއްޖެއެމްވީ އާއި ވާހަކަ ދައްކަވަމުން ހުޅުދެލި ކައުންސިލްގެ ރައީސް އަހުމަދު ނާޒިމް ވިދާޅުވީ ކުނި މެނޭޖް ކުރާ ސެންޓަރުގެ އަމަލީ މަސައްކަތް ރަސްމީކޮށް ފެށި ކަމަށެވެ. އެއީ ފެބްރުއަރީގައި ރައީސް މުއިއްޒު އެރަށަށް ވަޑައިގެން ކަމަށެވެ. އަދި އެކަމަށް ކައުންސިލްގައި އެދުނީ ސައިޓް ހަމަޖައްސަން ކަމަށާއި، އެކަން ކޮށްފައިވާނެ ކަމަށެވެ. ނާޒިމް ވިދާޅުވީ ސެންޓަރަށް 5 މުވައްޒަފުން ނެގި ކަމަށާއި، އެ މުވައްޒަފުން ސައިޓް ސާފު ކުރި ކަމަށެވެ.
އޭނާ ވިދާޅުވީ ސައިޓް ސާފު ކުރުމުގެ އިތުރުން އެތަނުގައި ހުރި ރުއްތަށް ނެގި ކަމަށާއި، އިތުރު އެއްވެސް މަސައްކަތެއް ނުހިނގާއިރު، އެތަނުގައި ހުރި ކުނިތައް ވެސް އަދިވެސް ހުރީ އެތަނުގައި ކަމަށެވެ. ހުޅުދެލި ކުނިމެނޭޖްކުރާ ސެންޓަރު ހިންގަން ހަވާލުކުރީ ވެމްކޯއާއެވެ. ނާޒިމް ވިދާޅުވީ އެ ސަރަހައްދަކީ ރައްޔިތުން ކުނިގޮނޑުގެ ގޮތުގައި ބޭނުން ކުރި ތަން ކަމަށާއި، ސައިޓް ހަވާލުކުރި އިރު ވެމްކޯއިން ބުނެފައި އޮތީ އެ ކުނި އެތަނުން ނަގާނެ ކަމަށެވެ. ނަމަވެސް މިހާތަނަށް އައި އިރު އެއްވެސް އިތުރު މަސައްކަތެއް ކޮށްފައި ނުވެއެވެ.
މި އަހަރުގެ ފެބްރުއަރީ މަހު ހުޅުދެއްޔަށް ވަޑައިގެން އެރަށު ރައްޔިތުންނާއި ބައްދަލުކުރައްވާ ވާހަކަ ދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ ކުނީގެ މައްސަލަ ޙައްލުކުރުމަކީވެސް އެމަނިކުފާނުގެ ވައުދުފުޅެއް ކަމަށެވެ. އަދި އެ ދުވަހު ރައީސް ވަނީ ވެމްކޯއާއި އެ މަސައްކަތް ހަވާލުކުރެއްވިކަން އިއުލާން ކުރައްވާ އެކަމުގެ ޢަމަލީ މަސައްކަތް ފަށައި، ތަރުތީބު ކުރަންޖެހޭ ހުރިހާ ކަމެއް ފުރިހަމަކުރެވިގެންގޮސް، ގިނަވެގެން ހަތަރުމަސް ދުވަހުގެ ތެރޭގައި، ނޫނީވިއްޔާ އެއަށްވުރެވެސް އަވަހަށް، އެންމެ ގިނަވެގެންވެސް ހަތަރުމަސް ދުވަހުގެ ތެރޭގައި، ވޭސްޓް މެނޭޖްމަންޓް ސެންޓަރުގެ ހުރިހާ ކަމެއް، ވަސީލަތްތަކާއި، މުވައްޒަފުންނާއެކީ ހަމަކުރެވި ޚިދުމަތް ފެށޭނެ ކަމަށް ވިދާޅުވެފައެވެ.
އަޅުގަނޑު ވަޢުދުވެފައި އޮތް ކަމެއް، ކުނީގެ މައްސަލަ ޙައްލުކުރުމަކީވެސް. އިރާދަކުރެއްވީތީ، މިއަދު އަޅުގަނޑުމެން މި ހަވާލުކުރީ، ސަރުކާރުގެ ކަމާބެހޭ ކުންފުންޏާ، މި ރަށުގެ ކުނި މެނޭޖްކުރަން. އެކަމުގެ ޢަމަލީ މަސައްކަތް ފަށައި، ތަރުތީބު ކުރަންޖެހޭ ހުރިހާ ކަމެއް ފުރިހަމަކުރެވިގެންގޮސް، ގިނަވެގެން ހަތަރުމަސް ދުވަހުގެ ތެރޭގައި، ނޫނީވިއްޔާ އެއަށްވުރެވެސް އަވަހަށް، އެންމެ ގިނަވެގެންވެސް ހަތަރުމަސް ދުވަހުގެ ތެރޭގައި، ވޭސްޓް މެނޭޖްމަންޓް ސެންޓަރުގެ ހުރިހާ ކަމެއް، ވަސީލަތްތަކާއި، މުވައްޒަފުންނާއެކީ ހަމަކުރެވި ޚިދުމަތް ފެށޭނެ. މިއަދު މި ހަވާލުކުރެވުނީ އެ މަސައްކަތް ފަށަން. އެހެންވީމާ، އެކަމަށްޓަކައިވެސް މި ރަށުގެ ލޮބުވެތި ރައްޔިތުންނަށް އަޅުގަނޑު މަރުޙަބާ ދަންނަވަން.25 ފެބްރުައަރީ 2025، ހުޅުދެލި - ރައީސް ޑރ. މުހައްމަދު މުއިއްޒު
ކައުންސިލް ރައީސް ނާޒިމް ވިދާޅުވީ ވެމްކޯގެ މުވައްޒަފުން އެތަން ސާފުކުރި ފަހުން އެ ސައިޓަށް ވެސް ނުދާ ކަމަށެވެ. އެ މުވައްޒަފުން އުޅެނީ އެހެނިހެން ކަންކަމުގައި ކަމަށާއި، ސައިޓުގައި މަސައްކަތް ކުރާތަން ރައްޔިތުންނަށް ނުފެންނާނެ ކަމަށެވެ.
ނާޒިމް ވިދާޅުވީ ވޭސްޓް މެނޭޖްމަންޓް ސެންޓަރަކީ އެރަށަށް މުހިންމު ތަނެއް ކަމަށާއި، ކުނި މެނޭޖްކުރެވޭނެ ނިޒާމެއް ގާއިމް ކުރުމުގެ މަސައްކަތް މިހާތަނަށް އައި އިރު އެއްވެސް ސަރުރާކަށް ނުކުރެވުނު ކަމަށެވެ. އޭނާ ވިދާޅުވީ ކުނި ގޮނޑާއި ޖެހިގެން މީހުން ދިރިއުޅޭ ގެތައް ހުންނަ ކަމަށާއި، ރައްޔިތުންގެ ޝަކުވާތައް އިންތިހާއަށް އަންނަ ކަމަށެވެ. ނަމަވެސް ސަރުކާރުތަކުގައި ދަންނަވައިގެން އެކަމަށް ހައްލެއް ނުލިބޭ ކަމަށެވެ.
