ވެމްކޯ މުވައްޒަފުންގެ މުސާރައިން ޕެންޝަން ފައިސާ ކެނޑުމަށްފަހު އެ ފައިސާ ޖަމާނުކުރާތާ 8 މަސް

ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) ގައި މަސައްކަތް ކުރާ މުވައްޒަފުންގެ މުސާރައިން ޕެންޝަން ފައިސާ ކެނޑުމަށްފަހު އެ ފައިސާ ޖަމާނުކުރާތާ 8 މަސްވެއްޖެ އެވެ.

ވެމްކޯ ގައި މަސައްކަތް ކުރާ މުވައްޒަފުންތަކެއް ރާއްޖެއެމްވީ އަށް މައުލޫމާތު ދެމުން ބުނީ، މި އަހަރުގެ ފެބްރުއަރީ މަހުން ފެށިގެން ގިނަ މުވައްޒަފުންގެ ޕެންޝަން ފަންޑަށް ފައިސާ ޖަމާކޮށްފައި ނުވާ ކަމަށެވެ. މި މައްސަލަ ތަނުގެ އިސްވެރިންގެ ސަމާލު ކަމަށް ގެނެސްފައިވާ ކަމަށާއި، އަދި އެއްއާރް ޑިޕާޓްމަންޓާ ވެސް ހިއްސާ ކޮށްފައިވާ ކަަމަށެވެ.

ނަމަވެސް ޕެންޝަން ފައިސާ ޖަމާނުވާ މައްސަލައާ ގުޅިގެން ވަކި ޖަވާބެއް ދީފައިނުވާ ކަމަށް އެ މުވައްޒަފުން ބުނެފައިވެ އެވެ.

މި މައްސަލައާ ގުޅިގެން ފަށާއިރު ޕްރޮގްރާމްގެ ތެރެއިން ވެމްކޯގެ އެޗްއާރް ޑިޕާޓްމަންޓަށް ގުޅި ނަމަވެސް ފޯނު ނަގާފައިނުވެ އެވެ. އަދި ރަސްމީކޮށް ބަހެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފަ އެވެ.

ވެމްކޯ ގައި މަސައްކަތް ކުރާ މުވައްޒަފުންގެ މުސާރައިން ޕެންޝަން ފައިސާ ކެނޑުމަށްފަހު އެ ފައިސާ ޖަމާނުކުރާތާ 8 މަސް ދުވަސްވެފައިވާއިރު، މި ފަހުން އާރްޑީސީ ގައި މަސައްކަތް ކުރާ ގިނަ މުވައްޒަފުންގެ ޕެންޝަން ފައިސާ ޖަމާނުކުރާ މައްސަލަ ވެސް ފެންމަތި ވެގެންދިޔަ އެވެ. އާރްޑީސީގެ މުވައްޒަފުންނަށް ވެސް މިދިޔަ ފެބްރުއަރީ މަހުން ފެށިގެން އެ ފައިސާ ޖަމާކޮށް ދީފައިނުވެ އެވެ. އަދި މި މަހުގެ 15 ގައި އެ ފައިސާ ޖަމާވާނެ ކަމަށް އާރްޑީސީގެ އިސްވެރިން ވިދާޅުވި ނަމަވެސް މިއަދާ ހަމައަށް އެ ފައިސާ ޖަމާ ކޮށްދީފައިނުވެ އެވެ.