ކިޔަވާ ދަރިވަރުންނަށް ޚާއްސަ ޕެކޭޖެއް އުރީދޫއިން ތައާރަފްކޮށްފި

ކިޔަވާ ދަރިވަރުންނަށް ޚާއްސަ ޕެކޭޖެއް އުރީދޫއިން ތައާރަފްކޮށްފިއެވެ.

އެޑިޔުކޭޝަން މިނިސްޓްރީން ބުނީ ދަރިވަރުން ކިޔެވުމަށް ބޭނުންވާ ޑޭޓާ ހޯދުމަށް އުރީދޫއާއެކު ކުރެވެމުން ދިޔަ މަޝްވަރާތަކަށް އަލިމަގެއް ފެނިފައިވާ ކަމަށެވެ.

އެގޮތުން އުރީދޫގެ ބްރޯޑްބޭންޑް ޚިދުމަތް ބޭނުންކުރާ ފަރާތްތަކަށް ބޭނުންކުރެވޭނެ، ކިޔަވާކުދިންނަށް ޚާއްސަ ޕެކޭޖެއް އުރީދޫއިން ތައާރަފްކޮށް އެކަން ބުރާސްފަތި ދުވަހު މިނިސްޓްރީއާ ހިއްސާކޮށްފައިވާ ކަމަށެވެ.

އެޑިޔުކޭޝަން މިނިސްޓްރީން ބުނީ މި ޕެކޭޖް މެދުވެރިކޮށް ޑޭޓާ ފޯރުކޮށްދެވޭނެ ގޮތުގެ މައުލޫމާތު ސްކޫލްތައް މެދުވެރިކޮށް ބެލެނިވެރިންނާ ހިއްސާކުރާނެ ކަމަށެވެ.

އުރީދޫގެ އިތުރުން ދިރާގުން ދަރިވަރުންގެ ކިޔެވުން ހުއްޓުނަނުދީ ކުރިއަށް ގެންދިއުމަށް ވެދެމުންދާ އެހީތެރިކަން އެޑިއުކޭޝަން މިނިސްޓްރީން ފާހަގަކޮށްފައިވެއެވެ.

މާލެ ސަރަހައްދުގައި ކޮވިޑް-19 ފެތުރެމުންދާ މި ދަނޑިވަޅުގައި ބަލި ފެތުރުން ކޮންޓްރޯލް ކުރުމަށް އަޅާ ފިޔަވަޅެއްގެ ގޮތުން މާލޭ ސަރަހައްދުގެ ސުކޫލުތަކުގެ އެލްކޭޖީން ފެށިގެން ގްރޭޑް 12ށް ކިޔަވައިދެނީ އޮންލައިންކޮށް ކަމަށެވެ. އެހެންކަމުން ދަރިވަރުންނަށް ޑޭޓާ ޕެކޭޖްތައް އެޑިޔުކޭޝަން މިނިސްޓްރީން ދަނީ ހަމަޖައްސައިދެމުންނެވެ.