މިއީ ސިޔާސީ ވާހަކަ ދެއްކުމުގެ ބަދަލުގައި ރައްޔިތުންނަށް އެހީވާންވީ ވަގުތު - މާރިއާ

މިވަގުތަކީ ސިޔާސީ ކަންކަށް އެއްފަރާތްކޮށް ގެއްލުން ލިބުނު އާއިލާއަށް އެހީތެރިވާންވީ ވަގުތު ކަމަށް ޑިފެންސް މިނިސްޓަރ މާރިއާ އަހްމަދު ދީދީ ވިދާޅުވެއްޖެއެވެ.

މއ. މޯނިންގ ވިއުގެ 3 ވަނަ ފަންގިފިލާގައި އަލިފާން ރޯވުމާއެކު އެ ސަރަހައްދަށް ވަޑައިގެން ދެއްވި ބަސްދީގަތުމުގައި މިނިސްޓަރ ވިދާޅުވީ، އަލިފާން ރޯވި ގޭގެ މީހުންނަށް މިވަގުތަށް ފޯރުކޮށްދޭން ޖެހޭ އެހީތެރިކަން ފޯރުކޮށްދިނުމަށް ނެޝަނަލް ޑިޒާސްޓަރ މެނޭޖްމެންޓުން މިހާރުން މިހާރަށް ކުރަން ޖެހޭ ކަންތައްތައް ދެނެގަނެ އެކަންތައްތައް ކުރިއަށް އެބަ ގެންދަވާ ކަމަށެވެ.

އަލިފާން ރޯވި ގޭގައި ދިރިއުޅެމުން ދިޔަ މީހުން މިހާރުވަނީ ޢިޔާސުއްދީން ސްކޫލަށް ބަދަލު ކުރެވިފައެވެ.

މިނިސްޓަރ ވިދާޅުވީ، މިކަހަލަ ބޮޑުކަމެއް ދިމާވާއިރު، އަވަހަށް ވަގުތުން ވަގުތަން ކަންކަން ވާން ރައްޔިތުން ބޭނުންވާނެ ކަމަށާއި، އެކަން ގަބޫލުފުޅު ކުރެއްވޭ ކަމަށެވެ. އެއީ އިންސާނީ ތަބީއަތް ކަމަށެވެ. އެ ރައްޔިތުންގެ ކަންބޮޑުވުންތައް ބަލައި ރަނގަޅު ކުރަންޖެހޭ ކަންކަން މިހާރު ވެސް ކުރައްވަމުން އަންނަ ކަމަށް ވިދާޅުވިއެވެ.

އެމްއެންޑީއެފްގެ ފަޔަރ އެންޑް ރެސްކިއު ޓީމުން ބުނީ، މހާދިސާގެ މައުލޫމާތު ލިބުމާއެކު 2 މިނިޓެއްގެ ތެރޭގައި އަލިފާން ނިއްވާ ފުރަތަމަ ވެހިކަލް ސަިއޓައި ދިޔަ ކަމަށެވެ. އަލިފާން ރޯވި ގޭގެ 4 ފަންގިފިލާއަކީ ވެސް ލަކުޑިން ޑެގް އަޅައިގެން ހަދާފައިވާ ގެއެއް ކަމުން އަލިފާނުގެ ހޫނުން ގެއްލުންތަކެއް ވެފައިވާ ކަމަށާއި، އަލިފާން ފެތުރިގެން ގޮސްފައި ނުވާ ކަމަށެވެ.

މި ހާދިސާއާ ލިބުނު ގެއްލުން މިހާރު އަންނަނީ ތަހުގީގު ކުރަމުންނެވެ. ހާދިސާ ހިނގާފައިވަނީ ފަތިހު 5:20 ހާއިރުއެވެ.