އީޔޫގެ ޑިމާންޑާ އެއްވަރަށް އެސްޓްރަޒެނަކާ ވެކްސިން ފޯރުކޮށްނުދެވޭނަމަ ބަދަލުދޭން އެދިއްޖެ
މައްސަލައިގެ ފުރަތަމަ އަޑުއެހުން ބާއްވާފައިވަނީ ބުދަ ދުވަހު
އެސްޓްރަޒެނަކާ ވެކްސިންގެ 120 މިލައަން ޑޯޒް ހޯދަން އެދުމުން ފޮނުވާފައިވަނީ 30 މިލއަން ޑޯޒް
އީޔޫގެ ޑިމާންޑާ އެއްވަރަށް އެސްޓްރަޒެނަކާ ވެކްސިން ފޯރުކޮށް ނުދެވިއްޖެނަމަ ބަދަލުދޭން އީޔޫއިން އެދިއްޖެއެވެ.
އެސްޓްރަޒެނަކާ ވެކްސިން އުފައްދާ ކުންފުނިން ވެކްސިން ފޯރުކޮށް ނުދޭކަމަށް ބުނެ މައްސަލަ މިހާރުވަނީ ކޯޓަށް ހުށާހަޅާފައެވެ. އީޔޫއިން އެންމެ ފަހުން އޯޑަރ ކުރި ވެކްސިންގެ ތެރެއިން 30 މިލިއަން ވަނީ ފޯރުކޮށްދީފައެވެ. އީޔޫއިން އޯޑަރ ކޮށްފައިވަނީ އެސްޓަރަޒެނަކާގެ 120 މިލިއަން ޑޯޒެވެ. ކުންފުނިން ވަނީ އެ ކުންފުނީގެ ޔޫރަޕްގެ ޕްލާންޓްތަކުން ވެކްސިން އުފެއްދުމުގައި ދަތިތަކެއް ހުރިކަން ފާހަގަކޮށްފައެވެ. އެހެންނަމަވެސް އެ ކުންފުނިން އިނގިރޭސިވިލާތަށް ވަކިން ވެކްސިން ފޯރުކޮށްދޭ މައްސަލަ ފެންމަތިވިއެވެ.
ބުދަދުވަހު ބެލްޖިއަމްގެ ކޯޓުގައި އޮތް ފުރަތަމަ އަޑުއެހުމުގައި އީޔޫގެ ވަކީލު ފަނީ ލައުން ބުނީ، ވެކްސިން ލިބުމުގައި ލަސްވާތީވެ ޔޫރަޕްގެ އެތައް މިލިއަން މީހުންގެ ފުރާނަ ނުރައްކަލަށް ހުށަހެޅިފައިވާ ކަމަށެވެ. އެހެންކަމުން ލަސްވާ ކޮންމެ ޑޯޒަަކަށް ކޮންމެ ދުވަހަކު 10 ޔޫރޯ އެ ކުންފުނިން އީޔޫއަށް ދައްކަންޖެހޭނެ ކަމަށް ވަކީލު ވަނީ ބުނެފައެވެ.
އީޔޫގެ ގައުމުތަކުގައި ވެކްސިންގެ ފުރަތަމަ ޑޯޒް ފުރިހަމަކުރި މީހުންގެ އަދަދު މިހާރުވަނީ 155 މިލިއަނަށް އަރާފައެވެ.
